জম্মু আৰু কাশ্মীৰৰ পহেলগামত পৰ্যটকৰ ওপৰত সন্ত্ৰাসবাদী আক্ৰমণৰ ঘটনাৰ পাছতেই পাকিস্তানৰ কঠোৰ হৈছে ভাৰত চৰকাৰ৷ পাকিস্তানৰ বিৰুদ্ধে একাধিক কাঢ়া সিদ্ধান্ত লৈছে ভাৰত চৰকাৰে৷ বন্ধ কৰি দিয়া হৈছে আটাৰি-ৱাঘা সীমান্তও৷ এই সীমান্তৰেই পাকিস্তানৰ সৈতে ভাৰতৰ বাণিজ্যিক লেন দেন চলে৷ এই সীমান্ত বন্ধ হোৱাৰ লগে লগেই ভাৰতৰ সৈতে পাকিস্তানৰ বাণিজ্যিক সম্পৰ্কতো বাধা আহিছে৷ বহু পণ্যৰ আমদানি আৰু ৰপ্তানী বন্ধ হৈ যাব বুলি জনাইছে বাণিজ্যিক বিশেষজ্ঞই৷ ক্ষতিগ্ৰস্থ হ’ব পাৰে দুই দেশৰেই অৰ্থনীতি৷ বিশেষজ্ঞৰ ধাৰণা যে ইয়াৰ ফলত পাকিস্তানৰেই সমস্যা বেছি হ’ব পাৰে৷
অমৃতসৰৰ পৰা মাত্ৰ ২৮ কিঃমিঃ দূৰৈত আটাৰী ভাৰতৰ প্রথম স্থলবন্দৰ৷ পাকিস্তানৰ সৈতে স্থলপথেৰে এয়া একমাত্ৰ পথ যি পথেৰে ভাৰতৰ বাণিজ্যৰ অনুমতি আছে৷ ১২০ একৰ মাটিত বিস্তৃত এক নম্বৰ ৰাষ্ট্ৰীয় ঘাইপথেৰে সংযুক্ত আটাৰী ভাৰত-পাকিস্তানৰ বাণিজ্যৰ অন্যতম কাণ্ডাৰী৷ আফগানিস্তানৰ পণ্য আমদানিৰ ক্ষেত্ৰতো আটাৰীৰ ভূমিকা গুৰুত্বপূৰ্ণ৷
পৰিসংখ্যাই কৈছে ২০২৩-২৪চনত আটাৰী-ৱাঘা সীমান্তৰে মুঠ ৩,৮৮৬.৫৩ কোটি টকাৰ বাণিজ্য হৈছে৷ ৭১, ৫৬৩ জন মানুহে এবছৰত এই সীমান্ত দি যাতায়াত কৰিছে৷ ভাৰতৰ পৰা যি সমস্ত পণ্য এই পথেৰে পাকিস্তানলৈ ৰপ্তানী কৰা হৈছে৷ তাৰ মাজত উল্লেখযোগ্য হৈছে ছয়াবিন, মুৰ্গীৰ দানা, পাচলি, শুকান জলকীয়া, প্লাষ্টিক দানা, সুঁতা আদি৷ ইয়াৰোপৰি পাকিস্তান আৰু আফগানিস্তানৰ পৰা এই পথেৰে ভাৰতলৈ আহে মূলত শুকান ফল, খেজুৰ, চিমেণ্ট, জিপছাম, কাচ, নিমখ বা ব্লেক ছল্ট আদি নানান প্ৰকাৰৰ ঔষধ৷ সীমান্ত বন্ধ হৈ গ’লে এই সমস্ত পণ্যৰ আদানপ্ৰদানৰো সমস্যা হ’ব৷ বিশেষকৈ এই ধৰণৰ সৰু আৰু মাঝাৰি শিল্পৰ ওপৰত নিৰ্ভৰ কৰি যিসকল চলি আছিল তেওঁলোকৰ সমস্যা হ’ব পাৰে বুলি জনাইছে বিশেষজ্ঞই৷
২০১৮-১৯ চনত ভাৰত আৰু পাকিস্তানৰ মাজত বাণিজ্য তুলনামূলকভাৱে কমি গৈছে৷ ভাৰতৰ আটাৰী সীমান্ত বন্ধৰ সিদ্ধান্তই এই বাণিজ্যত আৰু প্ৰভাৱ পেলাব পাৰে বুলি অনুমান কৰিছে বিশেষজ্ঞই৷ আফগানিস্তানৰ পণ্য আমদানিতো ইয়াৰ প্ৰভাৱ পৰিব৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
