মঙলবাৰে কাশ্মীৰৰ পহেলগামৰ উপত্যকাত সন্ত্ৰাসবাদীৰ গুলিত প্ৰাণ হেৰুৱাইছে ২৭গৰাকী পৰ্যটকে৷ তাৰ কেইঘণ্টাৰ ভিতৰতেই এইবাৰ গুলিৰ শব্দ শুনা গৈছে কুলগামৰ পৰা৷ দক্ষিণ কাশ্মীৰৰ কুলগামত পুৱাৰে পৰাই সন্ত্ৰাসবাদীসকলক বিচাৰি চলিছে তালাছি অভিযান৷ জম্মু কাশ্মীৰৰ আৰক্ষী সূত্ৰৰ খবৰ অনুসৰি টাঙ্গিমাৰ্গ এলেকাত শুনা গৈছে গুলিৰ শব্দ৷
ধাৰণা কৰা হৈছে, পহেলগাওঁৰ পৰা মাত্ৰ ৬০ কিঃমিঃ দূৰৈৰ কুলগামতেই লুকাই আছে সন্ত্ৰাসবাদীসকল৷ সেনা জোৱানৰ সৈতে গুলিৰ যুঁজ আৰম্ভ হৈছে বুলি প্ৰাথমিক ভাৱে জনা গৈছে৷ এতিয়াও অৱশ্যে এই খবৰ নিশ্চিত কৰা নাই ভাৰতীয় সেনা বা প্ৰশাসনে৷ বুধবাৰে বিয়লীৰ পৰা দুইতৰফৰ পৰা গুলিৰ শব্দ শুনা গৈছে৷ পাক সন্ত্ৰাসবাদী লস্কৰ ই তৈবাৰ ভগ্নী সংগঠন দ্যা ৰেজিষ্টেন্স ফ্ৰণ্টৰ ঘাতক বাহিনীৰ আক্ৰমণত মঙলবাৰে দুপৰীয়া অনন্তনাগ জিলাৰ পৰ্যটনকেন্দ্ৰ পহেলগামৰ বৈছৰণ উপত্যকাত সন্ত্ৰাসবাদী আক্ৰমণত ২৬গৰাকী পৰ্যটক আৰু স্থানীয় এগৰাকী খচ্চৰ চালকে প্ৰাণ হেৰুৱাইছে৷ প্ৰাথমিকভাৱে অনুমান কৰা হৈছে যে নিয়ন্ত্ৰণৰেখা এল ও চি পাৰ হৈ অনুপ্ৰৱেশকাৰী দলটো আহিছিল আৰু নৰসংহাৰ চলাইছিল৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
