কেটন আগৰৱালা হ*ত্যাকাণ্ডৰ পুনৰাবৃত্তি! 

প্ৰেমাস্পদক হ*ত্যা কৰা ঘটনাবোৰ দেশত এতিয়া সঘনাই ঘটিবলৈ লৈছে। কেতিয়াবা যদি পৰিকল্পিতভাৱে প্ৰেমিকাই প্ৰেমিকৰ সৈতে মিলি স্বামী বা ভাবী স্বামীক হ*ত্যা কৰিছে কেতিয়াবা আকৌ প্ৰেমিকে হ*ত্যা কৰিছে প্ৰেমিকাক। বিগত বৰ্ষত মেঘালয়লৈ মধুচন্দ্ৰিকা যাপনৰ বাবে অহা ইণ্ডোৰৰ ৰাজা ৰঘুবংশীক পুনমে হ*ত্যা কৰা ঘটনাই তোলপাৰ লগাইছিল দেশ। ইয়াৰ উপৰিও অতি শেহতীয়াভাৱে পুনেত কেটন আগৰৱালাক হবলগীয়া পত্নীয়ে হ*ত্যা কৰা ঘটনাৰ মাৰ নৌযাওতেই পুনৰ দেশত সংঘটিত হৈছে প্ৰায় একেই ধৰণৰ ঘটনা। অৱশ্যে এইবাৰ হ*ত্যাকাৰী প্ৰেমিকৰ বিপৰীতে ভুক্তভোগী প্ৰেমিকা। মুম্বাইত সংঘটিত হৈছে এই ঘটনা।

মুম্বাইত প্ৰেমিকৰ নৃ*সংশতাৰ বলি নাবালিকা

মুম্বাইৰ কান্দিভলি পূবৰ সমতা নগৰ আৰক্ষী থানা এলেকাত সংঘটিত এক চাঞ্চল্যকৰ হত্যাকাণ্ডই সমগ্ৰ অঞ্চলজুৰি তীব্ৰ চাঞ্চল্যৰ সৃষ্টি কৰিছে। দামুনগৰৰ পিছফালে থকা এখন নিৰ্জন পাহাৰত এগৰাকী নাবালিকা কিশোৰীৰ ৰ*ক্তাক্ত মৃ*তদেহ উদ্ধাৰ হোৱাৰ পিছতে আৰক্ষীয়ে দ্ৰুত তদন্ত আৰম্ভ কৰে। ফৰেনছিক বিশেষজ্ঞৰ সহায়, প্ৰযুক্তিগত তথ্য আৰু গোপন সূত্ৰৰ ভিত্তিত আৰক্ষীয়ে মাত্ৰ ২৪ ঘণ্টাৰ ভিতৰতে ঘটনাটোৰ মূল অভিযুক্ত তথা ভুক্তভোগী নাবালিকাৰ প্ৰেমিক সূৰয মাৰুতি ৱাঘমাৰেক গ্ৰেপ্তাৰ কৰিবলৈ সক্ষম হয়।
আৰক্ষীৰ তথ্য অনুসৰি, অভিযুক্ত সূৰয পেছাত এজন ডেলিভাৰী বয় আৰু ভুক্তভোগী নাবালিকাগৰাকীৰ মাজত কিছুদিন ধৰি প্ৰেমৰ সম্পৰ্ক চলি আহিছিল। মৃ*তদেহ উদ্ধাৰৰ পিছত আৰক্ষীয়ে নাবালিকাগৰাকীৰ বন্ধু-বান্ধৱ আৰু চিনাকি লোকক সোধা-পোছ কৰে। প্ৰাথমিক তদন্ততে সূৰযৰ বিৰুদ্ধে সন্দেহ ঘনীভূত হয় আৰক্ষীৰ। তদন্তৰ অন্তত সূৰযক গ্ৰেপ্তাৰ কৰে আৰক্ষীয়ে।

শুকুৰবাৰে পুৱা, আৰক্ষীয়ে দামুনগৰৰ পিছফালে থকা পাহাৰীয়া অঞ্চলত ভুক্তভোগী নাবালিকাৰ ৰ*ক্তাক্ত মৃ*তদেহ পৰি থকাৰ খবৰ লাভ কৰে। ঘটনাস্থলত সমতা নগৰ আৰক্ষী, মুম্বাই ক্ৰাইম ব্ৰাঞ্চ আৰু জ্যেষ্ঠ আৰক্ষী বিষয়াসকল উপস্থিত হৈ অঞ্চলটো ঘেৰাও কৰি তদন্ত আৰম্ভ কৰে। ফৰেনছিক দলেও ঘটনাস্থলৰ পৰা গুৰুত্বপূৰ্ণ বৈজ্ঞানিক প্ৰমাণ সংগ্ৰহ কৰে।

হ*ত্যাৰ আঁৰত কি কাৰণ?

আৰক্ষীৰ প্ৰাথমিক তদন্তত এতিয়াও স্পষ্ট হোৱা নাই যে সূৰযে কিয় নিজৰ প্ৰেমিকাক হ*ত্যা কৰিলে। তদন্তকাৰী বিষয়াসকলে দুটা সম্ভাৱ্য দিশত অনুসন্ধান চলাইছে। প্ৰথমতে, এই হ*ত্যাকাণ্ড পূৰ্বপৰিকল্পিত আছিল নেকি, অৰ্থাৎ অভিযুক্তই নাবালিকাক হ*ত্যা কৰাৰ উদ্দেশ্যেই পাহাৰলৈ লৈ গৈছিল নেকি আৰু দ্বিতীয়তে, পাহাৰত উপস্থিত হোৱাৰ পিছত দুয়োৰে মাজত কোনো তীব্ৰ বাক-বিতণ্ডা বা বিবাদ সৃষ্টি হৈ, খঙৰ বশৱৰ্তী হৈ এই হ*ত্যাকাণ্ড সংঘটিত কৰিছিল নেকি।

আৰক্ষীৰ মন্তব্য কি?

এই ঘটনা সন্দৰ্ভত আৰক্ষী উপায়ুক্ত (DCP) গজানন ৰাজমানে কয় যে, ঘটনাস্থলৰ পৰা সংগ্ৰহ কৰা ফৰেনছিক প্ৰমাণ, প্ৰযুক্তিগত তদন্ত আৰু গোপন তথ্যৰ সহায়ত আৰক্ষীয়ে মাত্ৰ ২৪ ঘণ্টাৰ ভিতৰতে এই জটিল হ*ত্যাকাণ্ডৰ ৰহস্য উদ্ঘাটন কৰিবলৈ সক্ষম হৈছে। মৃ*তদেহৰ মৰণোত্তৰ পৰীক্ষা সম্পন্ন কৰি পৰিয়ালৰ হাতত হস্তান্তৰৰ প্ৰক্ৰিয়া চলি আছে। তেওঁ আৰু জনায় যে, অভিযুক্ত সূৰযক সমতা নগৰ আৰক্ষী থানাত অধিক জেৰা চলোৱা হৈছে। আদালতৰ অনুমতি সাপেক্ষে আৰক্ষীয়ে জিম্মাত লৈ অধিক তদন্ত চলাব। তদন্ত সম্পূৰ্ণ হোৱাৰ পিছত হ*ত্যাৰ প্ৰকৃত কাৰণ আৰু ঘটনাৰ সম্পূৰ্ণ তথ্য আনুষ্ঠানিকভাৱে প্ৰকাশ কৰা হ’ব বুলি জনাইছে মুম্বাই আৰক্ষীয়ে।
এই প্ৰতিবেদন যুগুতাইছে মানসজ্যোতিয়ে

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ