কেন্দ্ৰীয় চৰকাৰে প্ৰকাশ কৰা এক তথ্যত দেশৰ উচ্চ শিক্ষাৰ এক উদ্বেগজনক ছবি পোহৰলৈ আহিছে৷
চৰকাৰে প্ৰকাশ কৰা তথ্য অনুসৰি দেশৰ প্ৰযুক্তি বিদ্যাৰ উচ্চ শিক্ষানুষ্ঠানসমূহত পোষ্টগ্ৰেজুৱেট আৰু পিএইচডিৰ বৃহৎসংখ্যক আসন খালী হৈ আছে৷
বুধবাৰে ৰাজ্যসভাত কেন্দ্ৰীয় কণিষ্ঠ শিক্ষা মন্ত্ৰী সুভাষ চৰকাৰে কয় যে দেশৰ প্ৰযুক্তি বিদ্যাৰ উচ্চ শিক্ষানুষ্ঠান ক্ৰমে ইণ্ডিয়ান ইনষ্টিটিউট অৱ টেকন’লজি, নেশ্যনেল ইনষ্টিটিউট অৱ টেকন’লজি আৰু ইণ্ডিয়ান ইনষ্টিটিউট অৱ ইনফ’ৰমেশ্যন টেকন’লজিসমূহত পোষ্টগ্ৰেজুৱেট আৰু পিএইচডিৰ বৃহৎসংখ্যক আসন খালী হৈ আছে৷
কেন্দ্ৰীয় মন্ত্ৰীগৰাকীয়ে ৰাজ্যসভাত প্ৰকাশ কৰা অনুসৰি ২০২০-২১ আৰু ২০২১০২২বৰ্ষত IITসমূহত ৩২২৯ আৰু ৩০৮৩ খন পোষ্টগ্ৰেজুৱেট, ১৭৭৯ আৰু ১৮৫২ খন পিএইচডিৰ আৰু NITসমূহত ২৪৮৭ আৰু ৩৪১৩ খন পোষ্টগ্ৰেজুৱেটৰ, ৬০০ আৰু ৯১৪ খন পিএইচডিৰ আৰু IIIT সমূহত ৪২৪ আৰু ৮১৩ খন পোষ্টগ্ৰেজুৱেট আৰু ৩৯৯ আৰু ৫২৭ খন পিএইচডিৰ আসন খালী হৈ আছে৷
বুধবাৰে প্ৰকাশ কৰা অনুসৰি ২০২০ -২১ আৰু ২০২১-২২ পোষ্টগ্ৰেজুৱেটসমূহৰ ভিতৰত MTech আৰু MScৰ খালী আসন আছে ক্ৰমে ২,৪৮৭ আৰু ৩,৪১৩ খন৷
দেশৰ উচ্চ শিক্ষানুষ্ঠানসমূহত এই বৃহৎসংখ্যক আসন খালী হৈ ৰোৱাৰ বাবে কাউন্সেলিঙৰ ব্যৱস্থাটোকহে জগৰীয়া কৰিছে শিক্ষা মন্ত্ৰী চৰকাৰে৷
ৰাজ্যসভাৰ সাংসদ কামাখ্যা প্ৰসাদ তাছাই পিজি আৰু পিএইচডি কৰিবলৈ শিক্ষাৰ্থীসকল আগ্ৰহী নহয় নেকি বুলি কৰা প্ৰশ্নৰ উত্তৰত মন্ত্ৰী চৰকাৰে কয় যে দেশৰ অগ্ৰগতি হৈছে৷ উন্নত নিযুক্তিৰ বাবে স্নাতকোত্তৰ আৰু পিএইচডিৰ দৰে উচ্চ স্তৰৰ ডিগ্ৰীয়ে কিছু স্থবিৰতা আনে৷ উচ্চ শিক্ষা গ্ৰহণ বা গৱেষণা কৰি থকা সময়তে নিযুক্তি লাভ কৰিলে তেওঁলোকে পাঠ্যক্ৰম সম্পূৰ্ণ নকৰাকৈ ত্যাগ কৰে৷
কেন্দ্ৰীয় মন্ত্ৰীগৰাকীয়ে এই বক্তব্য আগবঢ়ালেও বছৰি এইদৰে দেশৰ প্ৰযুক্তি বিদ্যাৰ উচ্চ শিক্ষানুষ্ঠানসমূহত বৃহৎসংখ্যক আসন খালী হৈ থকাটোৱে দেশৰ উচ্চ শিক্ষা খণ্ডৰ বাবে এক বৃহৎ ক্ষতি বুলিয়েই গণ্য কৰিব পাৰি৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
