বাংলাদেশৰ ৰাজধানী ঢাকাৰ উত্তৰা ছেক্টৰ-১২ আৰু ইয়াৰ কাষৰীয়া টেকপাৰা অঞ্চলত একাংশ চীনা নাগৰিকৰ লাইভষ্ট্ৰিমিঙক লৈ সৃষ্টি হৈছে বিতৰ্ক। কেইবামাহ ধৰি এই অঞ্চলৰ বিভিন্ন ৰাস্তা-ঘাট আৰু গলিত চীনা নাগৰিকে লাইভ ভিডিঅ’ প্ৰস্তুত কৰি আহিছে। কিন্তু এই লাইভষ্ট্ৰিমিঙৰ সময়ত একাংশই ঢাকাৰ এই অঞ্চলটোক ভাৰতৰ ৰাজধানী নতুন দিল্লী বুলি পৰিচয় কৰাই দিয়াৰ অভিযোগ উত্থাপন হৈছে। বাংলাদেশৰ সংবাদমাধ্যম ‘প্ৰথম আলো’ৰ এক প্ৰতিবেদনত এই তথ্য প্ৰকাশ পাইছে।
ঢাকাত ১৫০ৰো অধিক চীনা নাগৰিকৰ লাইভষ্ট্ৰিমিং
প্ৰথম আলোৰ প্ৰতিবেদন অনুসৰি, ঢাকাৰ উত্তৰা ছেক্টৰ-১২ আৰু টেকপাৰা অঞ্চলত বহু চীনা নাগৰিকে নিয়মিতভাৱে লাইভষ্ট্ৰিমিং কৰি আহিছে। স্থানীয় বাসিন্দাসকলৰ অনুমান অনুসৰি, অঞ্চলটোত ১৫০ৰো অধিক চীনা নাগৰিকে বিভিন্ন সময়ত লাইভ ভিডিঅ’ প্ৰস্তুত কৰে। তেওঁলোকে পুৱাৰ পৰা নিশালৈকে অঞ্চলটোৰ ৰাস্তাৰ লগতে সৰু সৰু গলিসমূহত কেমেৰা লৈ ঘূৰি ফুৰে আৰু ভিডিঅ’ প্ৰচাৰ কৰে। অৱশ্যে, এই কামত প্ৰকৃততে কিমানজন চীনা নাগৰিক জড়িত হৈ আছে, তাৰ কোনো চৰকাৰী হিচাপ প্ৰকাশ পোৱা নাই। স্থানীয় লোকৰ অনুমানৰ ভিত্তিতেই এই সংখ্যা উল্লেখ কৰা হৈছে।
বাংলাদেশৰ অঞ্চলক নতুন দিল্লী বুলি পৰিচয়!
এই ঘটনাৰ আটাইতকৈ বিতৰ্কিত দিশটো হৈছে, একাংশ চীনা লাইভষ্ট্ৰিমাৰে বাংলাদেশৰ ঢাকাৰ উত্তৰা অঞ্চলত থাকিও ইয়াক ভাৰতৰ নতুন দিল্লী বুলি দৰ্শকৰ আগত উপস্থাপন কৰিছে। প্ৰতিবেদন অনুসৰি, কেইবাটাও লাইভষ্ট্ৰিমিঙৰ বক্তব্য চীনা ভাষা জনা বাংলাদেশৰ চাৰিজন ব্যক্তিয়ে পৰীক্ষা আৰু অনুবাদ কৰিছিল। তেওঁলোকৰ পৰীক্ষাত দেখা গৈছে যে উত্তৰা অঞ্চলত ভিডিঅ’ প্ৰস্তুত কৰি থকা একাংশ লাইভষ্ট্ৰিমাৰে সেই স্থানক নতুন দিল্লী বুলি উল্লেখ কৰিছিল।
১ নৱেম্বৰত ‘মিয়ানমিয়ান’ (Mianmian) নামৰ এগৰাকী মহিলা লাইভষ্ট্ৰিমাৰে ভিডিঅ’ৰ মাজতে “এইখন নতুন দিল্লী” বুলি মন্তব্য কৰা বুলি প্ৰতিবেদনত উল্লেখ কৰা হৈছে। এইদৰে বাংলাদেশৰ এটা অঞ্চলক ভাৰতৰ ৰাজধানী বুলি পৰিচয় কৰাই দিয়াৰ ঘটনাই স্বাভাৱিকতে প্ৰশ্নৰ সৃষ্টি কৰিছে। অৱশ্যে, এই কাৰ্যৰ আঁৰত কোনো সুসংগঠিত পৰিকল্পনা আছে নে নাই, সেই বিষয়ে প্ৰতিবেদনত নিশ্চিত তথ্য প্ৰকাশ কৰা হোৱা নাই।
বাংলাদেশৰ লোক আৰু খাদ্যক লৈও অপমানজনক মন্তব্য
লাইভষ্ট্ৰিমিঙৰ সময়ত একাংশ চীনা নাগৰিকে বাংলাদেশৰ স্থানীয় লোক আৰু তেওঁলোকৰ জীৱন-যাপনক লৈও অপমানজনক মন্তব্য কৰা বুলি অভিযোগ উঠিছে। ‘ৱাং ৱেই’ (Wang Wei) নামৰ এজন লাইভষ্ট্ৰিমাৰে টেকপাৰা অঞ্চলৰ দোকানত বিক্ৰী হোৱা চাহৰ বিষয়ে অৱমাননাসূচক মন্তব্য কৰা বুলি প্ৰতিবেদনত উল্লেখ কৰা হৈছে। আন একাংশ লাইভষ্ট্ৰিমাৰে বাংলাদেশৰ লোকসকলক দৰিদ্ৰ বুলি বৰ্ণনা কৰাৰ লগতে তেওঁলোকৰ বসবাসৰ পৰিৱেশ অপৰিষ্কাৰ বুলিও মন্তব্য কৰা বুলি অভিযোগ উত্থাপন হৈছে। এই মন্তব্যসমূহৰ ফলত বাংলাদেশৰ স্থানীয় লোকসকলৰ সামাজিক পৰিৱেশ আৰু জীৱন-যাপনক লৈ একাংশ বিদেশী লাইভষ্ট্ৰিমাৰৰ দৃষ্টিভংগী সন্দৰ্ভত বিতৰ্কৰ সৃষ্টি হৈছে।
কিয় লাইভষ্ট্ৰিমিং কৰিছে চীনা নাগৰিকসকলে?
প্ৰথম আলোৰ প্ৰতিবেদন অনুসৰি, ‘ফাংইউ’ (Fangyou) নামৰ এজন লাইভষ্ট্ৰিমাৰে সংবাদমাধ্যমটোক জনাইছিল যে তেওঁলোকে WeChat নামৰ সামাজিক যোগাযোগ মাধ্যমত সামগ্ৰীৰ প্ৰচাৰৰ উদ্দেশ্যে লাইভষ্ট্ৰিমিং কৰে। কিন্তু লাইভষ্ট্ৰিমিংৰ উদ্দেশ্য, স্থানৰ পৰিচয় আৰু বিভিন্ন বিতৰ্কিত মন্তব্য সন্দৰ্ভত অধিক প্ৰশ্ন কৰা হ’লেও তেওঁ কোনো অতিৰিক্ত তথ্য প্ৰকাশ কৰিবলৈ আগ্ৰহী হোৱা নাছিল। প্ৰতিবেদনত কিমানজন লাইভষ্ট্ৰিমাৰে বাংলাদেশৰ অঞ্চলটোক নতুন দিল্লী বুলি উল্লেখ কৰিছে, তাৰ নিৰ্দিষ্ট সংখ্যা দিয়া হোৱা নাই।
ঘটনাটোৱে সৃষ্টি কৰিছে কেইবাটাও প্ৰশ্ন
ঢাকাৰ উত্তৰা আৰু টেকপাৰা অঞ্চলত চীনা নাগৰিকৰ ব্যাপক লাইভষ্ট্ৰিমিঙৰ ঘটনাই কেইবাটাও গুৰুত্বপূৰ্ণ প্ৰশ্নৰ অৱতাৰণা কৰিছে। বিদেশী নাগৰিকে বাংলাদেশৰ এটা অঞ্চলত দীৰ্ঘদিন ধৰি লাইভষ্ট্ৰিমিং কৰি থকাৰ উদ্দেশ্য কি? তেওঁলোকে কিয় অঞ্চলটোক ভাৰতৰ নতুন দিল্লী বুলি পৰিচয় কৰাই দিছে? স্থানীয় লোকৰ জীৱন-যাপনক লৈ অপমানজনক মন্তব্য কৰাৰ আঁৰত কি কাৰণ আছে? এই প্ৰশ্নসমূহৰ উত্তৰ এতিয়াও স্পষ্ট হোৱা নাই। প্ৰথম আলোৰ প্ৰতিবেদনত প্ৰকাশ পোৱা তথ্যসমূহৰ ভিত্তিত ঘটনাটোক লৈ বিতৰ্কৰ সৃষ্টি হৈছে যদিও, ইয়াৰ আঁৰত কোনো বৃহৎ ষড়যন্ত্ৰ বা সংগঠিত পৰিকল্পনা আছে বুলি নিশ্চিতভাৱে ক’ব পৰা নাযায়।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
