উত্তৰ প্ৰদেশৰ বাগপতত সংঘটিত হৈছে এক চাঞ্চল্যকৰ হ*ত্যাকাণ্ড। দুজন বন্ধুক হ*ত্যা কৰি মন্দিৰৰ চৌহদতে গোপনে পুতি থোৱাৰ অভিযোগ উঠিছে মন্দিৰৰ এজন পূজাৰীৰ বিৰুদ্ধে। কেৱল সেয়াই নহয় মৃ*তদেহ পুতি তাৰ ওপৰত চিমেণ্ট-ইটা আৰু টাইলছেৰে কংক্ৰিটৰ মজিয়া নিৰ্মাণ কৰি দিছিল অভিযুক্তই। হ*ত্যাকাণ্ডৰ ১৯ দিন পিছত বৃহস্পতিবাৰে পুৱতি নিশা প্ৰায় ৩ বজাত আৰক্ষীয়ে দুয়োটা মৃ*তদেহ উদ্ধাৰ কৰে।
ঘটনাস্থলীত আৰক্ষী উপস্থিত হোৱাৰ পূৰ্বেই মন্দিৰৰ পূজাৰী নৰেশ নাথে পলায়ন কৰে। অৱশ্যে নৰেশৰ দুই শিষ্য কৃষ্ণ যাদৱ আৰু উজ্জ্বলক আৰক্ষীয়ে আটক কৰি সোধা-পোছা কৰাত তেওঁলোকে হ*ত্যাকাণ্ডৰ কথা স্বীকাৰ কৰে। কৃষ্ণ-উজ্জ্বলৰ স্বীকাৰোক্তিৰ ভিত্তিত মন্দিৰৰ পিছফালে মাটি খান্দি আৰক্ষীয়ে অংকিত (২৫) আৰু ইছৰাৰ (৩২) উ*ৱলি যোৱা মৃ*তদেহ দুটা উদ্ধাৰ কৰে। কাপোৰ আৰু ঘড়ীৰ সহায়ত মৃ*তদেহ দুটাৰ পৰিচয় নিশ্চিত কৰা হয়।
প্ৰাথমিক তদন্তত পোহৰলৈ অহা মতে, অংকিতৰ ভনীয়েকৰ সৈতে পূজাৰী নৰেশ নাথৰ প্ৰেমৰ সম্পৰ্ক আছিল। এই সম্পৰ্কৰ বিৰোধিতা কৰি অংকিত আৰু তেওঁৰ বন্ধু ইছৰাৰে ২৫ জুলাইত পূজাৰী নৰেশক বুজাবলৈ মন্দিৰলৈ গৈছিল। তাতেই তৰ্ক-বিতৰ্কৰ সৃষ্টি হয় আৰু পৰিস্থিতি ভয়ংকৰ ৰূপ লয়। অভিযোগ অনুসৰি, নৰেশে দুই যুৱকক হ*ত্যা কৰি নিজৰ দুই শিষ্যৰ সহায়ত মন্দিৰৰ পিছফালে মৃ*তদেহ দুটা পুতি থয়।
এই লোমহৰ্ষক ঘটনাটো উত্তৰপ্ৰদেশৰ বাগপত জিলা সদৰৰ পৰা প্ৰায় ২০ কিলোমিটাৰ দূৰত চাঁদিনগৰ থানাৰ অন্তৰ্গত সিগোলি টগা গাঁৱত সংঘটিত হৈছে। ২৯ জুলাইত পৰিয়ালৰ লোকে চাঁদিনগৰ থানাত যুৱক দুজনৰ নিৰুদ্দেশৰ অভিযোগ দাখিল কৰিছিল। প্ৰথম অৱস্থাত আৰক্ষীয়ে ঘটনাটো বিশেষ গুৰুত্ব সহকাৰে লোৱা নাছিল বুলি ভুক্তভোগী যুৱক দুজনৰ পৰিয়ালে অভিযোগ কৰে। কিন্তু ৮-১০ দিন পাৰ হৈ যোৱাৰ পাছতো দুয়ো উভতি নহাত পৰিয়ালৰ লোকে পুনৰ আৰক্ষীৰ কাষ চাপে। ইয়াৰ পিছতে আৰক্ষীয়ে তদন্ত অধিক সক্ৰিয় কৰে। আৰক্ষীয়ে দুয়োৰে কল ডিটেইল, মোবাইল লোকেচন আৰু গাঁওবাসীৰ সৈতে সোধা-পোছা আৰম্ভ কৰে। তদন্তৰ সময়ত লহচৌৰা অঞ্চলৰ গণেশ মন্দিৰৰ পূজাৰী নৰেশ নাথৰ নাম পোহৰলৈ আহে। আৰক্ষীয়ে জানিব পাৰে যে অংকিত আৰু ইছৰাৰক শেষবাৰৰ বাবে গণেশ মন্দিৰৰ ওচৰত দেখা গৈছিল। ইয়াৰ উপৰি তদন্তকাৰী বিষয়াসকলে অংকিতৰ ভনীয়েক আৰু নৰেশ নাথৰ মাজত থকা কথিত প্ৰেমৰ সম্পৰ্কৰ বিষয়েও তথ্য লাভ কৰে। ইয়াৰ পাছতে মহন্তৰ ওপৰত আৰক্ষীৰ সন্দেহ অধিক ঘনীভূত হয়।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
