LPG ৰ বিকল্প ইন্ধন হিচাপে দেশৰ সৰ্বত্ৰতে যাতে কেৰোচিন ব্যৱহাৰ সহয় হয় সেয়া নিশ্চিত কৰাৰ বাবে আগন্তুক দুমাহ দেশৰ সকলো পেট্ৰল পাম্পত কেৰোচিন বিক্ৰি কৰাৰ সিদ্ধান্ত লৈছে কেন্দ্ৰীয় চৰকাৰে৷ সেই মৰ্মে দেশৰ প্ৰতিষ্ঠিত তেল কোম্পানীসমূহৰ দ্বাৰা পৰিচালিত পেট্ৰল পাম্পত এইবাৰ সৰ্বাধিক ৫০০০ লিটাৰ কেৰোচিন মজুত কৰা হ’ব বুলিও দেওবাৰে নিশা প্ৰকাশিত গেজেট বিজ্ঞাপ্তিত জনাইছে কেন্দ্ৰীয় চৰকাৰে৷
পৰিবৰ্তিত নিয়মত সংশ্লিষ্ট ৰাজ্য আৰু কেন্দ্ৰীয়শাসিত অঞ্চলৰ প্ৰশাসনে জিলাত দুটাকৈ চাৰ্ভিছ ষ্টেচন চিহ্নিত কৰি তাতেই কেৰোচিন মজুত ৰখাৰ ব্যৱস্থা কৰিব৷ পশ্চিম এছিয়াৰ সাম্প্ৰতিক যুদ্ধ পৰিস্থিতিৰ মাজতেই হৰমুজ প্ৰণালীয়ে অপৰিশোধিত তেল ভাৰতলৈ অহাৰ পৰিমাণ যিমানেই কমিছে সিমানেই ভাৰতত ৰন্ধন এল পিজি বা ইন্ধনৰ চাহিদা পূৰণত সংকটজনক পৰিস্থিতি তৈয়াৰ হৈছে৷ এই অভিযোগ বিৰোধীয়ে আনিলেও এই অভিযোগ পোনচাটেই নাকচ কৰিছে কেন্দ্ৰীয় চৰকাৰে৷ কেন্দ্ৰীয় চৰকাৰে জনাইছে যে দেশত ইন্ধনৰ ক্ষেত্ৰত কোনো প্ৰকাৰৰ সংকট সৃষ্টি হোৱা নাই৷
তাৰমাজতেই দেওবাৰে নিশা কেন্দ্ৰীয় চৰকাৰে হঠাৎ ঘোষণা কৰিছে যে পশ্চিম এছিয়াৰ যুদ্ধ পৰিস্থিতিৰ বাবে এইবাৰ ভাৰতৰ সৰ্বত্ৰ ঘৰে ঘৰে কেৰোচিন তেলৰ সৰবৰাহ নিশ্চিত কৰাৰ লক্ষ্যৰে পেট্ৰোলিয়াম ছেফ্টি এণ্ড লাইছেন্সিং নিয়ম শিথিল কৰা হৈছে৷ পশ্চিম এছিয়াৰ যুদ্ধ পৰিস্থিতিৰ নিৰিখত মোদী চৰকাৰৰ এই পদক্ষেপ অত্যন্ত তাৎপৰ্যপূৰ্ণ বুলি দাবী কৰা হৈছে ৰাজনৈতিক বিশ্লেষকৰ তৰফৰ পৰা৷
শনিবাৰে পশ্চিম এছিয়াৰ যুদ্ধ পৰিস্থিতিৰ মোকাবিলাৰ মাজতে দীৰ্ঘম্যাদি প্ৰস্তুতি লোৱাৰ কথাও জনাইছিল কেন্দ্ৰীয় প্ৰতিৰক্ষামন্ত্ৰী ৰাজনাথ সিঙে৷ ইয়াৰ সৈতে দ্ৰুত সিদ্ধান্ত লোৱা বিষয়তো জোৰ দিছিল তেওঁ৷ পৰিস্থিতিৰ ওপৰত নজৰদাৰী বঢ়াবলৈ ইনফৰ্মেল গ্ৰুপ অফ মিনিষ্টাৰসকলৰ সৈতে প্ৰথম বৈঠকত এই প্ৰসংগ তোলে ৰাজনাথ সিঙে৷ বৈঠকত উপস্থিত থাকে নিৰ্মলা সীতাৰমন, কিৰেণ ৰিজেজু, হৰদ্বীপ সিং পুৰী, মনোহৰ লাল খট্টৰ আৰু জে পি নাড্ডাৰ দৰে হেভিৱেট মন্ত্ৰীও৷ বৈঠকত বিভিন্ন মন্ত্ৰণালয়ৰ সচিবসকলক লৈ তৈয়াৰী এমপাৱাৰ্ড গ্ৰুপে আগন্তুক দিনত পৰিস্থিতিৰ মোকাবিলা কেনেকৈ কৰা হ’ব সেই বিষয়ে এক প্ৰেজেণ্টেছনো দিয়ে৷
এই সভাৰ পাছতেই ইন্ধন সৰবৰাহৰ ক্ষেত্ৰত আশংকা, অত্যাবশ্যকীয় পণ্যৰ প্ৰাপ্যতা, পৰিকাঠামো ব্যৱস্থা সঠিক ৰখা আৰু সৰবৰাহ শৃঙ্খলা সুনিশ্চিত কৰাৰ বিষয়টো চোৱাচিতা কৰিছে৷ পৰিবৰ্তিত পৰিস্থিতিত সংশ্লিষ্ট মন্ত্ৰণালয়ৰ মন্ত্ৰী আৰু সচিবসকলক সমন্বয় ৰাখি কাম কৰাৰো অনুৰোধ জনাইছে ৰাজনাথ সিঙে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
