জয়পুৰত আচৰিত কাণ্ড৷ চাৰিজন চিকিৎসক, এজন প্ৰিন্সিপাল, মেডিকেল অফিচাৰক ছাচপেণ্ড কৰা হৈছে এই ঘটনাক লৈ৷ কিন্তু কিয় হঠাৎ চাকৰি গ’ল এইসকল মেডিকেল ষ্টাফৰ? ৰাজস্থানৰ ঝুনঝুন জিলাত এইকেইগৰাকী চিকিৎসা কৰ্মীয়েই জীৱিত এজন ৰোগীক মৃত ঘোষণা কৰিছিল৷ কিন্তু চিতাত তুলোতেই উঠি যায় ব্যক্তিজন৷ ইয়াৰপাছতেই সমগ্ৰ বিষয়টোক লৈ হৈ চৈ লাগিছে ৰাজস্থানত৷
শেষযাত্ৰাত তেওঁক লৈ যোৱাৰ সময়ত হঠাৎ জীৱিত হৈ উঠে যুৱকজন৷ লগে লগেই তেওঁক এম্বুলেন্সেৰে লৈ অহা লয় হাস্পতাললৈ৷ ঝুনঝুন জিলা হাস্পতালত তেওঁক ভৰ্তী কৰোৱা হৈছে৷ আই চি ইউত ভৰ্তি কৰোৱা হৈছে যুৱকজনক৷ অৱশ্যে দীৰ্ঘসময় ধৰি মৰ্গত বৰফত ৰখাৰ লগতে মৰোণোত্তৰ পৰীক্ষা হোৱাৰ বাবে তেওঁৰ অৱস্থা খুবেই সংকটত৷ এই ঘটনাক লৈ ৰাজস্থান চৰকাৰে আটাইকেইজন অভিযুক্তৰ বিৰুদ্ধে কাঢ়া ব্যৱস্থা গ্ৰহণ কৰাৰো নিৰ্দেশ দিছে৷
ৰোহিত শে নামৰ ২৫ বছৰীয়া সেই যুৱক অসুস্থ হৈ হাস্পতালত ভৰ্তি হৈছিল৷ ৰোহিত এগৰাকী অনাথ যুৱক হোৱাৰ ওপৰিও জন্মগতভাৱেই বোবা আৰু ক’লাও৷ সেই যুৱকৰেই হাস্পতালত মৃত ঘোষণা কৰি পোষ্টমৰ্টেম কৰি চিতাত তুলিবলৈ পঠিয়াই দিয়া হৈছিল দেহ৷ কিন্তু চিতাত উঠোৱাৰ সময়তে লৰচৰ কৰাত আচৰিত হৈ পৰে তেওঁৰ শেষযাত্ৰাত অংশ লোৱা আটাইবোৰ ব্যক্তিয়েই৷ প্ৰথমে ভুত বুলি ভয় খাইছিল যদিও ভালদৰে চোৱাত যুৱকজন জীৱিত যে গম পায়৷ লগে লগেই যুৱকক হাস্পতাললৈ প্ৰেৰণ কৰা হয়৷
এই সমগ্ৰ ঘটনাক লৈ তদন্তত নামিছে প্ৰশাসন৷ অভিযুক্তৰ গাফিলতিয়েই তেওঁলোকে প্ৰাথমিক তদন্তত লাভ কৰিছে৷ কেনেকৈ এজন জীৱিত ব্যক্তিক মৃত ঘোষণা কৰিলে সেই বিষয়টোৰ উত্তৰ বিচাৰিছে এতিয়া প্ৰশাসনে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
