পহেলগামৰ সন্ত্ৰাসবাদী আক্ৰমণৰ পাছতেই ওলোটাই একশ্ব্যন মুডত আছে ভাৰত৷ জম্মু-কাশ্মীৰৰ প্ৰতিটো কোণত চলিছে সন্ত্ৰাসবাদী বিচাৰি অভিযান৷ পহেলগামৰ সন্ত্ৰাসবাদী আক্ৰমণৰ পাছতেই আজি সৰ্বদলীয় বৈঠকো মাতিছে কেন্দ্ৰীয় চৰকাৰে৷ সন্ধিয়া ৬ বজাত সংসদ ভৱনত এই বৈঠক অনুষ্ঠিত হব৷ কেন্দ্ৰীয় গৃহমন্ত্ৰী অমিত শ্বাহ, প্ৰতিৰক্ষা মন্ত্ৰী ৰাজনাথ সিঙে সমস্ত ৰাজনৈতিক দলৰ সৈতে মিলিত হ’ব৷
এই বৈঠকৰ পূৰ্বেই বিহাৰৰ পৰা ডাঙৰ বাৰ্তা দিলে প্ৰধানমন্ত্ৰী মোদীয়ে৷ নিহতৰ প্ৰতি শ্ৰদ্ধা জ্ঞাপন কৰি প্ৰধানমন্ত্ৰীয়ে ভাষণৰ পূৰ্বে ২ মিনিট মৌন প্ৰাৰ্থনাও কৰে৷ পহেলগামত নিহতসকলৰ প্ৰতি সমবেদনা জনাই প্ৰধানমন্ত্ৰীয়ে হাতযোৰ কৰি ওম শান্তি মন্তপাঠো কৰে৷ ইয়াৰপাছতেই সন্ত্ৰাসবাদীৰ বিৰুদ্ধে চৰম বাৰ্তা দিছে প্ৰধানমন্ত্ৰীগৰাকীয়ে৷
বিহাৰৰ মধুবনিৰ অনুষ্ঠানৰ পৰা মোদীয়ে কয়, ‘কাশ্মীৰত বাছি বাছি হিন্দু নিধন কৰা হৈছে৷ পহেলগামত নিৰীহসকলক নিৰ্মমভাৱে হত্যা কৰিছে সন্ত্ৰাসবাদীয়ে৷ এই আক্ৰমণ কেৱল পৰ্যটকৰ ওপৰতেই নহয়, এয়া ভাৰতৰ আত্মাৰ ওপৰত আক্ৰমণ৷ আক্ৰমণকাৰী আৰু ষড়যন্ত্ৰকাৰীয়ে কল্পনাও কৰিব নোৱাৰিব তেওঁলোকৰ শাস্তি কি হব৷ আক্ৰমণকাৰী আৰু ষড়যন্ত্ৰকাৰীসকলক এটা এটাকৈ বাচি ওলিয়াই শাস্তি দিব ভাৰতে৷ ১৪০ কোটি মানুহৰ ইচ্ছাশক্তিয়ে সন্ত্ৰাসবাদৰ কঁকাল ভাঙিব৷ আক্ৰমণকাৰীক কল্পনাতীত শাস্তি দিম৷’
https://x.com/ANI/status/1915311175077945455
প্রধানমন্ত্ৰী মোদীয়ে লগতে কয়, ‘কোটি কোটি ভাৰতবাসী আজি শোকগ্ৰস্ত৷ নিহতৰ পৰিয়ালৰ কাষত আছে আজি সমগ্ৰ দেশ৷ যিসকলৰ চিকিৎসা চলিছে তেওঁলোক দ্ৰুতভাৱে সুস্থ হৈ উঠক, তেওঁলোকৰ বাবে চৰকাৰে সকলো ধৰণৰ চেষ্টা কৰিব৷ এই আক্ৰমণত কোনোৱে যদি পুত্ৰক হেৰুৱাইছে, কোনোৱে ভাতৃক হেৰুৱাইছে, কোনোৱে স্বামীক হেৰুৱাইছে৷ আজি তেওঁলোকৰ মৃত্যুত কাৰ্গিলৰ পৰা কন্যাকুমাৰীলৈকে আমাৰ সকলোৰে শোকবোৰ ক্ষোভলৈ পৰিণত হৈছে৷ আজি বিহাৰৰ মাটিৰ পৰা আমি সমগ্ৰ বিশ্বক জনাব খুজিছো, ভাৰতে অৱশ্যেই প্ৰত্যেকজন সন্ত্ৰাসবাদীক বিচাৰি ওলিয়াব৷ চিহ্নিত কৰি শাস্তি দিব৷’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
