আমেৰিকাৰ ধনকুবেৰ তথা SpaceXৰ মুৰব্বী ইলন মাস্কে ভাৰতত তেওঁৰ চেটেলাইট ইণ্টাৰনেট সেৱা ষ্টাৰলিংক মুকলি কৰাত পলম হোৱাক লৈ অসন্তুষ্টি প্ৰকাশ কৰিছে। ভাৰতত নিজৰ একচেটিয়া ব্যৱসায়িক স্থিতি বজাই ৰাখিবলৈ একাংশ প্ৰভাৱশালী গোটে ষ্টাৰলিংকৰ সেৱা আৰম্ভ কৰাত বাধা দিয়া বুলি মুকলিকৈ অভিযোগ কৰিছে মাস্কে। তেওঁৰ মতে, ইয়াৰ ফলত ভাৰতৰ সাধাৰণ জনতাই উন্নত ইণ্টাৰনেট সেৱাৰ পৰা বঞ্চিত হ’বলগীয়া হৈছে।
এই পৰ্যন্ত বিশ্বৰ ১৬৫ খনতকৈও অধিক দেশত Starlink-এ সেৱা আগবঢ়োৱাৰ অনুমতি লাভ কৰিছে। কিন্তু ভাৰতত বিগত প্ৰায় ৫ বছৰ ধৰি চৰকাৰৰ সকলো আইন-কানুন আৰু নিয়ম মানি চলাৰ পাছতো অনুজ্ঞা-পত্ৰ লাভ নকৰাক লৈ প্ৰশ্ন উত্থাপন কৰিছে SpaceXৰ মুৰব্বী তথা ধনকুবেৰ ইলন মাস্কে।
ছ’চিয়েল মিডিয়া প্লেটফৰ্ম Xত এটা পোষ্টৰ জৰিয়তে মাস্কে প্ৰশ্ন কৰে যে, ষ্টাৰলিংকে ১৬৫খনতকৈও অধিক দেশত অনুজ্ঞাপত্ৰ লাভ কৰিছে আৰু ভাৰত চৰকাৰৰ সকলো আইন তথা প্ৰয়োজনীয়তা পূৰণ কৰিবলৈ পাঁচ বছৰ ধৰি চেষ্টা কৰি আহিছে। তেন্তে ভাৰতত এতিয়াও অনুজ্ঞাপত্ৰ লাভ নকৰাৰ কাৰণ কি? ইয়াৰ লগতে মাস্কে প্ৰশ্ন কৰে, “ভাৰতৰ প্ৰকৃত Boss আম্বানিহে নেকি?” তেওঁৰ এই মন্তব্যই ভাৰতৰ টেলিকম খণ্ডত প্ৰতিযোগিতা আৰু অনুজ্ঞাপত্ৰ প্ৰদানৰ প্ৰক্ৰিয়াক লৈ নতুন চৰ্চাৰ সৃষ্টি কৰিছে। ইফালে, কংগ্ৰেছ নেতা ৰাহুল গান্ধীয়েও মাস্কৰ মন্তব্যটোক ৰিটুইট কৰি কয়, “ভাৰতলৈ স্বাগতম, ইলন। সেইজন ব্যক্তিক আৱিষ্কাৰ কৰালৈ অপেক্ষা কৰা।” মাৰ্কিন চতুৰ ঔদ্যোগিক ইলন মাস্কক সমৰ্থন কৰিবলৈ গৈ ৰাহুল গান্ধীয়ে কৰা মন্তব্যটোৱে পিছে Xব্যৱহাৰকাৰীসকলক বেছ আমোদ দিছে।
ছ’চিয়েল মিডিয়া প্লেটফৰ্ম এক্সত এজন লোকৰ এটা পোষ্টৰ উত্তৰ দি মাস্কে এই মন্তব্য কৰে। পোষ্টটোত দাবী কৰা হৈছিল যে ভাৰতৰ ১১,২৫৬খন তালিকাভুক্ত গাঁৱত ২০২৬ চনৰ মে’ মাহলৈকে 4G মোবাইল নেটৱৰ্কৰ সুবিধা উপলব্ধ নহ’ল। এই পোষ্টৰ উত্তৰত মাস্কে কয় যে ভাৰতীয় জনসাধাৰণৰ ওপৰত নিজৰ একচেটিয়া দখল বজাই ৰাখিবলৈ কিছুমান প্ৰভাৱশালী গোটে ষ্টাৰলিংকৰ সেৱা আৰম্ভ কৰাত বাধা দিছে। ভাৰতৰ টেলিকম খণ্ডৰ অন্যতম বৃহৎ অনুষ্ঠান ‘ইণ্ডিয়া মোবাইল কংগ্ৰেছ’ অনুষ্ঠিত হৈ থকাৰ সময়তে মাস্কৰ এই মন্তব্যই বিশেষ চৰ্চা লাভ কৰিছে। প্ৰধানমন্ত্ৰী নৰেন্দ্ৰ মোদীয়ে এই অনুষ্ঠান উদ্বোধন কৰাৰ কথা।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
