বিজেপিত মোক্ষম আঘাত, মাথো ৩ টা ভোটৰ ব্যৱধানত দিল্লীত আপৰ জয়
২০২৫ চনত অনুষ্ঠিত হ’বলগীয়া দিল্লী বিধানসভা নিৰ্বাচনৰ পূৰ্বে ছেমি ফাইনেল হিচাপে বিবেচিত হোৱা দিল্লীৰ পৌৰ সভা নিৰ্বাচনত মেয়ৰ আৰু ডেপুটি মেয়ৰ দুয়োটা পদতে আপে জয়লাভ কৰে। মেয়ৰ পদৰ নিৰ্বাচনত বিজয় সাব্যস্ত কৰে আপৰ প্ৰাৰ্থী মহেশ কুমাৰ খেৰীয়ে।
মাথো ৩ টা ভোটৰ ব্যৱধানত জয়ী হয় আপ। আনকি বিজেপিক ভোট দিয়ে আপৰ ১০ গৰাকী কাউন্সিলাৰে। এই ক্ৰছ ভোটিঙৰ পিছতো জয়লাভ কৰিব নোৱাৰে বিজেপি।
আনহাতে বিজেপিয়ে উপ-মেয়ৰ পদৰ প্ৰাৰ্থী প্ৰত্যাহাৰ কৰে। এনে পৰিস্থিতিত আম আদমি পাৰ্টিৰ প্ৰাৰ্থী ৰবীন্দ্ৰ ভৰদ্বাজ এই পদত বিনা প্ৰতিদ্বন্দ্বিতাত নিৰ্বাচিত হয়।
উল্লেখ্য যে, এই নিৰ্বাচনত মেয়ৰ পদৰ বাবে আপে ১৩৩টা আৰু বিজেপিয়ে ১৩০টা ভোট লাভ কৰে। দুয়ো দলৰ মাজৰ ব্যৱধান কেৱল মাত্ৰ ৩ টা ভোট।
দিল্লীৰ মুখ্যমন্ত্ৰী আতিশীয়েও আপৰ এই জয়ক লৈ প্ৰতিক্ৰিয়া প্ৰকাশ কৰে ৷ তেওঁ কয় যে বিৰোধী বিজেপিয়ে ষড়যন্ত্ৰ ৰচনা কৰি মেয়ৰ নিৰ্বাচন পলম কৰাইছিল। কিন্তু আকৌ এবাৰ বাবা চাহেবৰ সংবিধান জয়ী হ’ল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
