ঈশ্বৰ পুত্ৰৰ মৃ*ত্যুৰ গোচৰৰ সাক্ষী হিচাপে আজি চান্দমাৰি ন্যায়িক দণ্ডাধীশৰ আদালতত উপস্থিত হয় অভিমন্যু তালুকদাৰ। আদালতলৈ অহাৰ সময়ত সাংবাদিকৰ আগত জুবিন গাৰ্গৰ সৈতে ছিংগাপুৰত হোৱা সাক্ষাৎ, য়ট পাৰ্টিৰ দিনটোৰ ঘটনা আৰু জুবিন দা পানীত পৰাৰ পাছৰ পৰিস্থিতি সন্দৰ্ভত কেইবাটাও গুৰুত্বপূৰ্ণ কথা উল্লেখ কৰে অভিমন্যুৱে। অভিমন্যুৰ বক্তব্য অনুসৰি, জুবিন গাৰ্গ যে এগৰাকী অতি জ্ঞানী আৰু মহান শিল্পী আছিল, সেই কথা তেওঁ আগতে হেনো জনাই নাছিল। ছিংগাপুৰত জুবিন দাক লগ পোৱাৰ পাছত, তেওঁৰ সৈতে কথা পাতি জুবিনৰ পঢ়া-শুনা, জ্ঞান আৰু বিভিন্ন বিষয়ৰ ওপৰত থকা গভীৰ দখলৰ বিষয়ে তেওঁ উপলব্ধি কৰিছিল।
অভিমন্যুৱে কয় যে জুবিন দাৰ সৈতে কথা পতাৰ সময়ত অসমৰ ইতিহাস, কলা-সংস্কৃতি আদি বিভিন্ন বিষয়ক লৈ জুবিন দাই বহু কথা কৈছিল। অভিমন্যুৱে অতি আচৰিত ধৰণে কয় যে বিগত ২২ বছৰতকৈ অধিক সময় তেওঁ অসমত নাছিল। ১৯৯৪-৯৫ চনত তেওঁ গুৱাহাটীত আছিল। সেই সময়ত তেওঁ জিতুল সোণোৱালৰহে অনুৰাগী আছিল বুলি মন্তব্য কৰে। অভিমন্যুৱে লগতে কয় যে সেই সময়ত জুবিন গাৰ্গৰ নাম শুনিছিল যদিও জুবিনৰ স্বাস্থ্যজনিত সমস্যাৰ বিষয়ে তেওঁ অৱগত নাছিল। আনকি জুবিন দা জীৱনকালত প্ৰায় ৪০ হাজাৰ গান গোৱা বুলি তেওঁ জুবিন দাৰ মৃত্যুৰ পাছতহে জানিবলৈ পাইছিল বুলি অতি আচৰিত ধৰণে অভিমন্যুৱে মন্তব্য কৰে। দেশতেই থাকক বা বিদেশতেই থাকক প্ৰতিজন অসমীয়াই জানে জুবিন দাৰ কৃতিত্বৰ কথা, জুবিন দাৰ প্ৰতিটো কথা। তেনেক্ষেত্ৰত এজন অসমীয়া হৈও জুবিন দাৰ কথা, জুবিন দা কৃতিত্বৰ কথা নজনা বুলি মন্তব্য কৰাটো সঁচাকৈ আচৰিত কথা।
অভিমন্যুৰ বক্তব্য অনুসৰি, য়ট পাৰ্টিলৈ তেওঁক তন্ময় ফুকনে মাতিছিল। ১৯ ছেপ্টেম্বৰৰ পুৱা প্ৰায় ১০ বজাত তেওঁ য়ট পাৰ্টিলৈ যোৱাৰ সিদ্ধান্ত লৈছিল আৰু দুপৰীয়া প্ৰায় ২ বজাত য়টত উপস্থিত হৈছিল। সুৰাৰ বটল যোগান ধৰাৰ সন্দৰ্ভতো অভিমন্যুৱে বক্তব্য দিয়ে। তেওঁ কয় যে, শ্যামকানু মহন্তকহে অভিমন্যুৱে সুৰাৰ বটল দিছিল। য়ট পাৰ্টিৰ প্ৰায় দুদিন আগতেই তেওঁক এইদৰে সুৰাৰ বটল যোগান ধৰিবলৈ কোৱা হৈছিল বুলি অভিমন্যুৱে কয়। ১৭ ছেপ্টেম্বৰত শ্যামকানু মহন্তক সুৰাৰ বটল দিয়া বুলিও তেওঁৰ বক্তব্যত উল্লেখ কৰে।
দ্বিতীয়বাৰ সাগৰত নমাৰ সময়ত লাইফ জেকেট নাছিল বুলি দাবী। অভিমন্যুৰ ভাষ্য অনুসৰি, জুবিনে য়টৰ পৰা সাগৰৰ পানীত নামি সাঁতুৰিবলৈ গৈছিল। দ্বিতীয়বাৰ পানীত জঁপিওৱাৰ পাছতেই হুলস্থুলৰ সৃষ্টি হোৱা বুলি তেওঁ কয়। তেওঁৰ মতে, সাগৰত সাঁতুৰিবলৈ যোৱাৰ সময়ত লাইফ জেকেট পৰিধান কৰাটো প্ৰয়োজনীয়। কিন্তু জুবিন দাই দ্বিতীয়বাৰ পানীত নমাৰ সময়ত লাইফ জেকেট পিন্ধা নাছিল বুলি অভিমন্যুৱে উল্লেখ কৰে। তেওঁ কয় যে সেই সময়ত তেওঁ জুবিন দাৰ ওচৰত নাছিল। তেওঁ এখন চকীত বহি আছিল আৰু পাছত হাত ধুবলৈ গৈছিল। সেই সময়তে হুলস্থুলৰ শব্দ শুনা বুলি অভিমন্যুৱে কয়।
‘শেষত কি হৈছিল?’ বুলি সোধাত অভিমন্যুৱে কয় যে তেওঁ ঘটনাটো প্ৰত্যক্ষ কৰা নাছিল। তেওঁৰ ভাষ্য অনুসৰি, জুবিন দাৰ সৈতে কথা পতাৰ পাছত জুবিন দা সাঁতুৰিবলৈ গৈছিল। দ্বিতীয়বাৰ পানীত জঁপিওৱাৰ পাছতেই ঘটনাটো সংঘটিত হয়। হুলস্থুল শুনাৰ পাছত তন্ময়েও সাগৰত জঁপিয়াই পৰিছিল বুলি অভিমন্যুৱে কয়। কিন্তু জুবিন পানীত কেনেদৰে ডুব গ’ল বা শেষ মুহূৰ্তত সঠিকভাৱে কি হৈছিল, সেই কথা তেওঁ নিজে দেখা নাছিল বুলি জানিবলৈ দিয়ে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
