জয় শ্বাহৰ চাঞ্চল্যকৰ মন্তব্য, ৰোহিত শৰ্মাই কৰিব এই দুই কাম
ৰোহিত শৰ্মাৰ অধিনায়কত্বত ভাৰতে টি২০ বিশ্বকাপ ২০২৪ দখল কৰি ইতিহাস সৃষ্টি কৰে। ২৯ জুন তাৰিখে ব্ৰিজটাউনত অনুষ্ঠিত হোৱা চূড়ান্ত খেল খনত ভাৰতে দক্ষিণ আফ্ৰিকাক ৭ ৰানত পৰাস্ত কৰি বিশ্বকাপ দখল কৰে।
ইয়াৰ দ্বাৰা ভাৰতে এতিয়ালৈকে দুবাৰ টি-২০বিশ্বকাপ দখল কৰিবলৈ সক্ষম হয়। ইয়াৰ পূৰ্বে কেপ্টেইন কুল মহেন্দ্ৰ সিং ধোনীৰ নেতৃত্বত ভাৰতে ২০০৭ চনত বিশ্বকাপ দখল কৰিছিল। তাৰ পিছত এইবাৰ ২০২৪ চনত দ্বিতীয়বাৰৰ বাবে বিশ্বকাপ দখল কৰে।
এইবাৰৰ চূড়ান্ত খেলখনৰ পূৰ্বে ভাৰতীয় ক্ৰিকেট নিয়ন্ত্ৰণ বৰ্ড বি চি চি আইৰ সচিব জয় শ্বাহে কৰা ভৱিষ্যতবাণী সঁচা প্ৰমাণিত হয় । জয় শ্বাহে খেলখনৰ পূৰ্বে কৈছিল যে, এইবাৰ ভাৰতীয় দলে ৰোহিত শৰ্মাৰ নেতৃত্বত ব্ৰিজটাউনৰ খেলপথাৰত ভাৰতীয় বিজয় পতাকা উৰুৱাব। শেষত সেয়াই সঁচা প্ৰমাণিত হয়। ভাৰতে খেল খনৰ অন্তত ভাৰতীয় পতাকা উৰুৱাই।
সেই সফলতাৰ পাছত এইবাৰ জয় শ্বহে পুনৰ আন এক ভৱিষ্যতবাণী কৰিছে। তেখেতে কয় যে, ৰোহিত শৰ্মাৰ নেতৃত্বতে ভাৰতীয় ক্ৰিকেট দলে অহা বছৰ আই চি চি চেম্পিয়ন ট্ৰফি আৰু ৱৰ্ল্ড টেষ্ট চেম্পিয়নচিপ ফাইনেলত জয়ী হ’ব।
জয় শ্বাহৰ এই কথাৰ পৰাই স্পষ্ট প্ৰমাণিত হয় যে, আই চি চি চেম্পিয়ন ট্ৰফি আৰু ৱৰ্ল্ড টেষ্ট চেম্পিয়নচিপ দুয়োখন প্ৰতিযোগিতাতে ভাৰতীয় দলক ৰোহিত শৰ্মাইয়ে অধিনায়কত্ব কৰিব। উল্লেখ্য যে, ৰোহিত শৰ্মাই বৰ্তমানে টি-২০ আন্তঃৰাষ্ট্ৰীয় চিৰিজৰ পৰা অৱসৰ ঘোষণা কৰিছে।
এতিয়া ৰোহিতৰ লক্ষ্য পৰৱৰ্তী দুই প্ৰতিযোগিতাতো ভাৰতক জয়ৰ সোৱাদ দিয়া। লগতে অধিনায়ক হিচাপে নিজৰ নাম গঢ়া। দুয়োখন প্ৰতিযোগিতাই ২০২৫ চনত অনুষ্ঠিত হ’ব। ৱৰ্ল্ড টেষ্ট চেম্পিয়নচিপ অহা বছৰৰ জুন মাহত লৰ্ডছত অনুষ্ঠিত হ’ব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
