১ জুলাইৰ পৰা দেশত কেইবাটাও ডাঙৰ আৰ্থিক দিশত পৰিৱৰ্তন কাৰ্যকৰী হ’ব। এই পৰিৱৰ্তনে লাখ লাখ শ্ৰমিক, পাছপ’ৰ্টধাৰী, পেঞ্চনাৰ, আৰু ক্ৰেডিট কাৰ্ড ব্যৱহাৰকাৰীক প্ৰভাৱিত কৰিব। গতিকে প্ৰতিটো আপডেটৰ বিষয়ে অৱগত হোৱাটো অতি গুৰুত্বপূৰ্ণ। সময়মতে নিয়ম মানি চলিলে আপুনি শাস্তি আৰু অপ্ৰয়োজনীয় হেঁচা পৰিহাৰ কৰিব পাৰে।
ইউ পি আইৰ জৰিয়তে পি এফ উলিওৱাটো সহজ
জুলাই মাহত কৰ্মচাৰী প্ৰভিডেণ্ট ফাণ্ড অৰ্গেনাইজেশ্যনে নতুন ডিজিটেল প্লেটফৰ্ম ইপিএফঅ’ ৩.০ মুকলি কৰাৰ সম্ভাৱনা আছে। এই নতুন ব্যৱস্থাৰ লক্ষ্য হৈছে ব্যক্তিসকলক উন্নত আৰু সহজ অনলাইন সেৱা প্ৰদান কৰা। কাৰ্যকৰী হ’লে ইপিএফ একাউণ্টধাৰীয়ে ইউপিআইৰ জৰিয়তে পোনপটীয়াকৈ পিএফৰ ধন উলিয়াব পাৰিব। বৰ্তমান পি এফৰ পুঁজি উলিয়াবলৈ কেইবাদিনো লাগে যদিও নতুন ব্যৱস্থাটো কাৰ্যকৰী হ’লেই এই প্ৰক্ৰিয়াটো বহুত ক্ষীপ্ৰ আৰু সহজ হ’ব পাৰে। ইয়াৰ দ্বাৰা লাখ লাখ কৰ্মচাৰীয়ে যথেষ্ট সকাহ পাব।
ডিয়াৰনেছ এলাৱেন্স (ডি এ) বৃদ্ধিৰ আশা
প্ৰতি বছৰে কেন্দ্ৰীয় চৰকাৰে জানুৱাৰী আৰু জুলাই মাহত ডিয়াৰনেছ এলাৱেন্স (ডি এ) পুনৰীক্ষণ কৰে। সেয়ে ২০২৬ চনৰ জুলাই মাহত কেন্দ্রীয় চৰকাৰৰ লাখ লাখ কর্মচাৰী আৰু পেঞ্চনাৰৰ ডি এ বৃদ্ধিৰ অপেক্ষাত আছে৷ মুদ্ৰাস্ফীতি বৃদ্ধিৰ মাজতে ইয়াৰ দ্বাৰা মানুহক কিছু সকাহ দিব পাৰে। অৱশ্যে চৰকাৰৰ পৰা চূড়ান্ত ঘোষণাৰ বাবে এতিয়াও অপেক্ষা কৰি আছে।
এইচ ডি এফ চি বেংকৰ ক্ৰেডিট কাৰ্ডৰ নিয়ম
এইচ ডি এফ চি বেংকে ৰেগালিয়া গোল্ড আৰু ডাইনাৰ্ছ ক্লাব প্ৰিভিলেজ ক্ৰেডিট কাৰ্ডৰ চৰ্তসমূহ সংশোধন কৰিছে। ইতিমধ্যে কিছু পৰিৱৰ্তন কাৰ্যকৰী কৰা হৈছে, আনহাতে বিমানবন্দৰৰ লাউঞ্জৰ প্ৰৱেশ সম্পৰ্কীয় নতুন নিয়ম ২০২৬ চনৰ ১ জুলাইৰ পৰা কাৰ্যকৰী হ’ব।নতুন নিয়ম অনুসৰি ৰেগালিয়া গোল্ড কাৰ্ডধাৰীসকলে বিনামূলীয়া ঘৰুৱা বিমানবন্দৰৰ লাউঞ্জৰ প্ৰৱেশৰ সুবিধা লাভ কৰিবলৈ পূৰ্বৰ ত্ৰৈমাসিকত কমেও ৬০,০০০ টকা খৰচ কৰিব লাগিব। যদি নিৰ্দিষ্ট খৰচ পূৰণ নহয় তেন্তে বিনামূলীয়া লাউঞ্জৰ প্ৰৱেশ জব্দ কৰা হ’ব।
এছ বি আই কাৰ্ডৰ পুৰস্কাৰ পইণ্টৰ পৰিৱৰ্তন
এছ বি আই কাৰ্ডে ইয়াৰ ফোনপে এছ বি আই কাৰ্ড পাৰ্পল আৰু ফোনপে এছ বি আই কাৰ্ড চিলেক্ট ব্লেক ক্ৰেডিট কাৰ্ডৰ চৰ্তসমূহো সংশোধন কৰিছে। ২০২৬ চনৰ ১ জুলাইৰ পৰা কাৰ্যকৰী হোৱাকৈ এই কাৰ্ডসমূহত মাহেকীয়া পুৰস্কাৰ পইণ্ট সংগ্ৰহৰ সীমা স্থাপন কৰা হ’ব। বীমা প্ৰিমিয়াম আৰু অন্যান্য খৰচৰ ওপৰত লাভ কৰা পুৰস্কাৰ পইণ্টৰ সীমা বেলেগ বেলেগ হ’ব। অনলাইন ক্ৰয়ৰ ক্ষেত্ৰত লাভ কৰা সৰ্বোচ্চ পুৰস্কাৰ পইণ্টো হ্ৰাস কৰা হৈছে।
পাছপ’ৰ্ট লোৱাটো ব্যয়বহুল হ’ব
২০২৬ চনৰ ১ জুলাইৰ পৰা পাছপ’ৰ্ট লাভ কৰাটো পূৰ্বতকৈ অধিক ব্যয়বহুল হৈ পৰিব। প্ৰায় ১৪ বছৰৰ মূৰত চৰকাৰে বৃদ্ধি কৰিলে পাছপ’ৰ্ট মাচুল। নতুন নিয়ম কাৰ্যকৰী হোৱাৰ পিছত পাছপ’ৰ্ট লাভৰ বাবে ১০০০ টকাৰ পৰা ২৫০০ টকা অধিক খৰচ হ’ব পাৰে। এই নতুন মাচুল সকলো ধৰণৰ পাছপ’ৰ্টৰ আবেদনৰ ক্ষেত্ৰত প্ৰযোজ্য হ’ব। অৰ্থাৎ যদি আপুনি প্ৰথমবাৰৰ বাবে পাছপ’ৰ্টৰ বাবে আবেদন কৰিছে, পুৰণি পাছপ’ৰ্ট নবীকৰণ কৰিছে, হেৰুৱা বা ক্ষতিগ্ৰস্ত পাছপ’ৰ্ট সলনি কৰিছে, বা আপোনাৰ সন্তানৰ বাবে পাছপ’ৰ্ট লাভ কৰিছে, তেন্তে প্ৰতিটো শিতানত বৃদ্ধি পোৱা মাচুল দিব লাগিব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
