বাংলাদেশ জুৰি জাৰি কৰা হ’ল কাৰ্ফিউ৷ শুকুৰবাৰে নিশা এই কথা জনাইছে আওয়ামী লীগৰ সাধাৰণ সম্পাদক ৱায়দুল কাদেৰে৷ ইয়াৰোপৰি তেওঁ জনাইছে যে দেশজুৰি আইন শৃংখলা বজাই ৰাখিবলৈ সেনাবাহিনী নমোৱাৰো সিদ্ধান্ত লোৱা হৈছে৷ সংবাদ সংস্থা এএফপিয়ে প্ৰকাশ কৰা অনুসৰি স্থানীয় প্ৰশাসনক সহায় কৰাৰ ওপৰিও শান্তি আৰু আইনশৃংখলা বজায় ৰাখিবলৈ এতিয়া বাংলাদেশত সেনা নমোৱাৰ প্ৰয়োজনীয়তা আহি পৰিছে৷ শেখ হাছিনা চৰকাৰৰ প্ৰেছ সচিব নাইমুল ইছলাম খানে সংবাদ সংস্থা এএফপিক কয়, ‘চৰকাৰে কাৰ্ফিউ জাৰি কৰাৰ সিদ্ধান্ত লৈছে আৰু সেনা মোতায়েনো কৰা হৈছে৷’
কোটা সংস্কাৰৰ আন্দোলন ক্ৰমাৎ তীব্ৰতৰ হৈ উঠিছে বাংলাদেশত৷ হাছিনা চৰকাৰে আলোচনাত বহাৰ প্ৰস্তাৱ দিলেও সেয়া খাৰিজ কৰি দিছে আন্দোলনকাৰীয়ে৷ তেওঁলোকৰ মতে শেখ হাছিনাই পদত্যাগ কৰিব লাগে৷ আন্দোলৰ বাবেই সমগ্ৰ বাংলাদেশ জুৰি বন্ধ ৰখা হৈছে ট্ৰেইনৰ চলাচল৷ আন্দোলন নিয়ন্ত্ৰণ কৰিবলৈকে দেশত ইণ্টাৰনেট পৰিসেৱা বন্ধ ৰখা হৈছে৷
বৃহস্পতিবাৰৰ নিশাৰ পৰা বাংলাদেশত স্তব্ধ হৈ পৰিছে মোবাইল ইণ্টাৰনেট পৰিসেৱা৷ ৰাজধানী ঢাকাসহ সেই দেশৰ বিভিন্ন চহৰত এই সমস্যা হোৱা বুলি প্ৰকাশ কৰিছে বিবিচিয়ে৷ ইণ্টাৰনেট পৰিসেৱা ব্যাহত হোৱাৰ বিষয়টো স্বীকাৰ কৰি লৈছে বাংলাদেশৰ ডাক, টেলি যোগাযোগ আৰু তথ্যপ্ৰযুক্তি প্ৰতিমন্ত্ৰী জুনায়েদ আহমেদ পলকে৷ চৰকাৰী সূত্ৰই প্ৰকাশ কৰামতে গুজৱ এৰাবলৈকে বন্ধ কৰা হৈছে এইসমূহ সেৱা৷ মিছিল, সমাবেশতো নিষেধাজ্ঞা জাৰি কৰিছে আওয়ামী লীগ চৰকাৰে৷ কিন্তু ইমানতো বন্ধ হোৱা নাই আন্দোলন৷ এখনৰ পাছত আনখন জিলাত বাঢ়িব ধৰিছে বিদ্ৰোহ৷ জুই লগাই দিয়া হৈছে নৰছিংডি জিলাৰ এক সম্পূৰ্ণ অঞ্চলো৷
বাংলাদেশৰ সংবাদমাধ্যম প্ৰথম আলোত দাবী কৰা হৈছে যে, বৃহস্পতিবাৰে নিশা পৰ্যন্ত সেই দেশত আন্দোলনৰ জোৰত সংঘাতৰ বলি ২৭ জন৷ তেওঁলোকৰ মাজত ১৯গৰাকীৰেই মৃত্যু হৈছে৷ শুকুৰবাৰে আৰু তিনিগৰাকীৰ মৃত্যু হৈছে৷ তেওঁলোকৰ মাজৰ দুগৰাকীৰ পৰিচয় ইতিমধ্যে পোৱা গৈছে৷ তৃতীয়জনৰ পৰিচয় এতিয়াও অজ্ঞাত৷ সেই সংবাদমাধ্যমৰ দাবী যে বৰ্তমান পৰ্যন্ত বাংলাদেশত মৃত্যু হৈছে ৩০গৰাকী লোকৰ৷ অন্যহাতে সেই দেশৰ বিভিন্ন হাস্পতালৰ পৰা পৰিসংখ্যা সংগ্ৰহ কৰিছে সেই সংবাদ সংস্থাই৷ বাংলাদেশত শুকুৰবাৰৰ নিশা পৰ্যন্ত চৰকাৰ আৰু পঢ়ুৱৈৰ সংঘাতৰ ফলত ১০৫ গৰাকীৰ মৃত্যু হৈছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
