আই পি এলৰ প্ৰথমখন খেলতেই ধুমুহাৰ সৃষ্টি, ১৫৫.৮ কিলোমিটাৰ বেগত বল কৰি শ্ৰেষ্ঠ খেলুৱৈ হ’ল ময়ংক যাদৱ
জীৱনৰ প্ৰথমখন আই পি এলৰ খেল খেলিয়েই সকলোকে আচৰিত কৰি তুলিলে এগৰাকী ভাৰতীয় বলাৰে। ২১ বছৰীয়া ময়ংক যাদৱে কালিৰ খেলত ধুমুহাৰ গতিত বল কৰি সকলোকে আচৰিত কৰি তোলে। লগতে জীৱনৰ প্ৰথমখন আই পি এলতে লাভ কৰে শ্ৰেষ্ঠ খেলুৱৈৰ সন্মান।
লক্ষ্ণৌ ছুপাৰ জায়েণ্টৰ হৈ খেলা ময়ংকে শনিবাৰ ৩০ তাৰিখৰ খেলত ঘণ্টাত ১৫৫.০৮ কিলোমিটাৰ বেগত বল কৰে। কেৱল তীব্ৰ গতিৰ বল কৰাই নহয়, ৪ অভাৰ খেলি ২৭ ৰান খৰচ কৰি তিনিটা উইকেট দখল কৰে।
এনে এক সুন্দৰ প্ৰদৰ্শনৰ বাবেই ময়ংকে কালি নিশা লাভ কৰে শ্ৰেষ্ঠ খেলুৱৈৰ সন্মান। লগতে বহু নামী খেলুৱৈয়েও প্ৰশংসা কৰে ময়ংকৰ। ভাৰতীয় ক্ৰিকেট দলৰ ভৱিষ্যতৰ ভাল বলাৰ বুলি কয় বহুতেই।
যি ডেল ষ্টেইনক দেখি ক্ৰিকেটৰ প্ৰতি আকৰ্ষিত হৈছিল, যাক নিজৰ আইডল হিচাপে মানে সেই ডেল ষ্টেইনেও ময়ংকৰ প্ৰসংশাত পঞ্চমুখ। ময়ংক ইমান দিনে ক’ত লুকাই আছিল বুলি কয় ডেল ষ্টেইনে।
উল্লেখ্য যে, ময়ংকৰ ১৫৫.৮ কিলোমিটাৰ প্ৰতি ঘণ্টাৰ এই গতি এইবাৰৰ আই পি এলৰ বৰ্তমানলৈ সকলোতকৈ অধিক গতিৰ বল আছিল। লগতে আই পি এলৰ ইতিহাসৰ পঞ্চমটো তীব্ৰ গতিৰ বল আছিল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
