বলিউডৰ জনপ্ৰিয় অভিনেত্ৰী দীপিকা পাডুকোন পুনৰ এবাৰ চৰ্চাৰ কেন্দ্ৰবিন্দুলৈ আহিছে। অৱশ্যে এইবাৰ কোনো নতুন ছবি বা বৰ্তমানৰ ব্যক্তিগত জীৱনৰ বাবে নহয়, বৰং অতীতৰ এটা সম্পৰ্কক লৈ চৰ্চাত আহিছে দীপিকা পাডুকোন। মডেল-অভিনেতা মুজাম্মিল ইব্ৰাহিমে এটা পুৰণি সাক্ষাৎকাৰত দীপিকাক লৈ কৰা কিছুমান মন্তব্য পুনৰ ছ’চিয়েল মিডিয়াত ভাইৰেল হোৱাত বিষয়টো নতুনকৈ আলোচনাৰ বিষয় হৈ পৰিছে।
সাক্ষাৎকাৰটোত মুজাম্মিলে দাবী কৰিছিল যে, মুম্বাইলৈ অহাৰ পিছত দীপিকাই প্ৰথমে তেওঁৰ সৈতেই প্ৰেমৰ সম্পৰ্ক গঢ়ি তুলিছিল। মুজাম্মিলৰ ভাষ্যমতে, দুয়োজনে প্ৰায় দুবছৰ ধৰি ইজনে-সিজনক ডেট কৰিছিল। মুজাম্মিলে কয়, সেইটো দুয়োৰে জীৱনৰ প্ৰথম গুৰুত্বপূৰ্ণ প্ৰেমৰ সম্পৰ্ক আছিল আৰু দীপিকাই প্ৰথমে তেওঁক প্ৰেমৰ প্ৰস্তাৱ আগবঢ়াইছিল।
মুজাম্মিলে আৰু কয়, ‘আমাৰ সম্পৰ্কটো শেষ হৈছিল কাৰণ মই নিজেই সেই সিদ্ধান্ত লৈছিলোঁ। সেই সিদ্ধান্তৰ বাবে মোৰ কোনো অনুশোচনা নাই। মই যি সিদ্ধান্ত লওঁ, তাৰ বাবে পিছত আফচোচ নকৰোঁ। সেই সময়ত মই ইতিমধ্যে এজন অভিনেতা হিচাপে পৰিচিত হৈছিলোঁ, আনহাতে দীপিকা তেতিয়াও কেৱল এগৰাকী মডেল আছিল।’
এতিয়াও দীপিকাৰ সৈতে যোগাযোগ আছে নেকি মুজাম্মিলৰ?
পাছত মুজাম্মিলক সোধা হৈছিল যে, বিচ্ছেদৰ পিছতো দীপিকাৰ সৈতে যোগাযোগ আছিল নেকি। ইয়াৰ উত্তৰত তেওঁ জনায় যে, দীপিকাৰ বিৱাহৰ আগলৈকে মাজে মাজে দুয়োৰে কথা-বতৰা হৈছিল। বিচ্ছেদৰ পিছতো তেওঁলোক ভাল বন্ধু হৈ আছিল আৰু ইজনে-সিজনৰ সফলতাত শুভেচ্ছা জনাইছিল। কিন্তু দীপিকা আৰু ৰণবীৰ সিঙৰ বিয়াৰ পিছত দুয়োৰে যোগাযোগ সম্পূৰ্ণৰূপে বন্ধ হৈ যায়।
উল্লেখযোগ্য যে, দীপিকা পাডুকোনে এতিয়ালৈকে ৰাজহুৱাভাৱে মুজাম্মিল ইব্ৰাহিমৰ সৈতে প্ৰেমৰ সম্পৰ্কত থকাৰ বিষয়ে কোনো মন্তব্য কৰা নাই। সেয়েহে মুজাম্মিলে কৰা এই দাবীসমূহ তেওঁৰ ব্যক্তিগত বক্তব্য হিচাপেই বিবেচিত হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
