পাটনা উচ্চ ন্যায়ালয়ৰ শেহতীয়া এটা ৰায়ৰ পিছত ‘ধ*ৰ্ষণৰ অপচেষ্টা’ক লৈ সমগ্ৰ দেশজুৰি পুনৰ তীব্ৰ চৰ্চা আৰম্ভ হৈছে। কোনো মহিলাৰ কাপোৰ খোলাৰ অপচেষ্টা, কাপোৰ ফালি দিয়া বা মহিলাৰ বুকুত বলপূৰ্বকভাৱে হাত দিয়া কাৰ্যক আইনৰ দৃষ্টিত ‘ধ*ৰ্ষণৰ অপচেষ্টা’ বুলি গণ্য কৰা হ’ব নেকি? এই প্ৰশ্নৰ উত্তৰ বিচাৰিবলৈ উচ্চতম ন্যায়ালয়ৰ পূৰ্বৰ ৰায় আৰু ভাৰতীয় ন্যায় সংহিতা (BNS)ৰ বিধানসমূহলৈ দৃষ্টি দিব লাগিব। মহিলা আৰু শিশুৰ বিৰুদ্ধে সংঘটিত যৌ*ন অপৰাধৰ ক্ষেত্ৰত আদালতৰ বহু ৰায়েই সময়ে সময়ে ৰাষ্ট্ৰীয় পৰ্যায়ত বিতৰ্কৰ সৃষ্টি কৰিছে। বহু ক্ষেত্ৰত আদালতৰ আইনী ব্যাখ্যাক লৈ প্ৰশ্ন উত্থাপন হয় আৰু আইনৰ সীমা ক’ত শেষ হয় সেই বিষয়েও বিস্তৃত আলোচনা হয়। শেহতীয়াকৈ ২০০৮ চনৰ বিহাৰৰ এটা ঘটনাক লৈ পাটনা উচ্চ ন্যায়ালয়ৰ ৰায় পুনৰ বিতৰ্কৰ কেন্দ্ৰবিন্দু হৈ পৰিছে। আদালতে উপলব্ধ প্ৰমাণৰ ভিত্তিত কয় যে, এই বিশেষ ঘটনাত মহিলাৰ কাপোৰ খোলাৰ চেষ্টা আৰু মহিলাৰ বুকুত বলপূৰ্বকভাৱে হাত দিয়া কাৰ্যক ‘ধ*ৰ্ষণৰ চেষ্টা’ বুলি গণ্য কৰিব নোৱাৰি।
আদালতত কেনেকুৱা ঘটনাক ‘ধ*ৰ্ষণৰ চেষ্টা’ বুলি গণ্য কৰা হ’ব?
পাটনা উচ্চ ন্যায়ালয়ৰ ৰায়ৰ পিছতে প্ৰশ্ন উঠিছে মহিলাৰ কাপোৰ খোলাৰ চেষ্টা, বলপূৰ্বক যৌ*ন আক্ৰমণ বা যৌ*ন হিংসাৰ আৰম্ভণিকেই ‘ধ*ৰ্ষণৰ চেষ্টা’ বুলি গণ্য কৰা হ’ব নেকি? এয়া প্ৰথমবাৰৰ বাবে উত্থাপিত হোৱা বিতৰ্ক নহয়, বিগত কেইবছৰমানত এনে বহু ৰায় আহিছে, যিবোৰে এই প্ৰশ্নটো পুনৰ উত্থাপন কৰিছে যে ‘ধ*ৰ্ষণৰ চেষ্টা’ৰ আইনী সীমা আচলতে ক’ত?
আদালতৰ ৰায়সমূহ কিয় বাৰে বাৰে বিতৰ্কলৈ আহে?
২০২১ চনত ‘স্কিন-টু-স্কিন’ মন্তব্যই সমগ্ৰ দেশক আচৰিত কৰি তুলিছিল। তাৰ পিছত ২০২৫ চনত এলাহাবাদ উচ্চ ন্যায়ালয়ে এগৰাকী নাবালিকাৰ এটা ঘটনাত মন্তব্য কৰিছিল যে, মহিলাৰ বুকুত বলপূৰ্বকভাৱে হাত দিয়া কাৰ্য আৰু পায়জামাৰ ৰচী ছিঙি দিয়া মাত্ৰেই ‘ধ*ৰ্ষণৰ চেষ্টা’ বুলি ক’ব নোৱাৰি। পিছত উচ্চতম ন্যায়ালয়ে সেই ৰায় বাতিল কৰি কয় যে, এনে অভিযোগসমূহ কেৱল প্ৰস্তুতি (Preparation) নহয়, বৰঞ্চ ‘ধ*ৰ্ষণৰ চেষ্টা’ৰ দিশলৈ আগবঢ়া স্পষ্ট পদক্ষেপ হিচাপে গণ্য হ’ব পাৰে। এতিয়া পাটনা উচ্চ ন্যায়ালয়ৰ শেহতীয়া এটা ৰায়ে পুনৰ একে বিতৰ্কৰ সূত্ৰপাত ঘটাইছে—একেধৰণৰ ঘটনাক বিভিন্ন আদালতে ভিন্ন দৃষ্টিভংগীৰে মূল্যায়ন কৰি আছে নেকি?
পাটনা উচ্চ ন্যায়ালয়ৰ ঘটনাটো কি?
২০০৮ চনত বিহাৰৰ বাঁকা জিলাৰ এখন ফটো ষ্টুডিঅ’ৰ এটা ঘটনাৰ ৰায়ক লৈ আৰম্ভ হৈছে নতুন বিতৰ্ক। অভিযোগ অনুসৰি, এগৰাকী যুৱতীয়ে নিজৰ পিতৃৰ সৈতে ফটো তুলিবলৈ ষ্টুডিঅ’লৈ গৈছিল। ফটো তোলাৰ পিছত ষ্টুডিঅ’ৰ মালিকে দেউতাকক বাহিৰলৈ পঠিয়াই ভিতৰৰ দুৱাৰ বন্ধ কৰি দিয়ে। তাৰ পিছত তেওঁ যুৱতীগৰাকীৰ বুকুত বলপূৰ্বকভাৱে হাত দিয়া আৰু পায়জামা খোলাৰ অপচেষ্টা কৰে। যুৱতীগৰাকীয়ে চিঞৰি উঠাত দেউতাক ভিতৰলৈ আহে আৰু অভিযুক্তই ঘটনাস্থলীৰ পৰা পলায়ন কৰে। ট্ৰায়েল কোৰ্টে এই ঘটনাক ‘ধ*ৰ্ষণৰ চেষ্টা’ বুলি গণ্য কৰি অভিযুক্তক দোষী সাব্যস্ত কৰিছিল। কিন্তু পাটনা উচ্চ ন্যায়ালয়ে কয় যে, নথিত থকা প্ৰমাণৰ ভিত্তিত ‘ধ*ৰ্ষণৰ চেষ্টা’ৰ বাবে প্ৰয়োজনীয় আইনী উপাদানসমূহ প্ৰমাণিত হোৱা নাই। সেয়েহে আদালতে ‘Attempt to Rape’ৰ দোষ বাতিল কৰি ইয়াক ‘মহিলাৰ মৰ্যাদা ভংগ’ (Outraging Modesty)-ৰ অপৰাধ বুলি গণ্য কৰে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
