নাৰীক কুমাৰীত্ব পৰীক্ষা কৰাবলৈ বাধ্য কৰোৱাটোৱে সংবিধানৰ ২১ তম অনুচ্ছেদৰ অধীনত তেওঁৰ জীৱন আৰু স্বাধীনতাৰ সুৰক্ষাৰ মৌলিক অধিকাৰ লংঘন কৰে। সাম্প্ৰতিক এক গোচৰত এইবাৰ এই কথা জনালে ছত্তীশগড় হাইকৰ্টে। হাইকৰ্টক পৰ্যবেক্ষণমতে কোনো পৰিস্থিতিতেই কুমাৰীত্ব পৰীক্ষাৰ অনুমতি দিয়াটোৱে নাৰীৰ মৌলিক অধিকাৰ, ন্যায়বিচাৰৰ মূল নীতি আৰু তেওঁৰ ব্যক্তিগত গোপনীয়তা ৰক্ষা আৰু মৰ্যদাৰ পৰিপন্থী।
স্ত্ৰী পূৰ্বে অন্য পুৰুষৰ সৈতে অবৈধ সম্পৰ্কত লিপ্ত আছিল নেকি এই অভিযোগত সম্প্ৰতি পত্নীৰ কুমাৰীত্ব পৰীক্ষাৰ দাবী জনাই আদালতৰ দ্বাৰস্থ হৈছিল এজন ব্যক্তি। সেই গোচৰতেই হাইকৰ্টৰ ন্যায়াধীশ অৰবিন্দ কুমাৰ বৰ্মাৰ পৰ্যবেক্ষণ এয়াই যে পত্নীয়ে কেতিয়াও কুমাৰীত্ব পৰীক্ষা দিয়াৰ প্ৰয়োজন নাই। আৰু কুমাৰীত্ব পৰীক্ষাৰ বাবে কোনোৱে তেওঁক বাধ্যও কৰাব নোৱাৰিব। এই পৰীক্ষাৰ অনুমতি কেতিয়াও দিয়া নহব বুলি জনাই দিয়ে উচ্চ ন্যায়ালয়ে। স্ত্ৰীৰ কুমাৰীত্ব পৰীক্ষা কৰাব বিচৰা আবেদনকাৰীৰ দাবী অসাংবিধানিক বুলিও উল্লেখ কৰে উচ্চ ন্যায়ালয়ে। কাৰণ ই সংবিধানৰ ২১ তম অনুচ্ছেদৰ আওতাত নাৰীৰ মৰ্যদাৰ অধিকাৰ লংঘন কৰে।
ন্যায়াধীশ বাৰ্মাই কয়- ভাৰতৰ সংবিধানৰ ২১ তম অনুচ্ছেদে কেৱল জীৱন আৰু ব্যক্তিগত স্বাধীনতাৰ অধিকাৰেই নিশ্চিত নকৰে বৰং মৰ্যদাৰ সৈতে জীয়াই থকাৰ অধিকাৰো সুনিশ্চিক কৰে, যি বিশেষকৈ নাৰীৰ বাবে অত্যন্ত গুৰুত্বপূৰ্ণ। এই ব্যক্তিগত স্বাধীনতাৰ অধিকাৰত কোনো কাৰণতেই কোনেও হস্তক্ষেপ কৰিব নোৱাৰিব।
উল্লেখ্য যে ২০২৩ চনৰ ৩০ এপ্ৰিলত হিন্দু বিবাহ আইন অনুসৰি বিয়া হৈছে ছত্তীছগড়ৰ কোৰবা জিলাৰ বাসিন্দা সেই দম্পতিৰ। বিবাহৰ কিছুদি পাছতেই তৰুণীয়ে তেওঁৰ পৰিয়ালক জনায় যে তেওঁৰ স্বামী পুৰুষত্বহীন আৰু কোনোধৰণৰ সম্পৰ্ক স্থাপন কৰিবলৈ তেওঁ সক্ষম নহয়। এইবিষয়ে ২০২৪ চনৰ ২ জুলাইত ৰায়গড় জিলাৰ এক পাৰিবাৰিক আদালতত ভাৰতীয় নাগৰিক সুৰক্ষা সংহিতাৰ ১৪৪ ধাৰাৰ অধীনত স্বামীৰ পৰা মাহিলী ২০০০০ টকা ভৰণপোষণ বিচাৰি আবেদন কৰে তৰুণীয়ে। তেতিয়াই স্বামীয়ে ওলোটাই স্ত্ৰীৰ কুমাৰীত্ব পৰীক্ষা কৰোৱাব বিচাৰি আদালতৰ দ্বাৰস্থ হয়। স্বামীৰ অভিযোগ আছিল যে দেওৰৰ সৈতে অবৈধ সম্পৰ্ক আছে তেওঁৰ পত্নীৰ। সেয়ে তেওঁক পুৰুষত্বহীন প্ৰমাণ কৰাব খুজিছে।
বিগত ১৫ অক্টোবৰত পাৰিবাৰিক আদালতত স্বামীৰ আবেদন খাৰিজ কৰি দিয়াৰ পাছতেই তেওঁ কাষ চাপিছে হাইকৰ্টৰ। শেহতীয়াকৈ সেই গোচৰৰ ৰায় দি আদালতে কয় যে পত্নীৰ কুমাৰীত্ব পৰীক্ষা কোনো কাৰণতেই কৰাব নোৱাৰিব প্ৰয়োজন হলে তেওঁ যদি পুৰুষত্বহীনতাৰ অভিযোগ খণ্ডন কৰিব খোজে তেন্তে সংশ্লিষ্ট ডাক্তৰী পৰীক্ষা কৰাওক।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
