অপ্ৰকাশিত তথা সৰ্বজনবিদিত ভূপেন হাজৰিকাৰ সেই প্ৰেম কাহিনী, ৪৫ বৰ্ষীয় ভূপেনদাৰ প্ৰেমত পৰিছিল ১৭ বছৰীয়া…
ভাৰতৰত্ন, অসম ৰত্ন, পদ্মবিভূষণ, পদ্মভূষণ, পদ্মশ্ৰী, দাদাচাহেব ফাল্কে বঁটা, সংগীত নাটক একাডেমী আদি বঁটাৰে সন্মানিত ভাৰতৰ অন্যতম শ্ৰেষ্ঠ সংগীত শিল্পী ভূপেন হাজৰিকাৰ আজি ত্ৰয়োদশ মৃত্যুতিথি। ২০১১ চনত আজিৰ ৫ নৱেম্বৰ দিনটোতে ৮৫ বছৰ বয়সত মৃত্যু হৈছিল হাজৰিকাৰ।
তেখেতে নিজৰ অনন্য সুমধুৰ কণ্ঠৰে বহুদিন ধৰি লাখ লাখ সংগীতপ্ৰেমীৰ হৃদয় জয় কৰি ৰাখিছিল। অসমৰ লগতে হিন্দী চিনেমা আৰু সংগীতৰ প্ৰতি ভূপেন হাজৰিকাৰ অৱদান সদায় স্মৰণীয় হৈ আছে। ছবি আৰু সংগীতৰ উপৰিও ব্যক্তিগত জীৱনৰ বাবেও তেওঁ সদায়ে বাতৰিৰ শিৰোনাম দখল কৰিছিল। অভিনেত্ৰী কল্পনা লাজমীৰ সৈতে ভূপেন হাজৰিকাৰ প্ৰেম কাহিনীও অতি সুন্দৰ।
১৯৫০ চনত প্ৰিয়ম্বদা পেটেলৰ সৈতে প্ৰেম বিবাহ হৈছিল ভূপেন হাজৰিকাৰ। গুজৰাটৰ প্ৰিয়ম্বদাক এক অনুষ্ঠানত লগ পাইছিল ভূপেনদাই। প্ৰিয়ম্বদা পেটেল আছিল এগৰাকী নৃত্যশিল্পী। সেই প্ৰেমে ১৯৫০ চনত বিবাহৰ ৰূপ লয়। বিবাহৰ দুটা বছৰ পাছত ১৯৫২ চনতজন্ম পায় ভূপেন-প্ৰিয়ম্বদাৰ একমাত্ৰ সন্তান তেজপ্ৰতাপ হাজৰিকাৰ। কিন্তু সংসাৰত আউল লগাত ভূপেন হাজৰিকাক অকলে এৰি থৈ তেজৰ সৈতে আঁতৰি যায় পত্নী প্ৰিয়ম্বদা।
প্ৰিয়ম্বদাৰ সৈতে বিচ্ছেদৰ পাছতে ভূপেনদাই লিখিছিল- মই যেতিয়া এই মই যেতিয়া এই জীৱনৰ মায়া এৰি গুচি যাম,
আশাকৰো মোৰ চিতাৰ কাষত তোমাৰ সঁহাৰি পাম,
নেলাগে মোৰ সোঁৱৰণি সভা নেলাগে মিছা নাম,
তোমাৰ এটুপি চকুলো পালেই মই পাম মোৰ দাম। ….কিন্তু কোনোদিনে উভতি নাহে প্ৰিয়ম্বদা।
তাৰ পাছতে ৪৫ বছৰীয়া অকলশৰীয়া ভূপেনদাই লগ পাইছিল ১৭ বছৰীয়া কল্পনাক। ১৭ বছৰীয়া কল্পনা প্ৰেমত পৰিছিল ৪৫ বছৰীয়া ভূপেনদাৰ। কল্পনা লাজমীয়ে তেওঁৰ জীৱনী ‘ভূপেন হাজৰিকা: যিদৰে জানিছিলোঁ’ত ভূপেন হাজৰিকাৰ সৈতে তেওঁৰ প্ৰেম কাহিনী বিতংভাৱে বৰ্ণনা কৰিছে। য’ত কল্পনা লাজমীয়ে কৈছে যে তেওঁ আৰু ভূপেন হাজৰিকাই ইজনে সিজনৰ সংগী আৰু পথ প্ৰদৰ্শক হিচাপে প্ৰায় ৪০ বছৰ একেলগে বাস কৰিছিল। কল্পনা লাজমীৰ গ্ৰন্থ অনুসৰি ভূপেন হাজৰিকাক প্ৰথম লগ পাইছিল ১৭ বছৰ বয়সত, তেতিয়া প্ৰবীণ গায়িকাগৰাকীৰ বয়স আছিল ৪৫ বছৰ।
কল্পনাৰ সৈতে থাকিলেও কিন্তু কোনোদিনে কল্পনাৰ সৈতে বিবায় নবহিল ভূপেন হাজৰিকা। কল্পনা লাজমীয়েও সকলো মানি একেলগে থাকিও আঁতৰে আঁতৰে নিস্বাৰ্থ ভাৱে ভাল পাই থাকিল ভূপেনদাক।
কল্পনা লাজমীয়ে তেওঁৰ গ্ৰন্থত লিখিছে, ‘আমি প্ৰথম লগ পাইছিলো। সেই প্ৰথম সাক্ষাততে মই তেওঁক ভাল পাবলৈ ধৰিলোঁ। ৪০ বছৰৰ পাছতো যেতিয়া তেওঁৰ জীৱনৰ পোহৰ নিৰ্বাপিত হ’বলৈ ওলাইছিল তেতিয়াও ভূপেনদাৰ চকুত আমাৰ প্ৰথম লগ পোৱাৰ প্ৰতিফলন দেখিছিলো। যৌৱনৰ পৰা বৃদ্ধাৱস্থালৈকে আমাৰ জীৱনৰ এক অবিৰত যাত্ৰা আছিল পাৰস্পৰিক প্ৰেম আৰু আবেগ। আমাৰ জীৱনত বহুতো অধ্যায় আহিল। কিছুমান আমি লালন-পালন কৰিছিলোঁ আৰু কিছুমান আছিল যিবোৰ আমি পাহৰিব বিচাৰিছিলো।
কল্পনা লাজমীয়ে কিতাপখনত লিখিছে, ‘ভূপেন হাজৰিকাৰ সৈতে মোৰ প্ৰেম কাহিনী বেলেগ আছিল। ভূপেনদাৰ সৈতে ৪০ বছৰীয়া এক সুখী, ব্যক্তিগত আৰু অশান্ত যাত্ৰাই আমাৰ চৰিত্ৰসমূহৰ ওপৰত গভীৰ প্ৰভাৱ পেলাইছে। গ্ৰন্থখনৰ মতে, কল্পনা লাজমী আৰু ভূপেন হাজৰিকাৰ প্ৰথম সাক্ষাৎ হৈছিল গায়িকাগৰাকীৰ আত্মীয়ৰ ঘৰত। ইয়াৰ পিছত দুয়োজনে সঘনাই লগ হৈছিল। ভূপেন হাজৰিকাৰ মৃত্যুৰ পিছতো কল্পনা লাজমীয়ে ভূপেন হাজৰিকাৰ সংগীতৰ উত্তৰাধিকাৰ সংৰক্ষণ কৰি ৰাখিছিল।
সেই কল্পনাৰ সৈতেই জীৱনৰ অন্তিম মূহুৰ্ত পাৰ কৰিছিল ভূপেন হাজৰিকাই। অৱশ্যে মৃত্যুৰ পাছত পুত্ৰ তেজপ্ৰতাপ গুৱাহাটীলৈ আহি পুত্ৰ হিচাপে সকলো কৰ্তব্য সমাপন কৰি থৈ গৈছিল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
