ডিজিটেল ডেস্কঃ মানুহজন আছিল আপোনভোলা। অহংকাৰ, ভেম আদিবোৰ উপাদানে কেতিয়াও ক্ৰিয়া কৰিব নোৱাৰা মানুহজনেই আছিল ৰাজু দা। ঘপককৈ কেতিয়াবা তেওঁ স্কুটীখন পাৰ হওতে, পিচফালৰ পৰা কোনোবাই যদি ৰাজু দা বুলি ছিঞৰিছিল, ঘূৰি নোচোৱাকৈ হাত দাঙি তেওঁ দিছিল সহাৰি।
জয়ন্ত দাস, নামেই যাৰ পৰিচয়। কেইবাটাও দশক অসমীয়া ছবিজগতক অভিনয়েৰে সমৃদ্ধ কৰা বিশিষ্ট অভিনেতাগৰাকীয়ে আজি নিশা শেষ নিশ্বাস ত্যাগ কৰে। লক্ষাধিকজনৰ প্ৰাৰ্থনাক নস্যাত কৰি নিয়তি কাঢ়ি নিলে অসমীয়া ছবিজগতৰ সকলোৰে মৰম আৰু আদৰৰ ৰাজু দাক।
বলিষ্ঠ তথা সাৱলীল অভিনয়েৰে অভিনয় জগতত নিজৰ বাবে এখন সুকীয়া আসন সৃষ্টি কৰিছিল জয়ন্ত দাসে। অভিনেতা হোৱাৰ মুঠেই ইচ্ছা নথকা জয়ন্ত দাস এগৰাকী ক্ৰিকেটাৰ হোৱাৰ সপোনহে পুহি ৰাখিছিল। সেইসময়ত অসম ক্ৰিকেট সন্থাৰ সৈতে ওতপোতভাৱে জড়িত হৈ থকা পিতৃ পুলিন চন্দ্ৰ দাসেও জয়ন্ত দাসক ক্ৰিকেটাৰ হিচাপেই চাব বিচাৰিছিল। কিন্তু সময়ে জয়ন্ত দাসক অভিনয়ৰ বাটলৈ টানি আনিছিল।
১৯৬৯চনৰ গুৱাহাটীত জন্মগ্ৰহণ কৰা জয়ন্ত দাসে মূল চৰিত্ৰত অভিনয় কৰা ভাড়াঘৰ শীৰ্ষক ধাৰাবাহিকখন আছিল এখন অন্যতম জনপ্ৰিয় ধাৰাবাহিক। সকলো চৰিত্ৰতে খাপ খাই পৰা বলিষ্ঠ অভিনেতাগৰাকীয়ে আই কত নাই, কন্যাদান, ভূমিপুত্ৰ, জোন জলে কপালত, বুকুৰ মাজত জ্বলে আদি ছবিত কৰা অভিনয় কোনে পাহৰিব পাৰে। কাদম্বৰী, মন, নায়ক আদি ছবিতো তেওঁ কৰা অভিনয়ক লৈ সকলোৱে শলাগ লৈছিল। শেহতীয়াকৈ বহুকেইটা কামত ব্যস্ত থকা জয়ন্ত দাস হঠাতে অসুস্থ হৈ পৰিছিল। সংকটজনক অৱস্থাত মহানগৰীৰ খ্ৰীষ্টানবস্তিৰ এপ’ল’ হস্পিতালত ভৰ্তি কৰা হৈছিল অভিনেতাগৰাকীক।
যকৃতজনিত ৰোগত আক্ৰান্ত হৈ যোৱা ১০ডিচেম্বৰৰ পৰা হস্পাতালৰ বিচনাত অহৰহ মৃত্যুৰ সৈতে যুঁজি অৱশেষত হাৰ মানিলে অভিনেতাগৰাকীয়ে। অভিনেতাগৰাকীৰ মৃত্যুৰ খবৰ বিয়পি পৰা লগে লগে সমগ্ৰ ৰাজ্যতে শোকাকূল পৰিৱেশে বিৰাজ কৰিছে। বেলেগক হহুৱাই সহজ-সৰলকৈ ওৰেটা জীৱন কটোৱা অভিনেতাগৰাকীয়ে মাত্ৰ ৫৪বছৰ বয়সত সকলোকে কন্দুৱাই গলগৈ অজানা দেশলৈ, যি দেশত নাই উভতি অহাৰ বাট…
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
