পপীয়া তৰাৰ দৰে খহি পৰিল কংগনা

কি হ’ব কংগনা ৰাণাৱটৰ ভৱিষ্যৎ? কেন্দ্ৰৰ শাসনাধিষ্ঠিত চৰকাৰক অকাৰণত অতি তোষামোদ কৰি জনতাৰ চকুত দৃষ্টিকটু হ’ল বলীউড অভিনেত্ৰী কংগনা ৰাণাৱট৷ বলীউডত কোনো গডফাডাৰ নোহোৱাকৈ অতি কষ্টৰে পাহাৰীয়া ৰাজ্য হিমাচল প্ৰদেশৰ পৰা মায়ানগৰী মুম্বাইলৈ যাত্ৰা কৰিছিল কংগনা ৰাণাৱটে৷ বলীউডৰ ছবিত অভিনয় কৰা কংগনা ৰাণাৱটৰ বাবে অতি কষ্টকৰ আছিল এই যাত্ৰা৷

মডেলিং জগতৰ পৰা কেৰিয়াৰ আৰম্ভ কৰা কংগনা ৰাণাৱটে যথেষ্ট ত্যাগ আৰু কষ্ট স্বীকাৰ কৰি নিজৰ এটা সুকীয়া স্থান দখল কৰিছিল বলীউডত৷ ভাৰতত এনে এজন ব্যক্তি নাছিল যিয়ে বলীউড হিৰ’ইন হিচাপে কংগনা ৰাণাৱটক চিনি পোৱা নাছিল বা জনা নাছিল৷ কিন্তু এটা সুন্দৰ ভৱিষ্যৎ লৈ বলীউড জগতখনত দপদপাই থকা প্ৰতিষ্ঠিত অভিনেত্ৰী কংগনা ৰাণাৱটৰ হঠাৎ এনে কি হ’ল যে হঠাৎ আজিৰ দিনটোত পপীয়া তৰাৰ দৰে খহি পৰিল কংগনা ৰাণাৱটৰ সকলো নাম-যশ-গৰিমা৷ কংগনাৰ এনে বিপৰ্যয় দেখি মানসিকভাৱে কংগনাৰ লগতে ভাঙি পৰিছে কংগনাৰ অনুৰাগীসকলেও৷ পিছে বহুতে দোষাৰোপ কৰিব বিচাৰে ইয়াৰ অন্তৰালত কংগনাৰ ৰাজনৈতিক লালসাৰ৷

কিয়নো বৰ্তমানৰ শাসনাধিষ্ঠিত কেন্দ্ৰীয় চৰকাৰখনত বহুকেইগৰাকী এনে নেতা-নেত্ৰী আছে যিসকলে সামাজিক জীৱনত ৰাজনৈতিক নেতা হিচাপে নহয়, বলীউড চিনেমাৰ অভিনেত্ৰী তথা অভিনেতা হিচাপেহে কেৰিয়াৰ আৰম্ভ কৰিছে৷ উদাহৰণ হিচাপে কেন্দ্ৰীয় মন্ত্ৰী স্মৃতি ইৰাণী, বিজেপিৰ ৰাষ্ট্ৰীয় নেতা তথা সাসংদ মনোজ তিৱাৰী, শত্ৰুক্ষ্ণ সিনহা, সাংসদ ৰবি কিষাণ, হেমা মালিনী আদিক দেখি হয়তো কংগনাও মন বান্ধিছিল পৰৱৰ্তী জীৱন এক ৰাজনৈতিক নেত্ৰী হিচাপে আগবঢ়াই নিয়াৰ৷ যাৰ বাবে কেন্দ্ৰৰ শাসনাধিষ্ঠিত বিজেপি চৰকাৰৰ দেশত সৃষ্টি কৰা কেইবাটাও বিতৰ্কিত নীতিক অন্ধভাৱে অভিনেত্ৰী কংগনা ৰাণাৱটে সমৰ্থন কৰি দেশৰ জনতাক কটু বাক্য শুনাই কঠোৰ সমালোচনা কৰিছিল৷

কিন্তু এনে সমালোচনাৰ উচিত প্ৰত্যুত্তৰ জনতাই কংগনাক হাতে হাতে দিলে কংগনাৰ শেহতীয়া মুক্তি লাভ কৰা ‘ধাকৰ’ নামৰ ছবিখনক লৈ৷ কিয়নো এই ছবিখনত কংগনা ৰাণাৱটে চিনেমাখনৰ প্ৰযোজক-পৰিচালকক এনে আৰ্থিক সংকটৰ মুখামুখি কৰালে যে প্ৰায় ৭৫ কোটি টকাৰ বাজেটেৰে নিৰ্মাণ কৰা এই ছবিখনে ৯টা দিনত ৱ’ৰ্ল্ড ৱাইড কালেকচন আহৰণ কৰিছিল মাত্ৰ প্ৰায় ৪ কোটি টকা৷

৭৫ কোটিৰ বিপৰীতে ৪ কোটি অৰ্জন কৰা কংগনাৰ ধাকৰ ছবিখন ফ্লপ নহয় বলীউড ইতিহাসৰ এখন মহাফ্লপ চিনেমালৈ অৱনমিত হ’ল৷ আনকি যোৱা শনিবাৰ অৰ্থাৎ মুক্তিৰ ৮ নম্বৰ দিনটোত ছবিখনে সৰ্বভাৰতীয় পৰ্যায়ত মাত্ৰ ৪,৪২০ টকাহে ধন অৰ্জন কৰিবলৈ সক্ষম হয়৷ এয়া বলীউড ইতিহাসৰ মহাফ্লপ ছবিৰ উদাহৰণৰ মাইলষ্টনত নাম সন্নিৱিষ্ট হ’ল কংগনা ৰাণাৱট অভিনীত ছবি ‘ধাকৰ’৷

অযুক্তিকৰ ধাৰণাৰে দৰ্শক তথা দেশৰ জনতাক কটু বাক্য শুনাবলৈ ধৃষ্টতা ৰখা কংগনা ৰাণাৱটক এয়া উচিত প্ৰত্যুত্তৰ দিছে দেশৰ জনতাই৷ হয়তো ইয়াৰ পৰৱৰ্তী পৰ্যায়ত কোনো প্ৰযোজক-পৰিচালকে কংগনা ৰাণাৱটক অভিনেত্ৰী তথা হিৰোইন হিচাপে নাম বাছনি কৰিবলৈ ১০ বাৰ চিন্তা কৰিব৷ এয়া কংগনাৰ বিপৰ্যয়ৰ চৰম পৰিস্থিতি৷ ইয়াৰ পিছত ভৱিষ্যতে কি বাট ল’ব কংগনাই, সেয়া কংগনা ৰাণাৱটে নিজে সিদ্ধান্ত ল’ব৷

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ