অসম লাইভ ২৪: ৰাজ আতিথ্যতেই অসমত আছিল। ৰেডিছন ব্লুত অসমীয়াৰ আতিথ্য পাই মন নভৰিল এগৰাকী মহাৰাষ্ট্ৰৰ বিধায়কৰ। প্ৰহাৰ জনশক্তি পাৰ্টীৰ বিধায়ক বাচু কাডুয়ে অসমীয়া সমাজ জীৱনক লৈয়ে কৰিছে উপলুঙাসূচক মন্তব্য।
কেইমাহমান পূৰ্বে অসমলৈ আহিছিল মহাৰাষ্ট্ৰৰ কেইগৰাকীমান বিধায়ক। এইসকলৰ মাজতেই আছিল প্ৰহাৰ জনশক্তি পাৰ্টীৰ বিধায়ক বাচু কাডু । অসমৰ ৰেডিচন ব্লু হোটেলত অসমীয়া আতিথ্য লাভ কৰি যোৱা এইগৰাকী বিধায়ক মহাৰাষ্ট্ৰ বিধানসভাত অসমক লৈ কৰিছে এক অপমানজনক মন্তব্য। অসমৰ লোকে হেনো কুকুৰ ভক্ষণ কৰে আৰু মহাৰাষ্ট্ৰৰ পথৰ কুকুৰৰ সমস্যা দূৰ কৰিবলৈ কুকুৰবোৰ অসমলৈ পঠিয়াই দিয়াৰ ব্যৱস্থা কৰিব পাৰে বুলিও মন্তব্য আগবঢ়াই বিধায়কগৰাকীয়ে ।
উল্লেখ্য যে, মহাৰাষ্ট্ৰত তথা বিশেষকৈ মুম্বাইত মালিকবিহীন পথৰ কুকুৰ সমূহৰ উপদ্ৰৱ এতিয়াৰ নহয়। সততেই তেনে কুকুৰৰ আক্ৰমণৰ বলি হয় মহাৰাষ্ট্ৰৰ নাগৰিকসকল। কেৱল এয়াই নহয় বৰং মুম্বাই পৌৰ নিগমেও বছৰি এক গৰিষ্ঠসংখ্যক সময় আৰু টকা ব্যয় কৰিব লগীয়া হয় এই পদপথৰ কুকুৰৰ বাবে। যাৰ বাবে মহাৰাষ্ট্ৰৰ বিধানসভাত উত্থাপিত হৈছিল এই বিষয়টো। আৰু তাৰ পাছতেই বাচু কাডুৱে কৰে এই বিতৰ্কিত মন্তব্য।
উল্লেখ্য যে ৰাষ্ট্ৰীয় প্ৰেক্ষাপটত অসমক অপমাণিত কৰা এইয়াই প্ৰথম ঘটনা নহয়। ইয়াৰ পূৰ্বেও অসমক বহু লোকে ৰাষ্ট্ৰীয় পৰ্যায়ত অপমানিত কৰিছে। কিন্তু অসমত বহু দিন থাকি যোৱাৰ পিছতো অসম সম্পৰ্কে এনে তুলুঙা আৰু ভুল মন্তব্যই যে অসমক আৰু এবাৰ ভাৰতৰ সন্মুখত হেয় প্ৰতিপন্ন কৰিলে সেইয়া নিশ্চিত।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
