মেডিকেল ৰিপ্ৰেজেণ্টেটিভ বা এম আৰ সকললৈ ডাঙৰ ধাক্কা৷ সমগ্ৰ দেশত কেন্দ্ৰীয় চৰকাৰৰ অধীনত থকা সমস্ত হাস্পতালত মেডিকেল ৰিপ্ৰেজেণ্টেটিভসকলৰ প্ৰৱেশ নিষিদ্ধ কৰা হৈছে৷ কেন্দ্ৰীয় স্বাস্থ্যমন্ত্ৰণালয়ৰ ডাইৰেক্টৰ জেনেৰেল অফ হেলথ ছাৰ্ভিচেছে এই নিৰ্দেশিকা জাৰি কৰিছে৷
এইমছসহ কেন্দ্ৰীয় চৰকাৰ পৰিচালিত সমস্ত হাস্পতালত এই নিৰ্দেশনা কঠোৰভাৱে বলবৎ কৰাৰ নিৰ্দেশ দিয়া হৈছে৷ এম আৰসকলৰ বাবে কোনোধৰণে যাতে হাস্পতালৰ ৰোগীৰ চিকিৎসা অথৱা হাস্পতালৰ স্বাভাৱিক কাম ব্যাহত নহয় সেয়া নিশ্চিত কৰাৰ বাবে হাস্পতাল কৰ্তৃপক্ষসকলক নিৰ্দেশ দিয়া হৈছে৷
নিৰ্দেশনাত জনোৱা হৈছে যে চৰকাৰী হাস্পতালৰ চিকিৎসকসকলক কোনো ঔষধ বা চিকিৎসা পদ্ধতি সম্পৰ্কে জনাবলগীয়া থাকিলে ই মেইল অথৱা অন্যান্য ডিজিটেল মাধ্যমৰ সহায় লব পাৰে মেডিকেল ৰিপ্ৰেজেণ্টেটিভসকলে৷ এম আৰৰ বিৰুদ্ধে ৰোগীৰ অভিযোগ নতুন কথা নহয়৷ দীৰ্ঘদিন ধৰি এই অভিযোগ আছিল যে এম আৰসকলক সময় দিবলৈ গৈ হাস্পতালৰ বহিৰ্বিভাগসমূহত ৰোগীসকলক কম সময় দিয়ে চিকিৎসকে স্বাস্থ্য পৰিসেৱাক লৈ কাম কৰা একাধিক সংগঠনৰ অভিযোগ আছিল যে চিকিৎসকসকলক প্ৰভাৱিত কৰাৰ বাবে দামী উপহাৰ, বিদেশ যাত্ৰাৰ দৰে একাধিক টোপ দিয়ে এম আৰসকলে৷ ইয়াৰ ফলত এফালে ৰোগীৰ চিকিৎসাৰ সময়ত চিকিৎসকৰ সিদ্ধান্তগ্ৰহণত প্ৰভাৱিত হোৱাৰ আশংকা থাকে৷ চিকিৎসকলে দামী উপহাৰ, বিদেশ যাত্ৰাৰ খৰচৰ দাম উঠাবলৈকে ঔষধৰ মূল্য অস্বাভাৱিক হাৰত বঢ়াই দিয়া হয় বুলি অভিযোগ উঠি আহিছে৷
স্বাস্থ্য মন্ত্ৰণালয়ৰ এগৰাকী কৰ্তাই কয়, সকলোৱে জানে যে এম আৰসকলে চিকিৎসকক ঔষধ সম্পৰ্কে জাননি দিবলৈ আহে তেনে নহয়৷ বৰং তেওঁলোকক চাপো দিয়ে৷ ইণ্ডিয়ান মেডিকেল এছচিয়েছনৰ প্ৰাক্তন জাতীয় সম্পাদক বিনয় অগ্ৰবালৰ দৰে এম আৰৰ চৰকাৰী হাস্পতালত প্ৰৱেশ সম্পূৰ্ণ বন্ধ নকৰি নিয়ন্ত্ৰণ কৰা উচিত৷ কোনো এম আৰে যদি ঔষধ বিক্ৰিৰ বাবে চিকিৎসকসকলক উপহাৰ দিয়া বা অন্য কোনো ধৰণৰ অসাধু উপায় অৱলম্বন কৰিবলৈ গৈ ধৰা পৰে তেওঁলোকৰ বিৰুদ্ধেহে ব্যৱস্থা গ্ৰহণ কৰিব লাগে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
