শনিবাৰৰ দিনটো হিন্দু ধৰ্মত শনি দেৱৰ উদ্দেশ্যে উৎসৰ্গিত বুলি মান্যতা আছে। জ্যোতিষ শাস্ত্ৰ অনুসৰি এই দিনটোত কিছুমান বস্তু নিকিনিবলৈ পৰামৰ্শ দিয়া হয়। বিশ্বাস কৰা হয় যে এনে বস্তু কিনিলে শনি দোষ বৃদ্ধি পাব পাৰে আৰু জীৱনত আৰ্থিক, মানসিক বা পাৰিবাৰিক সমস্যাৰ সৃষ্টি হ’ব পাৰে। আনহাতে, শনিবাৰে দুখীয়া আৰু অভাৱগ্ৰস্ত লোকক সহায় কৰা, দান-ধৰ্ম কৰা বা শনি দেৱৰ পূজা-অৰ্চনা কৰিলে শুভ ফল লাভ হয় বুলি ধাৰণা আছে।
শনিবাৰে কি কি বস্তু নিকিনিব লাগে?
১) লোহাৰ সামগ্ৰীঃ জ্যোতিষ মতে শনিবাৰে লোহা বা লোহাৰে নিৰ্মিত সামগ্ৰী, যেনে—মেচিন, বাচন-বৰ্তন, সঁজুলি, গাড়ী আদি কিনাৰ পৰা বিৰত থাকিব লাগে। বিশ্বাস কৰা হয় যে ইয়াৰ ফলত কাম-কাজত বাধা আহিব পাৰে। যদি লোহাৰ বস্তু কিনাটো অতি প্ৰয়োজনীয় হয়, তেন্তে অন্য দিনত কিনাটো অধিক শুভ বুলি ধৰা হয়।
২) সৰিয়হৰ তেলঃ শনিবাৰে সৰিয়হৰ তেল কিনাতকৈ আগতেই ঘৰত মজুত ৰাখিবলৈ কোৱা হয়। এই দিনা শনি দেৱক সৰিয়হৰ তেল অৰ্পণ কৰা বা তেল দান কৰাটো শুভ বুলি মানা হয়। কিন্তু শনিবাৰে তেল কিনিলে আৰ্থিক ক্ষতি হ’ব পাৰে বুলি বিশ্বাস আছে।
৩) ক’লা তিলঃ ক’লা তিল শনিবাৰে কিনাৰ সলনি পূজা বা দানৰ বাবে ব্যৱহাৰ কৰাটো শুভ বুলি ধৰা হয়। এই দিনা ক’লা তিল কিনিলে অশুভ প্ৰভাৱ বৃদ্ধি পাব পাৰে বুলি বহুতে বিশ্বাস কৰে।
৪) জোতা-চেণ্ডেলঃ শনিবাৰে নতুন জোতা বা চেণ্ডেল নিকিনিবলৈ পৰামৰ্শ দিয়া হয়। বিশ্বাস কৰা হয় যে ইয়াৰ ফলত কৰ্মক্ষেত্ৰত বাধা, অপ্রয়োজনীয় খৰচ আৰু নানা ধৰণৰ সমস্যাৰ সৃষ্টি হ’ব পাৰে।
৫) নিমখঃ কিছুমান পৰম্পৰাগত বিশ্বাস অনুসৰি শনিবাৰে নিমখ কিনাটোও শুভ নহয়। ইয়াৰ ফলত আৰ্থিক টান, ঋণ বা ধনৰ অভাৱ বৃদ্ধি পাব পাৰে বুলি ধাৰণা আছে।
৬) ক’লা কাপোৰ, কয়লা, কেঁচি আৰু ঝাড়ুঃ শনিবাৰে ক’লা কাপোৰ, কয়লা, কেঁচি আৰু ঝাড়ু কিনাৰ পৰা বিৰত থাকিবলৈ কোৱা হয়। বিশ্বাস কৰা হয় যে এইবোৰ বস্তু কিনিলে ঘৰত নেতিবাচক শক্তি, বিবাদ বা অশান্তি বৃদ্ধি পাব পাৰে। কিন্তু এই দিনা ঝাড়ু দান কৰাটো শুভ বুলি মানা হয়।
মনত ৰাখিবলগীয়া কথা-ওপৰৰ সকলো কথা ধৰ্মীয় আৰু জ্যোতিষীয় বিশ্বাসৰ ওপৰত ভিত্তি কৰি প্ৰচলিত ধাৰণা। ইয়াৰ কোনো বৈজ্ঞানিক প্ৰমাণ নাই। এই বিশ্বাস মানিব নে নামানিব, সেয়া সম্পূৰ্ণ ব্যক্তিগত বিষয়।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
