সম্প্ৰতি যুৱতীসকলৰ বাবে যেন নিৰাপত্তা এক বৃহৎ প্ৰশ্ন হৈ পৰিছে। ৰিয়া তালুকদাৰ-নিমিষা ঠাকুৰীয়াৰ হত্যাকাণ্ডৰ পিছত হিমাশ্ৰী বড়োৰ মৃতদেহ অন্ধপ্ৰদেশত উদ্ধাৰ হোৱাৰ পিছতে আন এক ঘটনা পোহৰলৈ আহিছে। অৱশ্যে এই ঘটনা অসমৰ নহয়। অন্ধ্ৰপ্ৰদেশৰ প্ৰকাশম জিলাৰ দাৰ্চী চহৰত এগৰাকী ২২ বছৰীয়া যুৱতীৰ ৰহস্যজনক মৃ*ত্যুক কেন্দ্ৰ কৰি তীব্ৰ চাঞ্চল্যৰ সৃষ্টি হৈছে। ঘৰৰ পৰা বন্ধুক লগ কৰিবলৈ ওলাই যোৱাৰ পিছত পিছদিনা পুৱা পুখুৰীৰ পাৰত যুৱতীগৰাকীৰ মৃ*তদেহ উদ্ধাৰ হয়। মৃ*তদেহটোত কেইবাটাও গুৰুতৰ আঘাতৰ চিন আৰু এটা বাহু ভঙা অৱস্থাত পোৱা গৈছে। এই ঘটনাৰ পিছতে যুৱতীগৰাকীৰ পৰিয়ালে তেওঁৰ বন্ধুসকলৰ বিৰুদ্ধে অপহৰণ আৰু পৰিকল্পিত হ*ত্যাৰ অভিযোগ উত্থাপন কৰিছে। অৱশ্যে, ঘটনাটোৰ প্ৰকৃত কাৰণ এতিয়াও স্পষ্ট হোৱা নাই।
জানিব পৰা মতে, মৃত যুৱতীগৰাকী হৈছে দাৰ্চী চহৰৰ বাসিন্দা শ্বেখ ৰেহমত বাছাৰ কন্যা শ্বেখ আয়েশা। শেহতীয়াকৈ স্নাতক ডিগ্ৰী সম্পূৰ্ণ কৰা আয়েশাৰ এনে আকস্মিক মৃ*ত্যুত শোকত ভাগি পৰিছে পৰিয়ালৰ লোক। আনহাতে, ঘটনাটোৰ আঁৰত কোনো ষড়যন্ত্ৰ আছে নেকি, সেই দিশতো আৰক্ষীয়ে তদন্ত অব্যাহত ৰাখিছে।
ঘটনাৰ বিৱৰণ অনুসৰি, বিগত ৫ অক্টোবৰৰ বিয়লি আয়েশাই বন্ধুক লগ কৰিবলৈ যোৱাৰ কথা ঘৰৰ লোকক জনাই স্কুটাৰেৰে ঘৰৰ পৰা ওলাই গৈছিল। কিন্তু নিশা বহু সময় পাৰ হৈ যোৱাৰ পিছতো তেওঁ ঘৰলৈ উভতি নাহিল। ইয়াৰ পিছতে চিন্তিত হৈ পৰা পৰিয়ালৰ লোকে আত্মীয়-স্বজন, বন্ধু-বান্ধৱী আৰু চিনাকি লোকৰ ঘৰত আয়েশাক বিচাৰিবলৈ আৰম্ভ কৰে। কিন্তু বহু বিচাৰ-খোচাৰ কৰিও তেওঁৰ কোনো সন্ধান লাভ নকৰাত পিতৃ শ্বেখ ৰেহমত বাছাই সেই নিশাই স্থানীয় দাৰ্চী থানাত নিৰুদ্দেশৰ অভিযোগ দাখিল কৰে। অভিযোগ লাভ কৰাৰ পিছতে আৰক্ষীয়ে গোচৰ ৰুজু কৰি যুৱতীগৰাকীৰ সন্ধানত তদন্ত আৰু তালাচী অভিযান আৰম্ভ কৰে।
পিছদিনা পুৱা দাৰ্চীৰ সমীপৰ এন এ পি পুখুৰীৰ ওচৰত এগৰাকী যুৱতীৰ মৃ*তদেহ পৰি থকা বুলি আৰক্ষী আৰু স্থানীয় লোকক খবৰ দিয়া হয়। খবৰ লাভ কৰাৰ পিছতে আৰক্ষীৰ দল ঘটনাস্থলীত উপস্থিত হয়। পৰিয়ালৰ লোকেও তাত উপস্থিত হৈ মৃ*তদেহটো আয়েশাৰ বুলি চিনাক্ত কৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
