অসম লাইভ ২৪ঃ বিকিনী, ঘূণঘট, জিনছ আৰু হিজাব কি পিন্ধে সেয়া মহিলাই নিজে নিৰ্ধাৰণ কৰিব৷ এই মন্তব্য কৰিছে কংগ্ৰেছ নেত্ৰী প্ৰিয়ংকা গান্ধী বাদ্ৰাই৷
কৰ্ণাটকৰ হিজাব বিতৰ্কই সমগ্ৰ দেশৰ ৰাজনীতি উত্তাল কৰি ৰখাৰ সময়তে মুখ খুলিছে কংগ্ৰেছ সাধাৰণ সম্পাদিকা প্ৰিয়ংকা গান্ধী বাদ্ৰাই৷
হিজাব বিতৰ্কৰ সন্দৰ্ভত মুখ খুলি কংগ্ৰেছ নেত্ৰী প্ৰিয়ংকা গান্ধীয়ে কয় যে মহিলাই কি পিন্ধিব তাৰ সিদ্ধান্ত লোৱাৰ অধিকাৰ কেৱল মহিলাৰ নিজৰহে আছে৷ প্ৰিয়ংকা গান্ধীয়ে লগতে কয় বিকিনী, ঘূণঘট, জিনছ আৰু হিজাব কি পিন্ধিব সেয়া মহিলাই নিজেই সিদ্ধান্ত লোৱাৰ অধিকাৰ সংবিধানেই দিছে৷
হেজষ্টেগ ব্যৱহাৰ কৰি ‘লড়কী হ্যুঁ লড় চক্টি হ্যুঁ’ বুলি উল্লেখ কৰি প্ৰিয়ংকা গান্ধীয়ে টুইট কৰি লগতে কয়, ‘‘এই অধিকাৰ ভাৰতৰ সংবিধানে দিছে৷ মহিলাৰ ওপৰত কৰা অত্যাচাৰ বন্ধ কৰক৷’’
ইফালে হিজাব বিতৰ্কই ক্ৰমাৎ ৰাজনৈতিক যুদ্ধলৈ পৰিণত হোৱা দেখা গৈছে৷ কংগ্ৰেছে দেশৰ সংবিধানৰ ধৰ্ম নিৰপেক্ষতাৰ দোহাই দি ইছলাম ধৰ্মাৱলম্বী শিক্ষাৰ্থীয়ে হিজাব পৰিধানৰ সমৰ্থনত থিয় দিলেও বিজেপিয়ে ইয়াৰ তীব্ৰ বিৰোধিতা কৰিছে৷ বিজেপিয় শিক্ষানুষ্ঠানসমূহত ইউনিফৰ্ম কেন্দ্ৰিক নিৰ্দেশনা কঠোৰভাৱে মানি চলিবই বুলি ঘোষণা কৰিছে৷ যাৰফলত হিজাব বিতৰ্কই সমগ্ৰ দেশজুৰি ক্ৰমাৎ গম্ভীৰ হৈ পৰিছে৷
উল্লেখ্য যে কৰ্ণাটকৰ এখন কলেজত ইছলাম ধৰ্মাৱলম্বী ছাত্ৰীক হিজাব পৰিধান কৰিবলৈ কৰ্তৃপক্ষই নিষিদ্ধ কৰাৰ পিছতে শিক্ষাৰ্থীসকলে কলেজ কৰ্তৃপক্ষৰ এই সিদ্ধান্তৰ বিৰুদ্ধে প্ৰতিবাদ সাৱ্যস্ত কৰে৷
প্ৰতিবাদী শিক্ষাৰ্থীসকলৰ ওপৰত আৰক্ষীয়ে জঁপিয়াই পৰাৰ পিছতে হিজাব বিতৰ্কই কেৱল কৰ্ণাটকতেই সীমাৱদ্ধ থকা নাই, এই বিতৰ্কই সমগ্ৰ দেশজুৰি উত্তাল হৈ পৰিছে৷
আনকি হিজাব বিতৰ্কই কৰ্ণাটক উচ্চ ন্যায়ালয়ৰ মজিয়া পায়গৈ৷ কৰ্ণাটক উচ্চ ন্যায়ালয়ে হিজাব বিতৰ্কৰ গম্ভীৰতালৈ লক্ষ্য কৰি ৰায় প্ৰদান কৰাৰ পৰিৱৰ্তে ৰাজ্যখনৰ শিক্ষানুষ্ঠানসমূহ তিনি দিনলৈ বন্ধ ৰখাৰহে নিৰ্দেশ দিয়ে৷
ইয়াৰ পিছতে হিজাব বিতৰ্কই দেশৰ পৰিক্ৰমা ভেদি আন্তঃৰাষ্ট্ৰীয় স্তৰতো মূৰ দাঙি উঠা দেখা গৈছে৷ ইতিমধ্যে শান্তিৰ নবেল বঁটা বিজয়ী মালালা ইউছুফজাই-এ প্ৰতিক্ৰিয়া ব্যক্ত কৰি কয় যে ভাৰতীয় নেতাসকলে মুছলমান মহিলাক সামাজিকভাৱে বৰ্জন কৰাটো বন্ধ কৰক৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
