বিবাহথলী হঠাৎ নিজম পৰিল৷ আনন্দবোৰ বিষাদলৈ ৰূপান্তৰ হৈ গ’ল৷ বৰযাত্ৰী কঢ়িয়াই নিয়া বাছ পৰিলগৈ ২০০ ফুট তলত৷ কমপক্ষেও ২৫-৩০গৰাকীকৈ যাত্ৰীৰ মৃত্যুৰ আশংকা কৰিছে প্ৰশাসনে৷ শুকুৰবাৰে নিশা দুৰ্ঘটনাটো সংঘটিত হৈছে৷ উত্তৰাখণ্ডৰ পাউৰি জিলাত এই দুৰ্ঘটনা৷ হৰিদ্বাৰৰ লালধাঙৰ পৰা পাউৰিৰ বিৰোনখাললৈ যাত্ৰা কৰিছিল বৰযাত্ৰীৰ দলটোৱে৷ দুৰ্ঘটনাত পতিত বাছখনত আছিল কমেও ৪০-৫০গৰাকী যাত্ৰী৷
শুকুৰবাৰে নিশা ৮মান বজাত সীমাণ্ডি গাওঁত এই দুৰ্ঘটনা সংঘটিত হৈছে৷ চালকে নিয়ন্ত্ৰণ হেৰুওৱাৰ ফলত গভীৰ খাদত পৰি যায় বাছখন৷ কইনা ঘৰৰ পৰা মাত্ৰ ২ কিঃমিঃ থকা অৱস্থাতেই এই দুৰ্ঘটনা সংঘটিত হৈছে৷ বাছখন খাদত পৰাৰ পাছতেই আহত যাত্ৰীৰ মাজত হোৱা আৰ্তনাদ শুনি লৱৰি আহে এলেকাটোৰ স্থানীয় বাসিন্দাসকল৷
দুৰ্ঘটনাৰ খবৰ লাভ কৰি স্থানীয় আৰক্ষী থানাৰ পুলিছ আৰু এছ ডি আৰ এফ টিমো সেই স্থানত উপস্থিত হয়৷ আহতসকলক উদ্ধাৰ কৰি স্থানীয় হাস্পতালত ভৰ্তি কৰোৱা হৈছে৷ কমপক্ষেও ২৫-৩০গৰাকী লোকৰ মৃত্যু হোৱাৰ আশংকা কৰিছে স্থানীয় লোকে৷ অৱশ্যে দুৰ্ঘটনাত মৃতকৰ সংখ্যাক লৈ কোনোধৰণৰ তথ্য প্ৰকাশ কৰা নাই প্ৰশাসনে৷ আৰক্ষীয়ে জনাইছে যে তেওঁলোকে দুৰ্ঘটনাক লৈ তদন্ত অব্যাহত ৰাখিছে৷ দুৰ্ঘটনা সংঘটিত হোৱা স্থানত উপস্থিত হৈছে উত্তৰাখণ্ড বিধানসভাৰ স্পিকাৰ ৰীতু খানডুবি৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ