অপাৰেছন সেন্দূৰৰ পাছৰে পৰা জম্মু কাশ্মীৰৰ নিয়ন্ত্ৰনৰেখাৰ ওচৰত পাকিস্তানে লেথাৰিকৈ গোলাবৰ্ষণ কৰি আছে৷ সেই আক্ৰমণৰ ওলোটাই প্ৰত্যুত্তৰো দিছে ভাৰতীয় সেনাই৷ পহেলগাম কাণ্ডৰ পাছৰে পৰাই নিয়ন্ত্ৰণৰেখাত উত্তেজনা বৃদ্ধি পাইছে৷
মঙলবাৰে মাজনিশা পাক অধিকৃত কাশ্মীৰ আৰু পাক ভূখণ্ডত প্ৰত্যাঘাত কৰিছে ভাৰতে৷ সেই প্ৰত্যাঘাতৰ পাছতেই জম্মু কাশ্মীৰৰ পুঞ্চ, ৰাজৌৰি, আখনুৰ আৰু বাৰামুলাত পাকিস্তানে গোলাবৰ্ষণ কৰিছে৷ সেই বোমাবৰ্ষণতেই নিহত হৈছে ১৩ গৰাকী লোক৷ তেওঁলোকৰ মাজত আছে লেন্সনায়ক দীনেশ শৰ্মাও৷ পুঞ্চত সেনাৰ এফ ডি ৰেজিমেণ্টত কৰ্মৰত আছিল তেঁও৷ নিয়ন্ত্ৰণৰেখাত পাকিস্তানে সংঘৰ্ষবিৰতি উলংঘন কৰাৰ বাবেই তাত মোতায়েন কৰা হৈছিল ৫ এফ ডি ৰেজিমেণ্টৰ জোৱান৷ সেই দলত আছিল দীনেশো৷ পাকিস্তানে দলিওৱা বোমাত আঘাতপ্ৰাপ্ত হৈছিল দীনেশ৷ তাৰপিছতেই হাস্পতালত ভৰ্তি কৰোৱা হৈছিল দীনেশক৷ হাস্পতালতেই দীনেশে মৃত্যুক সাবটি লয়৷
দীনেশৰ বন্ধু প্ৰদীপে কয়, ‘৬মে’ৰ নিশা চাৰে ১০ বজাত দীনেশক ফোন কৰিছিলো৷ তেওঁৰ সৈতে কিছুক্ষণ কথা হৈছিল৷ তেতিয়া মোক কৈছিল, মিছনলৈ ওলাইছো৷ যি হয় খবৰ দিম৷ তাৰপিছতেই ৭মে’ৰ পুৱা ৪ বজাত দীনেশৰ ফোন আহে৷ মই ফোন ধৰিব নোৱাৰিলো৷’ প্ৰদীপে আকৌ কয়, ‘পাছত মই ফোন কৰিছিলো৷ কেৱল হেল্ল শুনাৰ পাছতেই ফোনটো কাটি গৈছিল৷ আকৌ পুৱা ৭ বজাত ফোন কৰো৷ তেতিয়া মই কৈছিলো, ভাই সকলো ঠিকে আছেতো৷ কিন্তু সেই ফোনটো দীনেশে ধৰা নাছিল৷ অন্য এজনেহে ফোন ধৰিছিল৷ তেওঁ কৈছিল বোমাবৰ্ষণত দীনেশ আহত হৈছে৷ তেওঁৰ চিকিৎসা চলিছে৷ মই ফোনটো ৰাখিলো৷ তাৰ কিছুসময়ৰ পাছতেই সংবাদমাধ্যমত দেখা পাওঁ আটাইতকৈ দুখজনক খবৰটো৷ দীনেশ আৰু এই পৃথিৱীত নাই৷’
দীনেশৰ পাঁচ ভায়েক৷ তেওঁৰ পিতৃ দয়ানন্দ শৰ্মাই জনাইছে, পাঁচ ভায়েকৰ মাজত দীনেশ ডাঙৰ৷ দীনেশৰ আন দুই ভাতৃ সেনাত কৰ্মৰত৷ তেওঁৰ সৰু ভায়েক সেনাৰ মেডিকেল বিভাগত কৰ্মৰত৷ সেই সৰু ভায়েকে জনাইছে যে দীনেশৰ ৮বছৰীয়া দুই সন্তান আছে৷ তেওঁৰ পত্নী পুনৰ অন্তঃসত্ত্বা হৈ আছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
