অসম লাইভ ২৪ঃ উচ্চ আৰু উচ্চতৰ মাধ্যমিকৰ বিভ্ৰান্তিমূলক মূল্যাংকন পদ্ধতি ঘোষণাৰ পাছতে ৰাজ্য চৰকাৰৰ আন এক নিৰ্দেশনাই বিমোৰত পেলাইছে ৰাজ্যৰ শিক্ষাৰ্থীসকলক। ৰাজ্য চৰকাৰৰ নিৰ্দেশনা অনুসৰি উচ্চ আৰু উচ্চতৰ মাধ্যমিকৰ পৰীক্ষাৰ নম্বৰ গ্ৰাহ্য নহয় চৰকাৰী নিযুক্তিত। শিক্ষক অথবা ৰাজ্য চৰকাৰৰ আন পদসমূহৰ বাবে অৱতীৰ্ণ হ’ব বিচাৰিলে পুনৰ বহিব লাগিব পৰীক্ষাত। ৰাজ্য চৰকাৰৰ এই শেহতীয়া নিৰ্দেশনাই স্বাভাৱিকতেই হতাশাজনক পৰিস্থিতিৰ সৃষ্টি কৰিছে পৰীক্ষাৰ্থী তথা অভিভাৱকসকলৰ মাজত। বৃহস্পতিবাৰে এক সংবাদমেল যোগে শিক্ষামন্ত্ৰী ৰণোজ পেগুৱে মেট্ৰিকৰ ফলাফলৰ বাবে ৪০+৪০+২০ ফৰ্মূলাৰ কথা ঘোষণা কৰে। ঠিক তেনেদৰে উচ্চতৰ মাধ্যমিকৰ ক্ষেত্ৰতো গ্ৰহণ কৰিব বিশেষ মূল্যায়ন পদ্ধতি। ৰাজ্যৰ কোভিডসৃষ্ট পৰিবেশৰ বাবেই এই বিকল্প মূল্যায়ন পদ্ধতি গ্ৰহণ কৰা হয় ৰাজ্যৰ শিক্ষাখণ্ডত। শিক্ষাৰ্থীসকলৰ যাতে এটা শিক্ষাবৰ্ষ লোকচান নহয়, কেৱল সেই উদ্দেশ্যৰেই বিকল্প মূল্যাংকন পদ্ধতি গ্ৰহণৰ কথা উল্লেখ কৰে শিক্ষামন্ত্ৰীয়ে। চৰকাৰী চাকৰিৰ বাবে তেওঁলোক পুনৰ পৰীক্ষাত বহিব লাগিব। শিক্ষামন্ত্ৰীৰ এই ঘোষণাৰ পাছতে ৰাজ্য চৰকাৰৰ এনে হঠকাৰী সিদ্ধান্ত বাতিল কৰিবলৈ দাবী উত্থাপন কৰিছে বিভিন্ন মহলে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
