ডিজিটেল ডেস্কঃ বিশিষ্ট অভিনেতা জয়ন্ত দাসৰ অকাল মৃত্যুক এতিয়াও সহজে মানি ল’ব পৰা নাই অনুৰাগীসকলে। শনিবাৰে নিশাই নৱগ্ৰহত শেষকৃত্য সম্পন্ন হোৱা অভিনেতাগৰাকীক সোঁৱৰি এতিয়াও সমগ্ৰ ৰাজ্যত বৈ আছে শোকৰ বন্যা। মুখ্যমন্ত্ৰীৰ পৰা আদি কৰি সমাজৰ ভিন্ন ক্ষেত্ৰৰ সৈতে জড়িত সকলোৱে আজি অভিনেতাগৰাকীক সুঁৱৰিছে।
অভিনেতাগৰাকীৰ মৃত্যুৰ পাছতে তেওঁৰ সহজ-সৰল অথচ গভীৰ ব্যক্তিত্বৰ কথা সকলোৰে মাজত আলোচনা হৈছে। এক বিশেষ সাক্ষাতকাৰত অভিনেতাগৰাকীয়ে জীৱনক লৈ কোৱা বহু গভীৰ কথা এতিয়া চৰ্চা হৈছে নেটিজেনসকলৰ মাজত। সেই বিশেষ সাক্ষাতকাৰটোত জয়ন্ত দাসে কৈছিল যে- মানুহ অত্যাধিক উচ্চাকাংক্ষী হ’ব নালাগে। আচলতে মানুহৰ জীৱনত যিখিনি প্ৰয়োজন সেইখিনিতেই সন্তুষ্ট হৈ থাকিব লাগে। তেতিয়া জীৱন সুখৰ হয়।
অভিনেতাগৰাকীয়ে লগতে কৈছিল- ধন-সম্পত্তিতকৈ মানুহে জীৱনত আৰ্শীবাদ আৰু মৰম আৰ্জিব লাগে। আৰু এনেকে জীৱনত কাম কৰিব লাগে যাতে শশ্মানত মৃত্যুৰ সময়ত মানুহৰ ভিৰ হয়। যাতে ১০জনৰ মাজত দুজনে হলেও কয় যে এজন ভাল মানুহ হেৰাই গ’ল। ধন-সম্পত্তিতকৈ এজন মানুহে এইবোৰ বস্তুহে আৰ্জিব লাগে।’
অতি সহজ-সৰলকৈ জীৱন কটোৱা জয়ন্ত দাসে যি বিচাৰিছিল সেইমতেই সকলো হৈছে। তেওঁৰ অবৰ্তমানত এতিয়া সকলোৱে তেওঁৰ গুণ-গৰিমাক স্মৰণ কৰিছে। সমগ্ৰ অসমত তেওঁৰ মৃত্যুত বৈছে শোকৰ বন্যা।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
