চেন্নাই ছুপাৰ কিংছৰ অনুৰাগীসকলৰ বাবে আহিছে এক গুৰুত্বপূৰ্ণ খবৰ। IPLৰ দ্বিতীয়টো সংস্কৰণৰ পৰাই CSKৰ মুখ্য প্ৰশিক্ষকৰ দায়িত্বত থকা ষ্টিফেন ফ্লেমিঙে CSKৰ দায়িত্ব এৰাৰ পিছত এতিয়া নতুন প্ৰশিক্ষকক লৈ চৰ্চা আৰম্ভ হৈছে। ফ্লেমিঙে ইংলেণ্ডৰ টেষ্ট দলৰ প্ৰশিক্ষকৰ দায়িত্ব লোৱাৰ পিছতে চেন্নাই ছুপাৰ কিংছে তেওঁৰ বিকল্প বিচাৰি আৰম্ভ কৰিছে প্ৰস্তুতি। ফ্লেমিং চেন্নাই ছুপাৰ কিংছৰ সৈতে দীৰ্ঘদিন ধৰি জড়িত হৈ আছিল। তেওঁৰ নেতৃত্বত দলটোৱে আই পি এলত যথেষ্ট সফলতা লাভ কৰিছে। সেয়েহে তেওঁৰ ঠাইত কোনে দলটোক আগুৱাই নিব, সেয়া এতিয়া CSKৰ বাবে এক ডাঙৰ প্ৰশ্ন হৈ পৰিছে। PTIৰ প্ৰতিবেদন অনুসৰি, নতুন মুখ্য প্ৰশিক্ষকৰ সন্ধানত চেন্নাই ছুপাৰ কিংছে দুগৰাকী প্ৰাক্তন ভাৰতীয় ক্ৰিকেটাৰৰ সৈতে যোগাযোগ কৰিছে। এই ক্ৰিকেটাৰ দুগৰাকী হৈছে ৰাহুল দ্ৰাবিড় আৰু দীনেশ কাৰ্তিক। দুয়োজনেই ভাৰতীয় ক্ৰিকেটৰ পৰিচিত মুখ আৰু প্ৰশিক্ষক তথা মেণ্টৰ হিচাপে ইতিমধ্যে নিজৰ দক্ষতা প্ৰমাণ কৰিছে।
ৰাহুল দ্ৰাবিড়ক লৈ বিশেষ চৰ্চা
CSKৰ প্ৰাক্তন অ’পেনাৰ মেথিউ হেডেনে এই বিষয়ত গুৰুত্বপূৰ্ণ মন্তব্য কৰিছে। হেডেনৰ মতে, চেন্নাই ছুপাৰ কিংছৰ পৰিচালনা সমিতিয়ে ৰাহুল দ্ৰাবিড়ৰ সৈতে দলটোৰ মুখ্য প্ৰশিক্ষক হোৱাৰ সম্ভাৱনাক লৈ আলোচনা কৰিছে। ৰাহুল দ্ৰাবিড়ৰ প্ৰশিক্ষক হিচাপে যথেষ্ট অভিজ্ঞতা আছে। ভাৰতীয় দলৰ মুখ্য প্ৰশিক্ষক হিচাপে তেওঁ কাম কৰাৰ সময়ত টিম ইণ্ডিয়াই ২০২৪ চনৰ টি-২০ বিশ্বকাপ জয় কৰিছিল। ইয়াৰ উপৰি IPLতো দ্ৰাবিড়ৰ অভিজ্ঞতা আছে। তেওঁ ৰাজস্থান ৰয়েলছ আৰু দিল্লী কেপিটেলছৰ সৈতে বিভিন্ন ভূমিকাত কাম কৰিছে। সেয়েহে ফ্লেমিঙৰ পিছত CSKৰ দৰে সফল দলৰ দায়িত্ব লোৱাৰ ক্ষেত্ৰত দ্ৰাবিড়ক এগৰাকী শক্তিশালী প্ৰাৰ্থী হিচাপে দেখা হৈছে। অৱশ্যে এতিয়ালৈকে তেওঁক CSKৰ নতুন মুখ্য প্ৰশিক্ষক হিচাপে নিযুক্তি দিয়াৰ কোনো আনুষ্ঠানিক ঘোষণা হোৱা নাই।
দীনেশ কাৰ্তিকৰ নামো চৰ্চাত
আনহাতে, প্ৰাক্তন ভাৰতীয় ক্ৰিকেটাৰ দীনেশ কাৰ্তিকৰ নামো CSKৰ সম্ভাৱ্য প্ৰশিক্ষক হিচাপে চৰ্চালৈ আহিছে। কাৰ্তিকৰ আই পি এলৰ অভিজ্ঞতা যথেষ্ট দীঘলীয়া। খেলুৱৈ হিচাপে তেওঁ বিভিন্ন ফ্ৰেঞ্চাইজিৰ হৈ খেলাৰ লগতে মেণ্টৰ আৰু সম্প্ৰতি RCBৰ বেটিং প্ৰশিক্ষক হিচাপেও কাম কৰি আহিছে। বৰ্তমান তেওঁ ৰয়েল চেলেঞ্জাৰ্ছ বেংগালুৰুৰ সৈতে মেণ্টৰ আৰু বেটিং প্ৰশিক্ষকৰ ভূমিকাত জড়িত। দলটোৰ সৈতে তেওঁৰ কামৰ অভিজ্ঞতাই তেওঁকো CSKৰ বাবে এটা সম্ভাৱ্য বিকল্প কৰি তুলিছে।
CSKৰ সিদ্ধান্তলৈ সকলোৰে দৃষ্টি
PTIৰ প্ৰতিবেদন আৰু মেথিউ হেডেনৰ মন্তব্যৰ প্ৰতি গুৰুত্ব দি দীনেশ কাৰ্তিক আৰু ৰাহুল দ্ৰাৱিড়ৰ সম্ভাৱনাক একেবাৰে নুই কৰিব নোৱাৰি। ষ্টিফেন ফ্লেমিঙৰ দৰে সফল প্ৰশিক্ষকৰ ঠাই পূৰণ কৰাটো চেন্নাই ছুপাৰ কিংছৰ বাবে সহজ নহ’ব। ফ্লেমিঙৰ অধীনত দলটোৱে এক বিশেষ কৌশল আৰু দলীয় সংস্কৃতি গঢ়ি তুলিছিল। সেয়েহে নতুন প্ৰশিক্ষকৰ পৰা কেৱল ক্ৰিকেটৰ জ্ঞানেই নহয়, খেলুৱৈসকলক একেলগে লৈ যোৱাৰ ক্ষমতাও আশা কৰা হ’ব। ৰাহুল দ্ৰাবিড়ৰ আন্তঃৰাষ্ট্ৰীয় প্ৰশিক্ষণৰ অভিজ্ঞতা আৰু দীনেশ কাৰ্তিকৰ আই পি এল তথা মেণ্টৰশ্বিপৰ অভিজ্ঞতা—দুয়োটা বিকল্পই CSKৰ বাবে আকৰ্ষণীয় হ’ব পাৰে। অৱশ্যে শেষত চেন্নাই ছুপাৰ কিংছৰ পৰিচালনা সমিতিয়ে কাক বাছনি কৰে, সেই কথাই এতিয়া ক্ৰিকেট অনুৰাগীৰ মাজত আটাইতকৈ বেছি কৌতূহল সৃষ্টি কৰিছে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
