ৰীল এতিয়া যেন কোনোবাখিনিত এক সামাজিক ব্যাধি। স্থান-কাল-পাত্ৰ সকলো পাহৰি একাংশ লোক এতিয়া ৰীল তৈয়াৰ কৰাত নতুবা ৰীল চোৱাত ব্যস্ত হৈ থকা দেখা যায়। এইবাৰ একাংশ আৰক্ষীকো দেখা গৈছে ৰীল বনাই সামাজিক মাধ্যমত জনপ্ৰিয়তা বুটলাৰ অনুশীলনত। ৰীলেই নহয় ইউটিউবত ভিডিঅ তৈয়াৰ কৰাটোকো এক পেছা হিচাপে লৈছে একাংশ আৰক্ষীয়ে।
আৰক্ষীতকৈ এগৰাকী ইউটিউবাৰ হিচাপে অধিক জনপ্ৰিয় এগৰাকী মহিলা কমাণ্ডো এইবাৰ ভিডিঅৰ বাবেই ৰোষত পৰিছে আৰক্ষীৰ। বীৰাংগনা পাপৰি কলিতা ইউটিউবত জনপ্ৰিয় কুঁহি নামেৰে। সেই কুঁহি ওৰফে পাপৰি পৰিছে আৰক্ষীৰ ৰোষত।বিভিন্ন ভিডিঅ’ আপলোড কৰি জনপ্ৰিয়তা অৰ্জন কৰা পাপৰি কলিতাক অসম আৰক্ষীৰ বীৰাংগনা কামাণ্ডোৰ পৰা নিলম্বন কৰা হৈছে৷ অনলাইন বেটিং এপৰ বিজ্ঞাপন প্ৰদান কৰা বাবে কামাণ্ডোগৰাকীক নিলম্বন কৰা হৈছে বুলি জানিব পৰা গৈছে৷
পাপৰি কলিতাক চাকৰিৰ পৰা নিলম্বিত কৰাৰ সন্দৰ্ভত অসম আৰক্ষীৰ সঞ্চালক প্ৰধান জি পি সিঙৰ মন্তব্য,’অসম আৰক্ষীত কৰ্তব্যৰত এগৰাকী মহিলা কৰ্মচাৰীয়ে তেওঁৰ অনলাইন সামাজিক মাধ্যমক ব্যৱসায়িকভাৱে ধন আহৰণৰ এক অচিলা হিচাপে ব্যৱহাৰ কৰাৰ তথ্য আমাৰ নিয়মীয়া নিৰীক্ষণত ধৰা পৰিছে৷ চৰকাৰী কৰ্মচাৰীৰ দ্বাৰা এনে ব্যৱসায়িক কাম-কাজ নিয়ম বিৰুদ্ধ আৰু এই কৰ্মচাৰীগৰাকীৰ এনে কাৰ্য প্ৰমাণিত হোৱাত তেওঁক তাৎক্ষণিকভাৱে নিলম্বিত কৰা হৈছে আৰু বিভাগীয় তদন্তৰ নিৰ্দেশ জাৰি কৰা হৈছে৷ আৰক্ষী বিভাগৰ লোকসকলক সামাজিক মাধ্যম ব্যৱহাৰৰ ক্ষেত্ৰত চৰকাৰী আৰু বিভাগীয় নিয়ম-নীতি মানি চলাৰ বাবে নিয়মীয়াকৈ সকীয়াই থকা হৈছে আৰু এনেধৰণৰ কাম-কাজত নিয়োজিত নহবলৈ নিৰ্দেশ দিয়া হৈছে৷’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
