অসম লাইভ২৪ঃ লেহ-লাডাখ ৰাইড বহুতৰেই সপোন। কিন্তু সপোন দেখিলেও লাডাখলৈ এইকেইটা দিনত ভুলতো যাত্ৰা নকৰিব। বৰফেৰে শুভ্ৰ লাডাখত জ্বলিছে ক্ষোভৰ দাৱানল। তীব্ৰ শীতক উপেক্ষা কৰি ৰাস্তাই ৰাস্তাই প্ৰতিবাদত নামিছে হাজাৰ হাজাৰ লোকে। পুৰুষেই নহয় মহিলাসকলো ওলাই আহিছে ৰাজপথলৈ। কিন্তু কিয় এনেকৈ ৰাজপথত নামিছে লাডাখবাসী? দেশৰ সকলোতকৈ শান্তিপূৰ্ণ এলেকা হিচাপে পৰিচিত লাডাখবাসীৰ ক্ষোভ এতিয়া চৰকাৰৰ বিৰুদ্ধে। চৰকাৰৰ ওচৰত কি কি দাবী ৰাখিছে লাডাখবাসীয়ে?
কি দাবী লাডাখৰ বাসিন্দাসকলৰ?
পূৰ্বে লাডাখক জন্মু-কাশ্মীৰৰ পৰা পৃথক কৰি কেন্দ্ৰীয়শাসিত অঞ্চল হিচাপে স্বীকৃতি দিয়া হৈছিল। কেন্দ্ৰীয়শাসিত অঞ্চলৰ স্বীকৃতি লাভ কৰি মুঠেও সুখী নহয় লাডাখৰ জনতা। লাডাখবাসীৰ বহুদিনীয়া দাবী যে তেওঁলোকক পৃথক ৰাজ্য লাগে। পূৰ্ণ ৰাজ্যৰ মৰ্যাদা বিচাৰিয়েই ৰাজপথত নামিছে লাডাখৰ হাজাৰ হাজাৰ লোক। বিক্ষোভৰ বাবেই বন্ধ কৰি দিয়া হৈছে লাডাখৰ সকলো দোকান পোহাৰ। এই বিক্ষোভৰ নেতৃত্ব দিছে লেহ এপেক্স বডি (LAB) আৰু কাৰ্গিল ডেমোক্ৰেটিক এলায়েন্স (KDA)য়ে। তেওঁলোকৰ নেতৃত্বতেই শীতকো নেওচি প্ৰতিবাদ কৰিবলৈ ওলাই আহিছে সমূহ লাডাখবাসী।
https://x.com/news24tvchannel/status/1753988652135284751?s=20
২০১৯ চনত ৩৭০ ধাৰা উঠাই লোৱা হৈছিল। এই সিদ্ধান্তক বিজেপি চৰকাৰৰ বৃহৎ সাফল্য বুলিও দাবী কৰা হৈছে। ২০১৯ চনত ৫ আগষ্টত জম্মু-কাশ্মীৰৰ পৰা ৩৭০ আৰু ৩৫এ ধাৰা আঁতৰাই দিয়া হৈছিল। সেই সময়ত এই দুই কেন্দ্ৰিয়শাসিত অঞ্চল বিভক্তও কৰা হৈছিল। ইয়াৰ মাজতেই এখন হৈছে জম্মু আৰু আনখন কাশ্মীৰ। এই দুই অঞ্চল এখন বিধানসভা সহ এটা কেন্দ্ৰীয়শাসিত অঞ্চললৈ পৰিণত হৈছে। একে সময়তে লাডাখত বিধানসভা অবিহনেই এক কেন্দ্ৰীয়শাসিত অঞ্চল বুলি ঘোষণা কৰা হয়। পোনতে লাডাখক কেন্দ্ৰীয়শাসিত অঞ্চল কৰাত বৰ বিশেষ আপত্তি দৰ্শোৱা নাছিল লাডাখবাসীয়ে। কিন্তু লাহে লাহে লাডাখবাসীৰ শান্ত সমায়িত সেই স্বৰ প্ৰতিবাদক স্বৰলৈ ৰূপান্তৰ হৈছে। লাডাখৰ চৌদিশে এতিয়া বিক্ষোভ। লাডাখৰ সাধাৰণ জনতা এতিয়া আমোলাতন্ত্ৰৰ প্ৰতি বিৰক্ত হৈ পৰিছে। তেওঁলোকৰ দাবী, জনগণক তেওঁলোকৰ প্ৰতিনিধি নিৰ্বাচনৰ সুযোগ লাগে। এয়া তেতিয়াহে সম্ভৱ যেতিয়া লাডাখ এখন পুৰ্ণ ৰাজ্য হ’ব। সেয়ে পোনতে তেওঁলোকক এখন ৰাজ্য লাগে। LAB আৰু KDAয়ে লাডাখৰ দুটা অঞ্চলক প্ৰতিনিধিত্ব কৰে। এই দুই দলেই এতিয়া এই বিক্ষোভক নেতৃত্ব দিছে।
পৃথক সংসদীয় আসন
লাডাখৰ বিক্ষোভকাৰীয়ে তেওঁলোকৰ দাবীসমূহ স্পষ্টৰূপত তুলি ধৰিছে। তেওঁলোকৰ প্রধান দাবীসমূহ হৈছে কেন্দ্ৰীয়শাসিত অঞ্চল লাডাখক এখন পূৰ্ণাংগ ৰাজ্য বুলি স্বীকৃতি দিয়া। ইয়াৰ সৈতে সংবিধানৰ ষষ্ঠ দফা কাৰ্যকৰ কৰা আৰু লেহ আৰু কাৰ্গিল জিলাৰ বাবে পৃথক সংসদীয় আসন প্ৰতিষ্ঠা কৰা। ষষ্ঠ দফাৰ অধীনত উপজাতীয় এলেকাত স্বায়ত্তশাসিত জিলা তৈয়াৰৰো বিধান আছে। লাডাখত বহুতো উপজাতিয়ে বসবাস কৰে সেয়ে তেওঁলোকৰ বাবে স্বায়ত্বশাসিত জিলা দাবী কৰাৰ সম্পূৰ্ণ অধিকাৰ আছে বুলিও জনাইছে বিক্ষোভকাৰীয়ে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
