ৰাহুল গান্ধীৰ মণিপুৰ ভ্ৰমণৰ সময়তে ৰাজ্যখনত গুলীচালনাৰ ঘটনা
আজি ৮ জুলাই সোমবাৰে মণিপুৰৰ জিৰিবামত বিৰোধী দলপতি ৰাহুল গান্ধীৰ আগমনৰ কেইঘণ্টামান পূৰ্বে অশান্ত জিলাখনত গুলিচালনাৰ ঘটনা সংঘটিত হৈছে। জিলাখনৰ আৰক্ষীৰ এটা আউটপোষ্টত বন্দুকধাৰীয়ে গুলীচালনা কৰে।
অসমৰ কাছাৰ জিলাৰ সীমান্তৱৰ্তী ক্ষুদ্ৰ জিলা তথা যোৱা মাহত ৰাজ্যখনত হিংসাত্মক পৰিস্থিতিয়ে অশান্তি বিয়পোৱা জিৰিবাম ভ্ৰমণৰ পৰা আৰম্ভ কৰি সোমবাৰে মণিপুৰত দিনজোৰা ভ্ৰমণৰ বাবে ৰাহুল গান্ধী উপস্থিত হৈছে। ইয়াৰ পিছতে তেওঁ মণিপুৰৰ আন দুখন ঠাই চুৰাচান্দপুৰ আৰু বিষ্ণুপুৰ জিলা ভ্ৰমণ কৰাৰ কথা।
জিৰিবামৰ আৰক্ষী অধীক্ষক প্ৰদীপ সিঙে সংবাদ মাধ্যমক জনোৱা মতে, আজি পুৱা প্ৰায় ১০ মান বজাৰ ভিতৰত টামেংলং আৰক্ষীয়ে গুলীচালনাৰ সৈতে জড়িত থকা কুকি-জো সম্প্ৰদায়ৰ দুজন লোকক গ্ৰেপ্তাৰ কৰাৰ লগতে কিছু অস্ত্ৰ-শস্ত্ৰও উদ্ধাৰ কৰে।
গুলীচালনাত কোনো লোক আহত হোৱা নাই যদিও গুলীচালনাৰ সন্মুখীন হোৱা বস্তুবোৰৰ ভিতৰত আছিল এখন কেছস্পিৰ বাহন। লগতে আৰক্ষী বিষয়াগৰাকীয়ে সদৰি কৰা অনুসৰি, এই আক্ৰমণ প্ৰতিহত কৰাৰ বাবে আৰক্ষী, চি আৰ পি এফ আৰু আছাম ৰাইফলছৰ মাজত উপযুক্ত সামগ্ৰী তথা সুবিধা আছিল।
৬ জুনত মেইটেইৰ এজন বাসিন্দা ছয়বাম সাৰথকুমাৰ সিংক নিহত অৱস্থাত উদ্ধাৰ হোৱাৰ পিছত জিৰিবামত উত্তেজনাৰ সৃষ্টি হয়। যাৰ বাবে এতিয়া ১০০০ৰো অধিক কুকি-জো সম্প্ৰদায়ৰ লোকে জিলাখনৰ পৰা ওলাই আহি কাছাৰত আশ্ৰয় বিচাৰিছে।
ইয়াৰ পিছত জিলাখনৰ বৰোবেকৰা সংমণ্ডলত বাস কৰা মেইটেই পৰিয়ালৰ ঘৰ জ্বলাই দিয়া হৈছে। ঘৰ জ্বলাই দিয়াৰ ফলত এই অঞ্চলৰ ৯০০ৰো অধিক লোক স্থানচ্যুত হয়। এতিয়া জিলাখনৰ সাহায্য শিবিৰত আশ্ৰয় লৈ আছে সকলো লোক।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
