২০ বছৰ পূৰ্বে এটা ৱেবছাইট খুলিছিল, ভবাই নাছিল এনে হ’ব, আজিৰ তাৰিখত বিশ্বৰ দ্বিতীয় ধনী ব্যক্তি
২০ বছৰ পূৰ্বৰ কথা। এটা সাধাৰণ ৱেবছাইট খুলিছিল। য’ত নিজা নিজা একাউণ্ট খুলি ইজনে আনজনৰ সৈতে কথা বতৰা আদি পতাৰ লগতে ফটো ভাগ-বতৰা কৰিব পাৰে। কোনো ভবা নাছিল সেই সাধাৰণ ভাৱে ৱেবছাইট এদিন সমগ্ৰ বিশ্বৰে অতিকে জনপ্ৰিয় হৈ পৰিব। লাহে লাহে সেই বেৱ ছাইট ইমানেই জনপ্ৰিয় হৈ পৰে যে, বৰ্তমানে সেই ৱেবছাইটৰ জৰিয়তে বিশ্বৰ দ্বিতীয় ধনী ব্যক্তি হিচাপে পৰিগণিত হৈছে প্ৰতিষ্ঠাপক।
হয়, ইয়াত মাৰ্ক জুকাৰবাৰ্গৰেই কথা কোৱা হৈছে। মেটাৰ চিইঅ’ তথা ফেচবুকৰ প্ৰতিষ্ঠাপক মাৰ্ক জুকাৰবাৰ্গে আমাজনৰ প্ৰতিষ্ঠাপক জেফ বেজোছক অতিক্ৰম কৰি বিশ্বৰ দ্বিতীয় ধনী ব্যক্তি হিচাপে পৰিগণিত হৈছে। ব্লুমবাৰ্গ বিলিয়নেয়াৰ সূচকাংক অনুসৰি জুকাৰবাৰ্গৰ সম্পত্তি এতিয়া ২০৬.২ বিলিয়ন ডলাৰ (প্ৰায় ১৭.২২ লাখ কোটি টকা) হোৱাৰ বিপৰীতে বেজোছৰ সম্পত্তি ২০৫.১ বিলিয়ন ডলাৰ (প্ৰায় ১৭.১৩ লাখ কোটি টকা) হৈছে।
এইজনেই জুকাৰবাৰ্গ যিয়ে ২০০৪ চনত ফেচবুক প্ৰতিষ্ঠা কৰিছিল আৰু সেই সময়ত কোনেও তেওঁৰ নামটোও নাজানিছিল। পৰিৱৰ্তিত প্ৰযুক্তি ব্যৱহাৰ কৰি তেওঁ মাত্ৰ ২০ বছৰতে এক অলৌকিকতা লাভ কৰিছে, যিটো অতি কঠিন যেন লাগে।
জুকাৰবাৰ্গৰ এই সফলতা মেটাৰ শ্বেয়াৰ ৭০% দৰ্শনীয় বৃদ্ধিৰ ফল। ২০২৪ চনত মেটাৰ শ্বেয়াৰৰ এই উত্থানৰ মূল কাৰণ হৈছে এআই ভিত্তিক প্ৰযুক্তিৰ প্ৰতি বিনিয়োগকাৰীৰ আগ্ৰহ আৰু আস্থা বৃদ্ধি। কেৱল এই বছৰতে জুকাৰবাৰ্গৰ সম্পত্তি ৭৮ বিলিয়ন ডলাৰ (প্ৰায় ৬.৫২ লাখ কোটি টকা) বৃদ্ধি পাইছে।
বৰ্তমান জুকাৰবাৰ্গ কেৱল টেছলা আৰু স্পেচএক্সৰ চিইঅ’ ইলন মাস্কৰ পিছত আছে, যাৰ সম্পত্তিৰ পৰিমাণ ২৫৬ বিলিয়ন ডলাৰ (প্ৰায় ২১.৪০ লাখ কোটি টকা)। মাস্ক এতিয়াও প্ৰথম স্থানত আছে যদিও জুকাৰবাৰ্গৰ ক্ৰমবৰ্ধমান ধন-সম্পত্তিয়ে মাস্কৰ অতি নিকটতম কৰি তুলিছে।
মেটাৰ এই সফলতাৰ আঁৰৰ আটাইতকৈ ডাঙৰ ভূমিকা হৈছে জুকাৰবাৰ্গে বিশেষকৈ কৃত্ৰিম বুদ্ধিমত্তা (AI)ত কৰা বৃহৎ বিনিয়োগ। ২০২২ চনত কোম্পানীটোৱে কঠিন সময়ৰ সন্মুখীন হৈছিল, যেতিয়া খৰচ কমাবলৈ কৰা প্ৰচেষ্টাৰ বাবে ২১ হাজাৰ কৰ্মচাৰীক চাকৰিৰ পৰা বৰ্খাস্ত কৰিবলগীয়া হৈছিল। কিন্তু এই কঠিন সিদ্ধান্তই কোম্পানীটোক নতুন দিশ দিয়াই নহয় বিনিয়োগকাৰীৰ আস্থাও ঘূৰাই আনিলে। বিত্ত বিশেষজ্ঞসকলে ইয়াক “কোম্পানীটোৰ বাবে ডাঙৰ পৰিৱৰ্তন” বুলি অভিহিত কৰি কয় যে এই সিদ্ধান্তসমূহৰ বাবে কোম্পানীটোৱে পুনৰ সুস্থিৰ হৈ পৰিছে আৰু নিজৰ লক্ষ্যৰ দিশে আগবাঢ়িবলৈ আৰম্ভ কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
