মহাৰাষ্ট্ৰৰ ছত্ৰপতি সম্ভাজীনগৰত সম্প্ৰতি এক হৃদয়স্পৰ্শী ঘটনাৰ সাক্ষী হৈছে এখন স্বৰ্ণালংকাৰৰ দোকান৷ ৯৩ বছৰীয়া এজন ককা নিভৃত্তি শিণ্ডেই বগা ধুতি কুৰ্তা আৰু মূৰত টুপি পৰিধান কৰি পত্নী শান্তাবাইক লৈ এখন গহনাৰ দোকানলৈ আহিছে৷ উদ্দেশ্য প্ৰিয়তমা পত্নীৰ বাবে এডাল মঙ্গলসূত্ৰ ক্ৰয় কৰা৷
প্ৰথমে দোকানৰ কৰ্মীগৰাকীয়ে ভাৱে যে এই বয়স্ক দম্পতিয়ে সাহায্য বিচাৰি গহনালয়লৈ আহিছে৷ কিন্তু শিণ্ডে ককাই কয় যে তেওঁ পত্নীৰ বাবে এডাল মঙ্গলসূত্ৰ ক্ৰয় কৰিবলৈ আহিছে৷ ককাৰ এই কথাত আৱেগিকো হৈ পৰে দোকানৰগৰাকী৷ এই দম্পতিৰ ঘৰ জালনা জিলাৰ আমভোৰা জাহাগিৰ গাওঁত৷ তেওঁলোকে খোজ কাঢ়ি কাঢ়ি তীৰ্থভ্ৰমণো কৰি আছে৷ তেওঁলোকে আহাৰী একাদশী উৎসৱত অংশগ্ৰহণ কৰিবলৈ খোজেৰেই যাত্ৰা কৰি আছে৷ স্থানীয় লোকৰ ওচৰত তেওঁলোকৰ যুঁটিটো খুবেই পৰিচিত৷ কাৰণ দুয়ো সদায়ে এজনে আনজনৰ কান্ধত কান্ধ মিলাই চলি থকা সকলোৱে প্ৰত্যক্ষও কৰি আহিছে৷ য’লৈকে যাত্ৰা নকৰক কিয় দুয়ো সদায়ে একেলগে থাকে৷
https://www.instagram.com/reel/DK7R-XJzC2g/?utm_source=ig_web_copy_link
শেহতীয়াকৈ গহনা কিনিবলৈ গৈ ককাৰ কাহিনী ভাইৰেল হৈছে নেটমাধ্যমত৷ দোকানখনত পত্নীৰ বাবে মঙ্গলসূত্ৰ পছন্দ কৰি ককাই দোকানৰ গৰাকীক সাঁচতীয়া ১১২০ টকা দিয়ে৷ এই ধনেৰে তেওঁক মঙ্গলসূত্ৰ দিব লাগে৷ দোকানৰ গৰাকীয়ে প্ৰথমে স্তম্বিত হৈ পৰে৷ দোকানীজনে কয়, ‘এনে প্ৰেম আজিৰ দিনত খুবেই বিৰল৷ মই কেৱল ২০ টকা গ্ৰহণ কৰি তেওঁলোকক সেই সোণৰ মঙ্গলসূত্ৰটো দিলো৷ কেৱল তেওঁৰ পৰা অকণমান আশীৰ্বাদ বিচাৰিলো৷’
ভাইৰেল ভিডিঅ’টোক লৈ এতিয়া নেটিজেনে কৰিছে বিভিন্ন মন্তব্য৷ বহুজনেই প্ৰশংসাৰে উপচাই পেলাইছে দোকানীজনক৷ এই উদাৰতা আজিৰ দিনত খুবেই বিৰল৷ এই ধৰণৰ মানুহ এতিয়াও আছে বাবেই পৃথিৱী ইমান সুন্দৰ বুলিও লিখিছে এজন ব্যৱহাৰকাৰীয়ে৷
গাওঁৰ লোকজনে জনায়, দম্পতিৰ এগৰাকী পুত্ৰও আছে৷ তেওঁলোকৰ অধিকাংশ ক্ষেত্ৰত নিজৰ উপাৰ্জন পথৰ মানুহৰ সহানুভূতিৰ ওপৰত নিৰ্ভৰ কৰে৷ তেওঁলোকৰ প্ৰেম আৰু আত্মনিৰ্ভৰতা এতিয়া সকলোৰে প্ৰেৰণাৰ উৎস হৈ পৰিছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
