উত্তৰ প্ৰদেশৰ ৰাজধানী লক্ষ্ণৌৰ কৃষ্ণনগৰ থানা এলেকাৰ ভোলাখেডাত সংঘটিত হৈছে এক চাঞ্চল্যকৰ ডাবল মাৰ্ডাৰ। ৫৬ বছৰীয়া হোমগাৰ্ড ৰবীন্দ্ৰ শংকৰ গুপ্তাৰ বিৰুদ্ধে পত্নী আৰু কন্যাক হ*ত্যা কৰাৰ অভিযোগ উত্থাপন হৈছে। ঘটনাৰ ভুক্তভোগী নি*হত ৫০ বছৰীয়া পত্নী শ্যামা দুলাৰী আৰু ৩২ বছৰীয়া কন্যা পূজা চাহু।
আৰক্ষীৰ তথ্য অনুসৰি, শুকুৰবাৰে পুৱা এই ঘটনা পোহৰলৈ আহে। অভিযোগ অনুসৰি, নিশা পত্নী-কন্যা শুই থকা অৱস্থাত ডাটা কেবলেৰে ডিঙি চেপি হ*ত্যা কৰে। ঘটনা সংঘটিত হোৱাৰ পিছতে অভিযুক্ত হোমগাৰ্ডজনে নিজেই ১১২ নম্বৰত ফোন কৰি আৰক্ষীক খবৰ দিয়ে। পৰৱৰ্তী সময়ত ঘটনাস্থলীত উপস্থিত হোৱা আৰক্ষীয়ে তেওঁক গ্ৰেপ্তাৰ কৰে।
আৰক্ষীৰ প্ৰাথমিক তদন্তত পৰিয়ালটোত দীৰ্ঘদিন ধৰি পাৰিবাৰিক অশান্তি চলি থকাৰ কথা পোহৰলৈ আহিছে। আৰক্ষীৰ মতে, ৰবীন্দ্ৰ শংকৰ গুপ্তাৰ সৈতে পত্নীৰ প্ৰায়ে গৃহকন্দল হৈছিল। কিছুদিন পূৰ্বে স্বামীৰ সৈতে হোৱা বিবাদৰ পিছত পত্নী শ্যামা দুলাৰীয়ে গহনা লৈ ঘৰ এৰি গৈছিল। ইয়াৰ পিছত ৰবীন্দ্ৰই থানাত তেওঁৰ নিৰুদ্দেশ সম্পৰ্কে এক গোচৰো ৰুজু কৰিছিল। অৱশ্যে কেইদিনমান পিছত শ্যামা পুনৰ ঘৰলৈ উভতি আহে।
আনহাতে, কন্যা পূজা চাহুৰ ব্যক্তিগত জীৱনক লৈও পৰিয়ালটোত অশান্তি চলি থকাৰ অভিযোগ উত্থাপন হৈছে। ২০১৭ চনত পূজাৰ প্ৰথম বিৱাহ হৈছিল। প্ৰথম স্বামীৰ সৈতে বিৱাহ বিচ্ছেদ হোৱাৰ পিছত ২০২২ চনত তেওঁ পুনৰ বিৱাহপাশত আবদ্ধ হয়। কিন্তু দ্বিতীয় বিৱাহো বিচ্ছেদত অন্ত পৰাত পূজা পিতৃৰ ঘৰতে বাস কৰিছিল।
পৰিয়ালৰ লোক আৰু ওচৰ-চুবুৰীয়াৰ ভাষ্য অনুসৰি, পূজাৰ আন পুৰুষৰ সৈতে কথা-বতৰা পতাৰ বিষয়ক লৈও পিতৃৰ সৈতে মতানৈক্য হৈছিল। ইয়াৰ ফলত ঘৰখনত প্ৰায়ে কাজিয়াৰ পৰিৱেশ সৃষ্টি হৈছিল বুলি জানিব পৰা গৈছে। অৱশ্যে এই পাৰিবাৰিক বিবাদেই হ*ত্যাকাণ্ডৰ প্ৰকৃত কাৰণ নেকি, সেয়া আৰক্ষীৰ তদন্তৰ পিছতহে স্পষ্ট হ’ব।
ডাবল মাৰ্ডাৰৰ খবৰ লাভ কৰাৰ পিছতে আৰক্ষীৰ উচ্চপদস্থ বিষয়াসকল ঘটনাস্থলীত উপস্থিত হয়। তদন্তৰ বাবে ফিল্ড ইউনিট আৰু ফৰেনছিক বিশেষজ্ঞৰ দলো ঘটনাস্থলীত উপস্থিত হয়। দলটোৱে ঘটনাস্থলীৰ পৰা আঙুলিৰ ছাপ, হ*ত্যাকাণ্ডত ব্যৱহাৰ কৰা বুলি সন্দেহ কৰা ডাটা কেবল আৰু অন্যান্য গুৰুত্বপূৰ্ণ প্ৰমাণ সংগ্ৰহ কৰে। ইয়াৰ পিছতে আৰক্ষীয়ে দুয়োগৰাকী মহিলাৰ মৃ*তদেহৰ প্ৰয়োজনীয় আইনী প্ৰক্ৰিয়া সম্পন্ন কৰি মৰণোত্তৰ পৰীক্ষাৰ বাবে প্ৰেৰণ কৰে।
আৰক্ষীৰ এগৰাকী বিষয়াৰ তথ্য অনুসৰি, নি*হত মহিলাগৰাকীৰ জ্যেষ্ঠ কন্যাই দাখিল কৰা লিখিত এজাহাৰৰ ভিত্তিত অভিযুক্ত ৰবীন্দ্ৰ শংকৰ গুপ্তাৰ বিৰুদ্ধে হ*ত্যাৰ গোচৰ ৰুজু কৰা হৈছে। বৰ্তমান আৰক্ষীয়ে অভিযুক্তক জিম্মাত লৈ জেৰা অব্যাহত ৰাখিছে। হ*ত্যাকাণ্ডৰ আঁৰৰ প্ৰকৃত কাৰণ, পাৰিবাৰিক বিবাদৰ সৈতে ঘটনাটোৰ সম্পৰ্ক আৰু আন কোনো কাৰকে এই ঘটনাত ভূমিকা লৈছিল নেকি, সেই সকলো দিশ তদন্ত কৰি থকা হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
