নতুন দিল্লীত মুখ্য নিৰ্বাচন আয়ুক্ত (CEC) জ্ঞানেশ কুমাৰৰ পদত্যাগৰ দাবীত ককৰোচ জনতা পাৰ্টী (CJP)-এ কঠোৰ স্থিতি গ্ৰহণ কৰিছে। বৃহস্পতিবাৰে দলটোৱে সংবাদমেল অনুষ্ঠিত কৰি জ্ঞানেশ কুমাৰক পদত্যাগৰ বাবে ৪৮ ঘণ্টাৰ সময়সীমা বান্ধি দিয়ে। এই সময়ৰ ভিতৰত তেওঁ পদত্যাগ নকৰিলে দেশজুৰি আন্দোলন আৰম্ভ কৰাৰ হুংকাৰ দিছে দলটোৱে। CJPৰ প্ৰতিষ্ঠাপক তথা আহ্বায়ক অভিজিৎ দিপকে কয় যে মুখ্য নিৰ্বাচন আয়ুক্তই ৪৮ ঘণ্টাৰ ভিতৰত পদত্যাগ নকৰিলে দলটোৱে দেশৰ বিভিন্ন স্থানত প্ৰতিবাদী কাৰ্যসূচী গ্ৰহণ কৰিব। দলটোৱে এই আন্দোলন পূৰ্বে দিল্লীৰ যন্তৰ-মন্তৰত কৰা প্ৰতিবাদৰ দৰেই কৰিব বুলি প্ৰকাশ কৰিছে।
এই দাবীৰ মূলতে আছে নিৰ্বাচনী ভোটাৰ তালিকাৰ SIRক লৈ চলি থকা বিতৰ্ক। শেহতীয়াকৈ প্ৰকাশিত এক প্ৰতিবেদনত দাবী কৰা হৈছে যে নিৰ্বাচন আয়োগৰ আন দুগৰাকী নিৰ্বাচন আয়ুক্ত—সুখবীৰ সিং সান্ধু আৰু বিবেক যোশীয়ে যোৱা প্ৰায় ১০ মাহত আয়োগৰ বিভিন্ন সিদ্ধান্ত আৰু কাৰ্যপ্ৰণালীৰ ক্ষেত্ৰত ১৪টাকৈ আপত্তি দাখিল কৰিছিল। এই আপত্তিসমূহৰ ভিতৰত ভোটাৰ যোগ-বিয়োগ, ভোটাৰ তালিকা সংশোধন, Form 6ৰ ব্যৱহাৰ আৰু ভোটাৰ তথ্য পৰিচালনাৰ দৰে বিষয় অন্তৰ্ভুক্ত আছিল বুলি প্ৰতিবেদনত উল্লেখ কৰা হৈছে।
অৱশ্যে, নিৰ্বাচন আয়োগে এই বিষয়ত নিজৰ স্থিতি স্পষ্ট কৰি কৈছে যে আয়োগৰ ভিতৰত ভিন্ন মত বা লিখিত পৰ্যবেক্ষণ থকাটো স্বাভাৱিক আৰু ই এক ধৰণৰ আভ্যন্তৰীণ পৰীক্ষা-নিৰীক্ষা বা checks and balancesৰ অংশ। আয়োগৰ মতে, বিগত এবছৰৰ সিদ্ধান্তসমূহ, SIR-সহ, সৰ্বসন্মতিক্ৰমে গ্ৰহণ কৰা হৈছিল।
ককৰোচ জনতা পাৰ্টীয়ে কেৱল মুখ্য নিৰ্বাচন আয়ুক্তৰ পদত্যাগেই নহয়, কেইবাটাও দাবী উত্থাপন কৰিছে। প্ৰথম দাবী: মুখ্য নিৰ্বাচন আয়ুক্ত জ্ঞানেশ কুমাৰে পদত্যাগ কৰিব লাগে। দ্বিতীয় দাবী: নিৰ্বাচন আয়োগৰ সিদ্ধান্তসমূহৰ আঁৰত কোনো নিৰ্দেশ বা হস্তক্ষেপ আছিল নেকি, সেই সন্দৰ্ভত তদন্ত হ’ব লাগে। দলটোৱে জ্ঞানেশ কুমাৰৰ বিৰুদ্ধে তদন্ত আৰু আইনী ব্যৱস্থাৰো দাবী কৰিছে। তৃতীয় দাবী: আগন্তুক সকলো নিৰ্বাচন সাময়িকভাৱে স্থগিত ৰাখিব লাগে, যেতিয়ালৈকে নিৰ্বাচনী ব্যৱস্থাক লৈ উত্থাপিত অভিযোগসমূহ পৰীক্ষা কৰা নহয়। ইয়াৰ উপৰি CJP-এ SIR প্ৰক্ৰিয়াক ২০২৫ চনৰ পূৰ্বৰ ভোটাৰ তালিকাৰ অৱস্থালৈ ঘূৰাই নিয়াৰ দাবী কৰিছে। SIR-সম্পৰ্কীয় নথি-পাতি উচ্চতম ন্যায়ালয়ৰ নেতৃত্বত কোনো কমিটীৰ জিম্মাত ৰখাৰো দাবী উত্থাপন কৰিছে।
CJPৰ মতে, নিৰ্বাচনী ব্যৱস্থাৰ স্বচ্ছতা আৰু ভোটাৰৰ অধিকাৰ সুৰক্ষিত কৰাৰ বাবে এই আন্দোলন কৰা হ’ব। দলটোৱে স্পষ্ট কৰি দিছে যে ৪৮ ঘণ্টাৰ সময়সীমাৰ ভিতৰত পদত্যাগ নকৰিলে প্ৰতিবাদ অধিক তীব্ৰ কৰা হ’ব আৰু দেশৰ বিভিন্ন প্ৰান্তত আন্দোলন চলোৱা হ’ব। ইফালে জ্ঞানেশ কুমাৰৰ পদত্যাগৰ দাবী কেৱল CJP-তেই সীমাবদ্ধ হৈ থকা নাই। SIR আৰু নিৰ্বাচন আয়োগৰ কাম-কাজক লৈ কেইবাটাও বিৰোধী ৰাজনৈতিক দলে পৃথকে পৃথকে প্ৰশ্ন উত্থাপন কৰিছে। কংগ্ৰেছেও ২৫ ছেপ্টেম্বৰত দেশৰ বিভিন্ন ৰাজ্যিক নিৰ্বাচন আয়োগৰ কাৰ্যালয়লৈ প্ৰতিবাদী সমদল উলিয়াব বুলি ঘোষণা কৰিছে।
CJP-এ দিয়া ৪৮ ঘণ্টাৰ সময়সীমাৰ পাছত দলটোৱে কি ধৰণৰ আন্দোলন আৰম্ভ কৰে, সেয়া এতিয়া লক্ষ্যণীয় হ’ব। আনহাতে, নিৰ্বাচন আয়োগে উত্থাপিত অভিযোগসমূহৰ সন্দৰ্ভত ইতিমধ্যে নিজৰ ব্যাখ্যা আগবঢ়াইছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
