অসম লাইভ ২৪ঃ ‘মাজুলীত কেৰলৰ ধ্বনি যদি শুনিব পাৰে তেন্তে দুৰ্গা পূজা পতাতনো কি আপত্তি থাকিব পাৰে৷’ দুৰ্গা পূজা সন্দৰ্ভত সত্ৰাধিকাৰে কৰা এই মন্তব্যক লৈ উত্তাল হৈ আছে মাজুলী৷ সচেতন মহলে মাজুলীক লৈ সত্ৰাধিকাৰে কৰা এই মন্তব্যৰ পিছতেই কৈছে, ‘মাজুলীত জানো কেৱল গৰাখহনীয়া হৈছে? মাজুলীত এতিয়া সংস্কৃতিৰো খহনীয়া৷’ অসমৰ সত্ৰনগৰী বুলি পৃথিৱীৰ প্ৰতি কোণতেই চিনাকী মাজুলীয়ে ধীৰে ধীৰে যেন হেৰুৱাইছে স্বকীয়তা৷
দক্ষিণপাট সত্ৰৰ সত্ৰাধিকাৰ জনাৰ্দন গোস্বামীয়ে মাজুলীত কেৰলৰ শব্দ শুনা পোৱাৰ বাবেই দুৰ্গা বন্দনাও এদিন চলিব বুলি কৰা মন্তব্যই সৃষ্টি কৰিছে প্ৰতিক্ৰিয়াৰ। কেৱল দুৰ্গা পূজাই নহয় শ্ৰীমন্ত শংকৰদেৱ সন্দৰ্ভতো বহুকেইটা মন্তব্য কৰিছিল৷ সত্ৰাধিকাৰ জনাৰ্দন গোস্বামীৰ মতে শ্ৰীমন্ত শংকৰদেৱ ধৰ্ম নিৰপেক্ষ নাছিল। শংকৰদেৱ এজন মহাপুৰুষ, বিজ্ঞানী আৰু অসমৰ প্ৰথম গৰাকী ক্ৰীড়াবিদ।
সত্ৰাধিকাৰৰ এই মন্তব্য ভাইৰেল হৈ পৰাৰ পিছতেই কেৱল সামাজিক মাধ্যমতেই প্ৰতিবাদ চলিছে এনে নহয়৷ সত্ৰাধিকাৰ গৰাকীৰ বিৰুদ্ধে গড়মূৰ থানাত গোচৰো তৰিছে একাংশই। ‘শংকৰদেৱ সাঁতোৰবিদ, শ্ৰীমন্ত শংকৰদে মল্লযোদ্ধা’- এই কথাৰে শংকৰদেৱক অপমান কৰাৰ অধিকাৰ সত্ৰাধিকাৰক কোনে দিলে বুলিও মন্তব্য কৰিছে বহুসংখ্যকেই৷
উল্লেখ্য যে মাজুলীত কেৰলৰ ধ্বনি শুনাৰ কথা কোৱা সত্ৰাধিকাৰৰ এই মন্তব্যৰ পিছতেই সচেতন মহলেও এই বিষয়টোক লৈ মত প্ৰকাশ কৰিছে৷ মাজুলীত দিনকদিনে বৃদ্ধি পাইছে গীৰ্জাৰ সংখ্যা৷ সত্ৰতকৈ এতিয়া মাজুলীত গীৰ্জাৰ সংখ্যাই বেছি৷ কিয় খ্ৰীষ্টান ধৰ্মৰ প্ৰতি আকৃষ্ট হৈছে মাজুলীৰ একাংশ লোক? মাজুলীত বাস কৰা মিছিং জনজাতীয় লোকসকলৰ প্ৰায়সংখ্যকেই খ্ৰীষ্টান ধৰ্মৰ প্ৰতি আকৃষ্ঠ হোৱাটোত কৰোবাত এই সত্ৰ সংস্কৃতিয়েই দায়ী নেকি এই বিষয়সমূহেও চৰ্চা লাভ কৰিছে৷
আনহাতে সত্ৰাধিকাৰৰ এই মন্তব্যত বহুতেই আকৌ ৰাজনীতিৰো গোন্ধ পাইছে৷ সামাজিক মাধ্যমতেই বহুতেই কৈছে, এয়া উত্তৰ ভাৰতীয় সংস্কৃতিক আদৰি লোৱাৰ এক উদাহৰণহে৷ অতি হিন্দুত্ববাদৰ আগ্ৰাসন এইবাৰ মাজুলীতো হৈছে৷ শংকৰদেৱে পূজা বিৰোধ কৰিছিল বাবেই সমগ্ৰ অসমত পালন কৰিলেও মাজুলীত দুৰ্গা পূজা পালন কৰা হোৱা নাছিল৷ মহাপুৰুষগৰাকীলৈ শ্ৰদ্ধা জনোৱাৰ লগতে মাজুলীৰ সত্ৰ সংস্কৃতিক একক কৰি ৰখাৰ প্ৰয়াসেৰেই এই সিদ্ধান্ত লৈ আহিছে মাজুলীবাসীয়ে৷ দক্ষিণপাট সত্ৰৰ সত্ৰাধিকাৰে পূজাৰ সপক্ষে মন্তব্য কৰিছে যদিও আউনীআটী সত্ৰৰ সত্ৰাধিকাৰ পিতাম্বৰ দেৱ গোস্বামীয়ে এই কথা মানি লোৱা নাই৷ পিতাম্বৰ দেৱ গোস্বামীয়ে এই বিষয়ত নিজৰ মত প্ৰকাশ কৰি কয়, মাজুলীত শাৰদীয় উৎসৱ হিচাপে কাতি বিহু, ৰাস আৰু পাল নামৰ স্থান আছে। কোনোবাই এনে পৰম্পৰা অগ্ৰাহ্য কৰিব খুজিলে আমি কেতিয়াও মানি নলও৷’
ইফালে দুৰ্গাপূজাৰ পোষকতা কৰা জনাৰ্দন গোস্বামী সত্ৰাধিকাৰ নহয় বুলিও মন্তব্য কৰিছে দক্ষিণপাটৰ আনগৰাকী সত্ৰাধিকাৰ ননীগোপাল দেৱ গোস্বামীয়ে। জনাৰ্দন গোস্বামী এজন সত্ৰীয়াহে, তেওঁ সত্ৰাধীকাৰ নহয়৷ এখন সত্ৰত এখন জীৱিত সত্ৰাধিকাৰ থাকোতে দ্বিতীয়জন সত্ৰাধিকাৰ নাথাকে বুলি মন্তব্যত প্ৰকাশ কৰিছে সত্ৰাধিকাৰ ননীগোপাল দেৱ গোস্বামীয়ে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
