ইউক্ৰেইন আক্ৰমণ কৰাৰ পিছতে আমেৰিকাই ৰাছিয়াৰ বিৰুদ্ধে অৰ্থনৈতিক প্ৰতিবন্ধকতাৰ লগতে বিভিন্ন প্ৰতিবন্ধকতা আৰোপ কৰিছে৷
ইয়াৰ ভিতৰত সামৰিক আৰু মহাকাশ অধ্যয়ন খণ্ডও আছে৷ মহাকাশ অধ্যয়ন খণ্ডতো প্ৰতিবন্ধকতা আৰোপ কৰাৰ পিছতে ৰাছিয়াৰ মহাকাশ অধ্যয়ন সংস্থাৰ মুৰব্বী দমিত্ৰি ৰোগোজিনে আমেৰিকাৰ বিৰুদ্ধে তীব্ৰ ক্ষোভ উজাৰিছে৷
ৰাছিয়াৰ মহাকাশ সংস্থাৰ মুৰব্বীগৰাকীয়ে প্ৰতিক্ৰিয়া প্ৰকাশ কৰি কয় যে মাৰ্কিন যুক্তৰাষ্ট্ৰৰ এই নিষেধাজ্ঞাই আন্তজাৰ্তিক মহাকাশ কেন্দ্ৰৰ পৰম্পৰ সহযোগিতাক ধ্বংস নকৰিলেও আন ৰাষ্ট্ৰসমূহৰ সুৰক্ষা বিপদাপন্ন কৰিব৷
‘‘যদি আপুনি আমাৰ সৈতে সহযোগিতা বন্ধ কৰে, তেন্তে কোনে ISSক অনিয়ন্ত্ৰিত কক্ষপথৰ পৰা ৰক্ষা কৰিব?!’’ এই বুলিও মাৰ্কিন ৰাষ্ট্ৰপতিক প্ৰশ্ন কৰিছে ৰাছিয়াৰ মহাকাশ সংস্থাৰ মুৰব্বীগৰাকীয়ে৷
টুইটত পুনৰ মাৰ্কিন ৰাষ্ট্ৰপতিক আক্ৰমণ কৰি দমিত্ৰিয়ে কয়, ‘‘ভাৰত বা চীনলৈ ৫০০ টা গাঁথনি পেলাই দিয়াৰ বিকল্পও আছে৷ আপুনি তেওঁলোকক এনে সম্ভাৱনাৰে ভাবুকি দিব বিচাৰিছে নেকি? এতিয়াৰ পৰা ISS ৰাছিয়াৰ ওপৰেৰে উৰা মাৰিব নোৱাৰে, ইয়াৰ ফলত সৃষ্ট সকলো বিপদাশংকা আপুনিয়েই ল’ব লাগিব৷ ইয়াৰ বাবে আপুনি সাজু নে?’’
ইফালে আমেৰিকাই ৰাছিয়াৰ ওপৰত আৰোপ কৰা নিষেধাজ্ঞাৰ ফলত দুয়ো দেশৰ মহাকাশ অধ্যয়নত কোনো প্ৰভাৱ নেপেলায় বুলি প্ৰকাশ কৰিছে মাৰ্কিন মহাকাশ সংস্থা NASA-এ৷
NASA-এ এক বিবৃতিত কৈছে যে এই প্ৰতিবন্ধকতাই দুয়ো দেশৰ মহাকাশ সহযোগিতাক কোনো বিপদত পেলাব নোৱাৰে৷
‘‘NASA-এ আন্তৰ্জাতিক মহাকাশ কেন্দ্ৰৰ সুৰক্ষা অভিযানৰ বাবে ৰাছিয়াৰ মহাকাশ সংস্থাকে ধৰি সকলো আন্তঃৰাষ্ট্ৰীয় অংশীদাৰৰ সৈতে কাম কৰি আছে৷ নতুন ৰপ্তানিৰ প্ৰতিবন্ধকতাত আমেৰিকা আৰু ৰাছিয়াৰ মাজৰ অসামৰিক সহযোগিতাক ৰেহাই দিয়া হৈছে৷’’ NASA-এ বিবৃতিটোত কয়৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
