জম্মু আৰু কাশ্মীৰৰ পহেলগামৰ পৰ্যটক হত্যাকাণ্ডৰ পাছত বুধবাৰে নিশা পাকিস্তানৰ বিৰুদ্ধে পাঁচ দফাৰ পদক্ষেপ ঘোষণা কৰিছিল নৰেন্দ্ৰ মোদীৰ চৰকাৰে৷ পুৱাৰ ভাগতেই ষষ্ঠ পদক্ষেপো গ্ৰহণ কৰিছে ভাৰত চৰকাৰে৷ পাকিস্তানৰ চৰকাৰী এক্স একাউণ্টটো ভাৰতত বন্ধ কৰি দিয়া হৈছে৷ বৃহস্পতিবাৰে পুৱাই এই সিদ্ধান্ত লোৱা হৈছে৷
পহেলগামৰ পৰ্যালোচনাত বুধবাৰে সন্ধিয়া দিল্লীত প্ৰধানমন্ত্ৰীয়ে ৭ লোককল্যাণ মাৰ্গৰ চৰকাৰী বাসভৱনত বৈঠকত বহিছিল কেন্দ্ৰীয় মন্ত্ৰীসভাৰ নিৰাপত্তা সংক্ৰান্তিয় কমিটি৷ প্ৰায় আঢ়ৈ ঘণ্টা ধৰি চলা বৈঠকৰ শেষত নিশা ৯ বজাত সাংবাদিকৰ মুখামুখি হয় বিদেশসচিব বিক্ৰম মিস্ৰী৷ তেওঁ পাকিস্তানৰ বিৰুদ্ধে পাঁচটা পদক্ষেপৰ কথা ঘোষণা কৰিছে৷ যিমান দিন পাকিস্তানৰ আন্তঃসীমান্ত সন্ত্ৰাসৰ প্ৰতি তেওঁৰ সমৰ্থন কৰি যাব সিমান দিন জলবণ্টন চুক্তি স্থগিত ৰখাৰ সিদ্ধান্ত লৈছে নতুন দিল্লীয়ে৷
ইয়াৰোপৰি আটাৰি, ৱাঘা সীমান্তত চলাচল বন্ধ কৰা, উপযুক্ত নথিপত্ৰ লৈ যিসকলে এই সীমান্ত পাৰ হৈ ভাৰতত প্ৰৱেশ কৰিছে তেওঁলোকেও ১ মে’ৰ ভিতৰত পাকিস্তানলৈ উভতি যাব লাগিব৷ ভাৰতে জনাই, ছাৰ্ক ভিছা অব্যাহতি প্ৰকল্পৰ অধীনত কোনো পাকিস্তানী নাগৰিকক আৰু দেশত প্ৰৱেশ কৰিবলৈ দিয়া নহ’ব৷ অতীতত এই ভিছাৰ প্ৰৱেশৰ বাবে পাকিস্তানীসকলক যি অনুমতি দিয়া হৈছিল সেয়া বাতিল কৰা হৈছে৷ সেই ভিছা প্ৰকল্পৰ অধীনত যি সমস্ত পাকিস্তানী এতিয়া ভাৰতত আছে তেওঁলোকে আগন্তুক ২৪ ঘণ্টাৰ ভিতৰত তেওঁলোকে দেশ এৰিব লাগিব বুলিও জনাইছে মিশ্ৰীয়ে৷ ইয়াৰোপৰি পাকিস্তানৰ সামৰিক উপদেষ্টাসকলে অবাঞ্চিত ঘোষণা কৰাৰ ওপৰিও সেই দেশৰ ভাৰতীয় দূতবাসৰ সদস্য সংখ্যা ৫৫ৰ পৰা কমাই ৩০ কৰা হৈছে বুলিও জনাইছে মিশ্ৰীয়ে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
