অসম লাইভ২৪ঃ ED ৰ জিম্মাৰ পৰা সোমবাৰে দিল্লীৰ মুখ্যমন্ত্ৰী তথা আম আদমি পাৰ্টীৰ নেতা অৰবিন্দ কেজৰিৱালক আদালতত হাজিৰ কৰোৱা হয়। আদালতত হাজিৰ কৰোৱাৰ পাছতেই নিজৰ জিম্মাৰ পৰা কাৰাগাৰলৈ পঠিওৱাৰ বাবে আবেদন জনাই। সেই আবেদন মঞ্জুৰ কৰিছে আদালতে। আগন্তুক ১৫ এপ্ৰিল পৰ্যন্ত দিল্লীৰ মুখ্যমন্ত্ৰী তথা আপ প্ৰধান কেজৰিৱালৰ নতুন ঠিকনা হৈ পৰিল তিহাৰ জে’ল।
সোমবাৰে কেজৰিৱালক আদালতলৈ অনাৰ সময়তে ৰাষ্ট্ৰীয় সংবাদ মাধ্যমৰ সন্মুখত আপ প্ৰধান তথা দিল্লীৰ মুখ্যমন্ত্ৰী কেজৰিৱালে কেৱল এটা মন্তব্যই দাঙি ধৰে। তেওঁ কয়, ‘প্রধানমন্ত্ৰী নৰেন্দ্ৰ মোদীয়ে যি কৰিছে সেয়া দেশৰ বাবে ভাল নহয়।’ দিল্লীৰ ৰাউছ এভিনিউ আদালতৰ নিৰ্দেশতেই EDৰ জিম্মাত আছিল কেজৰিৱাল। সোমবাৰে সেই ম্যাদ শেষ হৈছে। ম্যাদ শেষ হোৱাৰ পাছতেই আদালতত হাজিৰ কৰোৱা হয় কেজৰিৱালক। কেজৰিৱাল আদালতত উপস্থিত থকাৰ সময়তে কেজৰিৱালৰ পত্নী সুনীতাও আদালতত উপস্থিত আছিল। ইয়াৰোপৰি আদালতত উপস্থিত হৈছিল দিল্লীৰ দুই মন্ত্ৰী অতিশী মাৰলেনা আৰু সৌৰভ ভৰদ্বাজ।
আদালতত ইডিৰ তৰফৰ পৰা জনোৱা হয় যে, কেজৰীৱালে তদন্তত সহযোগিতা কৰা নাই। বহু প্ৰশ্নৰ উত্তৰ দিবলৈকে তেওঁ ৰাজী নহয়। আনকি তেওঁৰ মোবাইলৰ পাছৱৰ্ডো এতিয়ালৈকে দিয়া নাই। ইয়াৰোপৰি ইডিয়ে আদালতত জনোৱা অনুসৰি কেজৰিৱালৰ শাৰীৰিক অৱস্থাৰ কথা ভাৱিয়েই তেওঁৰ স্বাস্থ্য পৰীক্ষাও কৰা হৈছে। প্ৰয়োজনীয় ঔষধো তেওঁক যোগান ধৰা হৈছে।
অন্য হাতে আজিৰে পৰা আৰম্ভ হোৱা কেজৰিৱালৰ কাৰাগাৰ যাত্ৰাত তেওঁ লগত কি কি লৈ যাব পাৰিব সেই সম্পৰ্কে তেওঁৰ অধিবক্তাই জনাইছে কেইবাটাও কথা। আদালতত তেওঁৰ অধিবক্তাই কৰা আৰ্জিমতে কেজৰিৱালক কাৰাগাৰলৈ গ্ৰন্থ লৈ যাবলৈ অনুমতি দিব লাগে। কেজৰিৱালে কাৰাগাৰলৈ তিনিখন গ্ৰন্থ লৈ যাব বিচাৰিছে। সেই বিশেষ গ্ৰন্থ কেইখন হৈছে ভাগৱত গীতা, ৰামায়ণ আৰু সাংবাদিক নীৰজা চৌধুৰীয়ে প্ৰধানমন্ত্ৰী সম্পৰ্কে লিখা এখন গ্ৰন্থ।
ইফালে কেজৰিৱালক গ্ৰেপ্তাৰ কৰা বিষয়টোক এতিয়াও বেআইনী বুলিয়েই দাবী কৰি আছে আপে। একেই সুৰ কেজৰিৱালৰ নিজৰো। তেওঁৰ অভিযোগ, ‘এয়া এক দুৰ্নীতি। এই দুৰ্নীতিৰ আঁৰত EDৰ দুটা উদ্দেশ্য। এক, আপৰ পুলিয়ে-পোখাই উভালি পেলোৱা। দুই, বিজেপিৰ হৈ কাম কৰা।’
উল্লেখ্য যে আৱকাৰি দুৰ্নীতিৰ গোচৰত বিগত ২১ মাৰ্চত কেজৰিৱালক গ্ৰেপ্তাৰ কৰিছে কেন্দ্ৰীয় সংস্থা EDয়ে। ইয়াৰ পূৰ্বে এই গোচৰৰ বাবে সোধপোছ কৰিবলৈ ৯বাৰ কেজৰিৱাললৈ চমন পঠিওৱা হৈছিল। কিন্তু তেওঁ প্ৰতিবাৰেই হাজিৰ হোৱাৰ পৰা বিৰত আছিল। বিগত ২১ মাৰ্চ আছিল নৱমবাৰ হাজিৰ হোৱাৰ দিন। EDৰ কাৰ্যালয়লৈ নগৈ সেইদিনা উচ্চ ন্যায়ালয়লৈ গৈছিল কেজৰিৱাল। ৰক্ষাকৱছৰ আৱেদন জনাইছিল দিল্লীৰ মুখ্যমন্ত্ৰী কেজৰিৱালে। কিন্তু উচ্চ ন্যায়ালয়ে সেয়া খাৰিজ কৰে। তাৰপাছতেই সেই দিনা নিশাই দিল্লীৰ মুখ্যমন্ত্ৰী ভৱনলৈ যায় কেন্দ্ৰীয় সংস্থা EDৰ কেইবাগৰাকীও বিষয়া। প্ৰায় ২ঘণ্টা ধৰি কৰা তালাচিৰ অন্তত তেওঁক গ্ৰেপ্তাৰ কৰা হয়।
দেশৰ ইতিহাসত কেজৰিৱালেই প্ৰথম মুখ্যমন্ত্ৰী যাব মুখ্যমন্ত্ৰী হৈ থকা অৱস্থাতেই গ্ৰেপ্তাৰ কৰা হৈছে। তেওঁক গ্ৰেপ্তাৰ কৰাৰ পাছতেই দিল্লীৰ শাসকদল আপৰ তৰফৰ পৰা জনোৱা হয় যে গ্ৰেপ্তাৰ হ’লেও কেজৰীৱালে পদত্যাগ কৰা নাই। তেওঁ EDৰ জিম্মাৰ পৰাই মুখ্যমন্ত্ৰীৰ সকলো দায়িত্ব পালন কৰিব। ইডিৰ জিম্মাৰ পৰাই তেওঁ দিল্লীৰ মন্ত্ৰীসকলক বিভিন্ন নিৰ্দেশো দি আছে। এই সন্দৰ্ভত গ্ৰেপ্তাৰৰ পাছতেই কেজৰিৱালে কৈছিল, ‘মই কাৰাগাৰত থাকো, বা কাৰাগাৰৰ বাহিৰত থাকো মোৰ হৃদয় সকলো সময়তে দেশৰ বাবেই নিয়োজিত হৈ থাকিব।’ কিন্তু আজিৰ দিনটোত কেজৰিৱালৰ কাৰাগাৰ যাত্ৰা নিশ্চিত হোৱাৰ পাছতেই EDয়ে কৰা দাবী অনুসৰি, ‘আৱকাৰি গোচৰৰ প্রধান নায়কেই হৈছে কেজৰিৱাল। তেওঁৰ বিৰুদ্ধে কেইবাটাও প্ৰমাণ আমাৰ হাতত আছে। আমি সেয়ে তেওঁক গ্ৰেপ্তাৰ কৰিছো।’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
