প্ৰত্যক্ষভাৱে হওক বা পৰোক্ষভাৱে হওক সকলো পাকিস্তানী পণ্য কোনোধৰণেই দেশত প্ৰৱেশ কৰিব নোৱাৰিব৷ পহেলগাম কাণ্ডৰ পাছতেই উদ্ভূত পৰিস্থিতিত পাকিস্তানৰ পৰা প্ৰত্যক্ষ আৰু পৰোক্ষ সমস্ত আমদানি নিষিদ্ধ কৰিলে ভাৰতে৷ বাণিজ্য মন্ত্ৰণালয়ৰ পৰা বিজ্ঞাপ্তি জাৰি কৰি এই কথা জনোৱা হৈছে৷ বিজ্ঞাপ্তিত কোৱা হৈছে পাকিস্তানে তৈয়াৰ কৰা কোনো পণ্য চিধাকৈ বা ঘূৰিও আমদানি কৰিব নোৱাৰিব দেশে৷ জাতীয় নিৰাপত্তা আৰু চৰকাৰী নীতিৰ স্বাৰ্থত এই নিষেধাজ্ঞাৰ সিদ্ধান্ত লোৱা হৈছে৷ পৰবৰ্তী নিৰ্দেশিকা জাৰি নকৰা পৰ্যন্ত এই সিদ্ধান্ত কাৰ্যকৰী থাকিব৷ এই নিৰ্দেশিকাৰ কোনো সালসলনি কৰিলেও ভাৰত চৰকাৰে এই বিষয়ে পূৰ্বেই নিজা সিদ্ধান্ত বিজ্ঞাপ্তিৰ জৰিয়তে প্ৰকাশ কৰিব বুলিও জনাই দিছে৷
আন্তৰ্জাতিক বাণিজ্য সম্পৰ্কে একাংশৰ মত, পাকিস্তানৰ পৰা বেছি পৰিমানৰ পণ্য ভাৰতে আমদানি নকৰে৷ পৰোক্ষভাৱেই ডুবাই হৈ কিছু পণ্য ভাৰতলৈ আহে৷ বিশেষকৈ, পোছাক, মছলা, সৰু যন্ত্ৰাংশৰ দৰে কিছু পণ্য পৰোক্ষভাৱে ভাৰতৰ বজাৰলৈ আহে৷ বাণিজ্য মহলৰ কিছু সংখ্যক বিশেষজ্ঞৰ মতে, পৰোক্ষভাৱেও এতিয়া পাকিস্তানী কোনো পণ্য ভাৰতে আমদানি নকৰে সেই কথাকেই স্পষ্টভাৱে জনাইছে নৰেন্দ্ৰ মোদী চৰকাৰে৷
বিগত ২২ এপ্ৰিলত পহেলগামৰ আক্ৰমণৰ পাছতেই বুধবাৰে কেন্দ্ৰীয় মন্ত্ৰীসভাৰ নিৰাপত্তা সংক্ৰান্তীয় কমিটি বৈঠকত বহিছিল৷ সেই বৈঠকৰ পাছতেই পাকিস্তানৰ বিৰুদ্ধে একাধিক কূটনৈতিক পদক্ষেপ ঘোষণা কৰিছিল মোদী চৰকাৰে৷ তাৰ এদিন পাছতেই আকৌ পাকিস্তানেও ভাৰতৰ বিৰুদ্ধে কেইবাটাও কূটনৈতিক পদক্ষেপ লৈছিল৷ ইছলামাবাদেও জনাইছিল যে ভাৰতৰ সৈতে তেওঁলোকে বাণিজ্যিক সম্পৰ্ক স্থগিত ৰখাৰ সিদ্ধান্ত লৈছে৷ তৃতীয় কোনো দেশ হৈয়ো ভাৰতৰ কোনো পণ্য তেওঁলোকে ক্ৰয় নকৰে৷
উল্লেখ্য যে ২০১৯ চনৰ পুলৱামাত হোৱা সন্ত্ৰাসবাদী আক্ৰমণৰ পাছত ভাৰত আৰু পাকিস্তানৰ বাণিজ্যিক সম্পৰ্কত ক্ৰমশ অৱনতি হৈছিল৷ সেই সময়ত ফল, চিমেণ্ট, পেট্ৰোপণ্য, আকৰিকসহ পাকিস্তানৰ পৰা অহা কিছু পণ্যৰ ওপৰত আমদানি শুল্ক ২০০শতাংশ পৰ্যন্ত বৃদ্ধি কৰিছিল ভাৰতে৷ বাণিজ্যিকভাৱে ভাৰতৰ অন্যতম পছন্দৰ দেশৰ তালিকাতৰ পৰা পাকিস্তানত তেতিয়াও আঁতৰাই দিছিল ভাৰতে৷ তাৰপাছৰে পৰা বিগত কেইবাবছৰ ভাৰত আৰু পাকিস্তানৰ বাণিজ্যিক সম্পৰ্ক বিশেষ উন্নত নহয়৷ বিগত বছৰৰ এপ্ৰিলৰ পৰা চলিত বছৰৰ জানুৱাৰীৰ ভিতৰত পাকিস্তানৰ পৰা মাত্ৰ ৪লাখ ২০ হাজাৰ ডলাৰৰ পন্য আমদানি কৰিছে ভাৰতে৷ এবছৰ পূৰ্বেও ইয়াৰ পৰিসংখ্যা আছিল ২০ লাখ ডলাৰতকৈ কম৷
পাকিস্তানী পণ্য আমদানিৰ ওপৰত নিষেধাজ্ঞা আৰোপৰ ওপৰিও পাকিস্তানী পণ্যবাহী জাহাজৰ ওপৰতো নিষেধাজ্ঞা জাৰি কৰা হৈছে৷ ডাইৰেক্টৰেট জেনেৰেল অফ ছিপিংৰ তৰফৰ পৰা জনোৱা হৈছে যে পাকিস্তানৰ পতাকা থকা কোনো জাহাজ ভাৰতীয় বন্দৰত প্ৰৱেশ কৰিব নোৱাৰিব৷ ইয়াৰোপৰি কোনো ভাৰতীয় জাহাজো পাকিস্তানলৈ যাতে নাযায় সেই বিষয়েও সতৰ্কতা জাৰি কৰা হৈছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
