২০২৬ চনৰ অসম বিধানসভা নিৰ্বাচনত মধ্য গুৱাহাটী সমষ্টিৰ পৰা বিজেপিৰ প্ৰাৰ্থী হিচাপে বিজয় কুমাৰ গুপ্তা নিৰ্বাচিত হৈছিল। ইয়াৰ পিছতে ইটোৰ পিছত সিটো বিতৰ্কমূলক মন্তব্য কৰি চৰ্চাত থাকে। এইবাৰ বিধায়কজনে জুবিন গাৰ্গকলৈ এনে এক মন্তব্য কৰিছে, যিয়ে সকলোকে আচৰিত কৰি তুলিছে।
জুবিন গাৰ্গৰ প্ৰথম মৃত্যু বাৰ্ষিকীত শিল্পীগৰাকীক সোঁৱৰি ক’লে, ‘জুবিন গাৰ্গৰ ভাৰতৰ ৪০টা ভাষাত ৩,০০০ৰো অধিক গীত গাইছিল। তেওঁ সংগীতৰ জগতত আলোড়নৰ সৃষ্টি কৰিছিল।’ ইয়াৰোপৰি জুবিন গাৰ্গৰ গানক লৈ বিভ্ৰান্তিৰ সৃষ্টি কৰা বিধায়ক বিজয় গুপ্তাই ‘মিছন চাইনা’ৰ সলনি চাইনা মিছন নামৰ এখন চিনেমাও বনাইছিল বুলি আজৱ মন্তব্য কৰে। ইয়াৰ পিছতে চৌদিশে মাথোঁ বিজয় গুপ্তাক ক্ষমা খোজাৰ দাবী উত্থাপন কৰে।
বিজেপিৰ বিধায়কজনৰ বিৰুদ্ধে বহুতো দল-সংগঠনে জাঙুৰ খাই উঠিছে। সকলোৱে কৈছে বিজয় গুপ্তাক ক্ষমা খুজিবলৈ। এই বিতৰ্কৰ মাজতে বীৰ লাচিত সেনাৰ নেতা শৃংখল চলিহাই দিছে হুংকাৰ। শৃংখল চলিহাই দাবী উত্থাপন কৰে যে শীঘ্ৰেই গ্ৰেপ্তাৰ কৰিব লাগে বিজেপি বিধায়ক বিজয় গুপ্তাক। এইদৰে জুবিন দাক লৈ তুচ্চ-তাচ্ছিল্য মন্তব্য গ্ৰহণ কৰা নহ’ব। মুখ্যমন্ত্ৰীয়ে বিজয় গুপ্তাক এৰেষ্ট কৰি এটা নজিৰ দেখুৱাওক।
বিজয় গুপ্তাক গ্ৰেপ্তাৰৰ দাবী জনাই পুনৰ কয় যে, বিজয় গুপ্তাৰ দৰে অনা অসমীয়াৰ আমাৰ ভাষা-সংস্কৃতিৰ প্ৰতি সন্মান নাই। বিজেপি-কংগ্ৰেছে অনা অসমীয়াক টিকট নিদিব। গুপ্তাৰ বিৰুদ্ধে তদন্ত কৰক,ক্ষমা নুখুজিলে ভয়ংকৰ প্ৰতিবাদ হ’ব।
বীৰ লাচিত সেনাৰ লগতে অসমৰ জনগণে কৰিব প্ৰতিবাদ।
উল্লেখ্য যে, বহু বিতৰ্কৰ পিছত বিধায়ক বিজয় গুপ্তাই সামাজিক মাধ্যমত ক্ষমা খোজে। তেওঁ সামাজিক মাধ্যমত লিখিছে যে, “জুবিন অসমৰ আত্মা। জুবিন অসমৰ হৃদস্পন্দন আৰু কোটি কোটি অসমীয়াৰ হৃদয়ৰ স্পন্দন। মোৰ ভুলৰ বাবে মই আন্তৰিকভাৱে ক্ষমা বিচাৰিছোঁ। অনিচ্ছাকৃতভাৱে মুখ ফচকি ৩০,০০০ৰ পৰিৱৰ্তে ৩,০০০ বুলি কৈ পেলাইছিলোঁ। এইটো সম্পূৰ্ণৰূপে অনিচ্ছাকৃত ভুল আছিল। মোৰ কথাত জুবিন দাৰ অগণন অনুৰাগীৰ মনত যি আঘাত লাগিছে, তাৰ বাবে মই গভীৰভাৱে দুঃখিত আৰু ক্ষমাপ্ৰাৰ্থী। তেওঁৰ ব্যক্তিত্বৰ সন্মুখত ৩০,০০০টা গীতেই হওক বা ৩ লাখ গীতেই হওক, সেয়া সূৰ্যৰ আগত চাকি দেখুওৱাৰ দৰে। তথাপিও , নিজৰ ভুল স্বীকাৰ কৰি ক্ষমা বিচৰা মোৰ চকুত বহু সন্মানৰ ! মই সদায় মোৰ প্ৰিয় ভাই জুবিনক গভীৰ সন্মান আৰু মৰমেৰে হৃদয়ত স্থান দি আহিছোঁ। অসমৰ লগতে অসমৰ বাহিৰতো জুবিন দাৰ প্ৰতি মানুহৰ কিমান গভীৰ ভালপোৱা আছে, সেই কথা মই বুজোঁ। সেয়েহে মোৰ অনিচ্ছাকৃত কথাই যদি আপোনালোকৰ অনুভূতিত আঘাত কৰিছে, তাৰ বাবে পুনৰ আন্তৰিকভাৱে ক্ষমা বিচাৰিছোঁ। মই প্ৰতিগৰাকী জুবিন অনুৰাগীক আশ্বাস দিব বিচাৰোঁ যে জুবিন দাৰ প্ৰতি মোৰ সন্মান আৰু ভালপোৱা সদায় আন্তৰিক। ময়ো জুবিনৰ সংগীতৰ এজন অনুৰাগী, আৰু তেওঁৰ অসাধাৰণ সৃষ্টিশীল উত্তৰাধিকাৰক সন্মান জনাই এনে কাম কৰিব বিচাৰোঁ, যিয়ে লাখ লাখ জুবিন অনুৰাগী আৰু আগন্তুক প্ৰজন্মক অনুপ্ৰাণিত কৰিব। জুবিন দাৰ বিশাল সংগীত-সম্ভাৰ সঠিকভাৱে সংৰক্ষণ, নথিভুক্ত আৰু আগন্তুক প্ৰজন্মৰ বাবে সহজলভ্য কৰি ৰখাটো আমাৰ দায়িত্ব বুলি মই বিশ্বাস কৰোঁ। এই দিশত মই কাম কৰিব বিচাৰোঁ যাতে তেওঁৰ সংগীতৰ সঠিক ডিজিটেল সংৰক্ষণ আৰু Spotify তথা অন্যান্য আধুনিক ষ্ট্ৰীমিং প্লেটফৰ্মত উপযুক্ত স্থান নিশ্চিত হয়। লগতে, তেওঁৰ পৰিয়ালে তেওঁৰ সংগীত, ঐতিহ্য আৰু সামাজিক কাম-কাজ আগুৱাই নিয়াত উপযুক্ত ভূমিকা লাভ কৰাটোও গুৰুত্বপূৰ্ণ। জুবিন দা কেৱল এজন ব্যক্তি নহয় – তেওঁ লাখ লাখ মানুহৰ হৃদয়ত বাস কৰে। তেওঁৰ সংগীত, মূল্যবোধ আৰু ঐতিহ্য প্ৰজন্মৰ পিছত প্ৰজন্ম জীয়াই থাকক – এয়াই মোৰ আন্তৰিক কামনা। জুবিন দা আৰু তেওঁৰ প্ৰতিগৰাকী অনুৰাগীৰ প্ৰতি গভীৰ সন্মান, মৰম আৰু আন্তৰিক শুভেচ্ছা।”
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
