হাস্পতালৰ এটা ভুলৰ বাবেই প্ৰাণ গৈছিল অমৰেশ পুৰীৰ, পূৰ্বেই জানিছিল অন্তিম সময় সমাগত
ভাৰতীয় চিনেমাৰ এগৰাকী এনে অভিনেতা যাৰ বিষয়ে আজিও ক’লে পোনেই মনলৈ আহে শক্তিশালী কণ্ঠ আৰু সুদক্ষ অভিনয়। লগতে আহে মোগেম্বো খুচ হোৱা ডায়েলগ। হয়, সেই অভিনেতাগৰাকীৰেই কথা কোৱা হৈছে। যাৰ প্ৰতিটো চৰিত্ৰই আজিৰ তাৰিখতো বিশেষ। অমৰেশ পুৰী।
হিন্দী চিনেমাৰ শ্ৰেষ্ঠ আৰু ভয়ংকৰ খলনায়কৰ কথা যেতিয়াই হয়, তেতিয়াই প্ৰথমে মনলৈ আহে প্ৰবীণ তথা প্ৰয়াত অভিনেতা অমৰেশ পুৰীৰ নাম। বলীউডৰ ইতিহাসত অমৰেশ পুৰীৰ দৰে আন কোনো খলনায়ক নাই।
অমৰেশ পুৰীয়ে নিজৰ উপস্থিতিৰে নায়ককো দুৰ্বল কৰি চুলিছিল চিনেমাত। অমৃশ পুৰী চাহাবে নিজৰ ওখ শৰীৰ, শক্তিশালী কণ্ঠ আৰু আচৰিত অভিনয়েৰে সকলোৰে হৃদয় জয় কৰিছিল।
সদ্যহতে অমৰেশ পুৰীৰ পুত্ৰ ৰাজীৱ পুৰীয়ে দিয়া সাক্ষাৎকাৰত পিতৃৰ শেষ দিনৰ কাহিনী বৰ্ণনা কৰিছে। ফিল্মফেয়াৰক দিয়া এক সাক্ষাৎকাৰত ৰাজীৱ পুৰীয়ে পিতৃ অমৰেশ পুৰীৰ বিষয়ে কয় যে, ‘২০০৩ চনত হিমাচল প্ৰদেশত গুদ্দু ধনোয়াৰ ছবি ‘জাল: দ্য ট্ৰেপ’ৰ শ্বুটিং চলি আছিল। অমৰেশ পুৰীৰ দুৰ্ঘটনা তাতেই সংঘটিত হয়।
সেই শ্বুটিঙতেই অতি গুৰুতৰভাৱে আঘাতপ্ৰাপ্ত হৈছিল পুৰী চাহাব। মুখমণ্ডল আৰু চকুৰ আঘাতৰ লগতে বহু ৰক্ত ক্ষৰণো হৈছিল। লগে লগে চিকিৎসালয়লৈ লৈ যোৱা হৈছিল। তাতেই চিকিৎসকে তেওঁক তেজৰ প্ৰয়োজন বুলি কয়।
তেজ দিয়াও হৈছিল যদিও সেই সময়ছোৱাত হাস্পতালৰ কিবা এটা ভুল হৈছিল যাৰ কাৰণে পাছলৈ অমৰেশ পুৰীৰ তেজৰ লগত জড়িত ৰোগ মাইলোডিছপ্লাষ্টিক চিনড্ৰম হৈছিল।
এই ঘটনাৰ পিছতেই অমৰেশ পুৰীয়ে নিজেই উপলব্ধি কৰিছিল মৃত্যু সমাগত। লাহে লাহে ৰক্তহীনতা হ’বলৈ ধৰিছিল অভিনেতাগৰাকীৰ। কিন্তু তেওঁৰ ইচ্ছাশক্তি দৃঢ় আছিল
অসুস্থতাৰ সময়তো অমৰেশ পুৰীয়ে বহু ছবিৰ শ্বুটিং কৰিছিল। ‘কাচ্চি চড়ক’, ‘মুঝছে ছাদি কৰোগী’, ‘হলচল’ আৰু ‘এটৰাজ’ৰ দৰে ছবি কৰিছিল। পুত্ৰ ৰাজীৱৰ মতে, অসুস্থতাৰ মাজতো ২০০৪ চনৰ ভিতৰত সকলো ছবিৰ কাম সম্পূৰ্ণ কৰিছিল। পিছত অমৰেশ পুৰীৰ মগজুৰ ৰক্তক্ষৰণ হয় আৰু ২০০৫ চনত তেখেতৰ মৃত্যু হয়।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
