অসম লাইভ ২৪ঃ
বাগৰি বাগৰি কান্দিছে এজন মন্ত্ৰীয়ে৷ ডি এম কেৰ নেতা ভি ছেণ্ঠিল বালাজীয়ে হুৰাহুৰে কান্দিছে৷ কিন্তু কিয় এনেদৰে কান্দোনত ভাঙি পৰিছে মন্ত্ৰী বালাজী?
আৰক্ষীয়ে গ্ৰেপ্তাৰ কৰি লৈ যোৱাৰ সময়তেই কান্দোনত ভাঙি পৰিছে তামিলনাডুৰ শক্তি মন্ত্ৰী ভি ছেণ্ঠিল বালাজী৷ মন্ত্ৰী বালাজীক ঘৰত মঙলবাৰে চলিছিল ইডিৰ তালাচি৷ আৰ্থিক দুৰ্নীতিৰ বহু অভিযোগ আছে শক্তি মন্ত্ৰী ভি বালাজীৰ বিৰুদ্ধে৷ মঙলবাৰে দিনজোৰা তদন্তৰ অন্তত নিশা প্ৰায় ২ বজাত ইডিৰ দলে গ্ৰেপ্তাৰ কৰে শক্তিমন্ত্ৰী বালাজীক৷
টকা লৈ বহুজনক চাকৰি দিয়াৰ অভিযোগ আছে বালাজীৰ বিৰুদ্ধে৷ মঙলবাৰে ইডিয়ে জেৰা চলাই নিশাই গ্ৰেপ্তাৰ কৰে মন্ত্ৰী বালাজীক৷ কিন্তু বালাজীক গ্ৰেপ্তাৰ কৰি বিপাঙত ইডিৰ দলো৷ গ্ৰেপ্তাৰৰ পাছতেই কান্দি কান্দি অচেতন হৈ পৰে বালাজী৷ বুধবাৰে পুৱতি নিশাই ইডিৰ দলে হাস্পতালত ভৰ্তী কৰাই বালাজীক৷
বালাজীক গ্ৰেপ্তাৰ কৰাৰ খবৰৰ লগতে হাস্পতালত ভৰ্তী হৈ থকাৰ খবৰ পায়েই তেওঁক লগ কৰিবলৈ হাস্পতাললৈ গৈছে তামিলনাডুৰ মুখ্যমন্ত্ৰী এম কে ষ্টেলিন৷ মুখ্যমন্ত্ৰী ষ্টেলিনে পুৱাই খবৰ ল’বলৈ আহে গ্ৰেপ্তাৰ হৈ আইচিইউত থকা বালাজীৰ৷ বৰ্তমান চেন্নাইৰ ওমানদুৱাৰ চৰকাৰী হাস্পতালত ভৰ্তী হৈ আছে মন্ত্ৰী বালাজী৷ বালাজী ভৰ্তি হৈ থকা হাস্পতালৰ বাহিৰত এতিয়া ডিএমকেৰ নেতা পালিনেতাৰ ভীৰ৷ ঘটনাক লৈ ডিএমকেৰ সাংসদ তথা অধিবক্তা এন আপ এলানগোৱে কৈছে, ‘কিয় গ্ৰেপ্তাৰ কৰিছে ইডিয়ে মুকলিকৈ কওক৷ এনেকৈ গ্ৰেপ্তাৰ কৰাটো বেআইনী৷ গ্ৰেপ্তাৰৰ ক্ষেত্ৰত কোনো নিয়মো মানি চলা নাই ইডিয়ে৷
আমি ইয়াৰ বিৰুদ্ধে আইনী যুঁজ কৰিম৷ বিজেপিয়ে ভয় খোৱাই ডিএমকেৰ একো কৰিব নোৱাৰে৷’
অভিযোগ অনুসৰি প্ৰয়াত নেত্ৰী জয়ললিতা মুখ্যমন্ত্ৰী থকা অৱস্থাতেই এই দুৰ্নীতি কৰিছিল বালাজীয়ে৷ কিন্তু এই বিষয়টোক লৈ উচ্চতম ন্যায়ালয়ে এতিয়াহে ইডিক তদন্তৰ নিৰ্দেশ দিছে৷ উচ্চতম ন্যায়ালয়ৰ নিৰ্দেশৰ পাছতেই ইডিয়ে বালাজীৰ লগতে বালাজীৰ ঘনিষ্ঠ কেইবাজনৰ ঘৰত তালাচি চলোৱা পৰিলক্ষিত হৈছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
