অসম লাইভ ২৪ঃ বুধবাৰে আমেৰিকাৰ ৪৬ তম ৰাষ্ট্ৰপতি হিচাপে শপতগ্ৰহণ কৰে জ’ বাইডেনে আৰু ৪৯তম উপৰাষ্ট্ৰপতি হিচাপে শপত গ্ৰহণ কৰে ভাৰতীয় মূলৰ কমলা হেৰিছে। এইবাৰৰ শপতগ্ৰহণ অনুষ্ঠানত অইনবাৰৰ তুলনাত ব্যতিক্ৰম আৰু অনন্য। জানক কিয় ব্যতিক্ৰম এইবাৰৰ শপতগ্ৰহণ অনুষ্ঠান।
১) ক’ৰোনা জর্জৰিত মার্কিন মুলুকত সংক্ৰমণ বৃদ্ধিৰ বাবে এইবাৰৰ শপতগ্ৰহণ অনুষ্ঠানত হ্ৰাস কৰা হৈছে দর্শকৰ সংখ্যা। কিন্তু দর্শকৰ সেই স্থান পূৰণ কৰিবলৈ ৰখা হৈছে ২ লাখ আমেৰিকান জাতীয় পতাকা। ৱাশ্বিংটন ডিচিত ৩ৰ পৰা ১৩ নম্বৰ পথ পর্যন্ত এই পতাকা লগোৱা হৈছিল। এই ২ লাখ পতাকা ক’ভিড-১৯ত মৃত্যু হোৱা মানুহৰ প্ৰতি শ্ৰদ্ধা জনাই লগোৱা হৈছিল।
২) এণ্ড্ৰ’ জনচনৰ পিছত ড’নাল্ড ট্ৰাম্পেই একমাত্ৰ প্ৰাক্তন ৰাষ্ট্ৰপতি যিগৰাকীয়ে নৱনির্বাচিত মার্কিন ৰাষ্ট্ৰপতিৰ শপতগ্ৰহণ অনুষ্ঠানত উপস্থিত নাছিল।
৩) শেহতীয়া কেপিটেল আক্ৰমণৰ পিছত কটকটীয়া নিৰাপত্তা বেষ্টনী গঢ়ি তোলা হৈছিল হোৱাইট হাউছৰ চৌদিশে। অইনবাৰৰ তুলনাত এইবাৰ অতিৰিক্ত সেনা মোটায়েন কৰা হৈছিল শপতগ্ৰহণ অনুষ্ঠানত। এলার্ট আছিল FBI।
৪) শপতগ্ৰহণ অনুষ্ঠানৰ সময়ত কেপিটেল হিল আৱৰি আছিল ২০ হাজাৰ নেচনেল গার্ডেৰে। ২৪ ঘণ্টাই নজৰত আছিল মূল মঞ্চ। অপ্ৰীতিকৰ ঘটনাৰ আশংকাত ৱাশ্বিংটন ডিচিত ট্ৰাম্পৰ সমর্থকৰ ওপৰত কঠোৰ দৃষ্টি ৰখা হৈছিল।
৫) ঐতিহ্যবাহী ৰাষ্ট্ৰীয় পেৰেড এইবাৰ দেখা গ’ল ভার্চুৱেলী। আমেৰিকাৰ ৫০ খন ৰাষ্ট্ৰত এই পেৰেড অনুষ্ঠিত হ’ল। দর্শকে এই দৃশ্য প্ৰত্যক্ষ কৰিলে অনলাইনত।
৬) শপতগ্ৰহণৰ বাবে বাতিল কৰা হ’ল একাধিক বিমান। ডেলটা এয়াৰলাইন্সৰ প্ৰতিনিধিয়ে জনায় শপতগ্ৰহণ অনুষ্ঠানৰ পূর্বে ৮৮০ জন যাত্ৰীৰ উৰণত নিষেধাজ্ঞা জাৰি কৰা হৈছিল।
৭) এইবাৰ বাতিল কৰা হ’ল ঐতিহ্যময় বল নৃত্যৰ অনুষ্ঠান। সলনি কৰা হ’ল ৯০ মিনিটৰ এক বিশেষ টিভি অনুষ্ঠান। ‘চেলিব্ৰেটী আমেৰিকা’ শীর্ষক অনুষ্ঠানত দেখা পোৱা গ’ল ডেমি লোভাটো, জাষ্টিন টিম্বাৰলেক, জন বল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
