চীনৰ পৰাই হায়দৰাবাদৰ ৰোগীৰ সফল অস্ত্ৰোপচাৰ! বিশ্বজুৰি চৰ্চাত ভাৰতীয় চিকিৎসক, কেনেকৈ এয়া সম্ভৱ কৰি তুলিলে?

খবৰ অনুসৰি এই অভাৱনীয় অস্ত্ৰোপচাৰৰ নেপথ্যত আছিল নিঁখুত পৰিকল্পনা৷ অস্ত্ৰোপচাৰৰ পূৰ্বে ওহান আৰু হায়দৰাবাদৰ চিকিৎসকসকলে অনলাইনত ৰোগীৰ সমস্ত মেডিকেল ৰিপৰ্ট পুংখানুপুংখভাৱে পৰ্যালোচনা কৰিছে৷ ৰবটিক হাতৰ গতিবিধি কেনে হ’ব সেয়াও পূৰ্বৰে পৰাই মেপ বা পৰিকল্পনা কৰি লয়৷ পৰবৰ্তী সময়ত হায়দৰাবাদৰ স্থানীয় চিকিৎসকলে ৰোগীক প্ৰথমে এনাস্থেচিয়া দিয়ে৷ তাৰপিছত ৰবটিক যন্ত্ৰপাতিসমূহ নিঁখুতভাৱে সজাই তোলে৷ যন্ত্ৰপাতিসমূহৰ ভিতৰত আছিল অত্যাধুনিক ছাৰ্জিকেল টুল আৰু হাই ডেফিনেছন থ্ৰিডি কেমেৰা৷ তাৰপিছতেই ডাঃ গাউছে ওহানৰ টংজি হাস্পতালৰ এটা কনছন বক্সত বহে৷ তাৰপৰাই তেওঁ লাইভ থ্ৰিডি ইমেজৰ মাধ্যমেৰে হায়দৰাবাদৰ অপাৰেছন থিয়েটাৰ সম্পূৰ্ণৰূপে দেখা পাইছিল৷ নিজৰ হাতেৰে নিয়ন্ত্ৰণ কৰি আছিল ৰবটিক হাতকেইখনক৷ চীনা প্ৰযুক্তিৰে তৈয়াৰ কৰা এই ৰবটিক হাতে চিকিৎসকৰ হাতৰ নিৰ্দেশতেই কাম কৰিছিল৷ ৫জি প্ৰযুক্তিৰ কাৰণে মাত্ৰ ২০০ মিলি ছেকেণ্ডৰ অৰ্থাৎ এক ছেকেণ্ডৰ পাঁচ ভাগৰ এভাগ সময়ৰ ভিতৰত সমস্ত নিৰ্দেশ চীনৰ পৰা ভাৰত পাইছিল৷ অস্ত্ৰোপচাৰ চলাৰ সময়ত যিকোনো জৰুৰী পৰিস্থিতি চম্ভালিবলৈ অপাৰেছন থিয়েটাৰত বিশেষজ্ঞৰ দল উপস্থিত আছিল৷

চাইনা ডেইলীয়ে জনাইছে যে ইণ্টাৰনেশ্ব্যনেল হেপাটো পেনক্ৰিয়াটো বিলিয়াৰি এছোচিয়েছনৰ দশম কংগ্ৰেছ চলাৰ সময়ত যি ২৬টা অস্ত্ৰোপচাৰ প্ৰদৰ্শন কৰা হৈছিল এয়া তাৰেই এটা অংশ৷ ইয়াৰ মাজত ৫টা অস্ত্ৰোপচাৰ আন্তৰ্জাতিক লাইভ ৰিমোট কানেকছনৰ মাধ্যমেৰে কৰা হয়৷ ভাৰতৰ ওপৰিও ব্ৰাজিল, জৰ্জিয়া, গ্ৰীচ আৰু উজবেকিস্তানৰ বিশেষজ্ঞসকলে ইউৰোলজি গেষ্ট্ৰোইনটেষ্টাইনেল আৰু হেপাটোবিলিয়াৰি চাৰ্জাৰিৰ এই প্ৰদৰ্শনীত অংশ লয়৷

টংজি হাস্পতালৰ চাৰ্জাৰি বিভাগৰ পৰিচালক আৰু এই কৰ্মসূচীৰ অন্যতম উদ্যোক্তা চেন জিয়াওপিঙে কয় যে এ আই, ৫জি, ৬জি আৰু ৰবট প্ৰযুক্তিৰ হাত ধৰি চিকিৎসাক্ষেত্ৰত এক নতুন বিপ্লৱ আহিছে৷ যিয়ে আগন্তুক দিনত স্বাস্থ্য পৰিসেৱাৰ চেহেৰা সম্পূৰ্ণৰূপে সলনি কৰি দিব৷