শব্দ নোহোৱাকৈয়ে বহু ছবিয়ে কথা কয়৷
বিজেপিৰ দলীয় নেতৃত্বই টিকট বঞ্চিত কৰা দিছপুৰ সমষ্টিৰ প্ৰাক্তন বিধায়কক দেখা গৈছে এই ৰূপেৰে৷
মুহূৰ্ততেই ভাইৰেল হৈ পৰিছে বিশেষ ফটোখন৷ ফটোত দেখা গৈছে দিছপুৰ সমষ্টিৰ কংগ্ৰেছৰ প্ৰাৰ্থী মীৰা বৰঠাকুৰে গামোছা পিন্ধাই সম্ভাষণ জনাইছে প্ৰাক্তন বিধায়ক অতুল বৰাক৷
হাঁহিমুখেৰে অতুল বৰাইয়ো গ্ৰহণ কৰিছে মীৰা বৰঠাকুৰে পিন্ধাই দিয়া গামোছা৷ ইতিমধ্যেই বৃহস্পতিবাৰৰ দিনটোৰ পৰাই চৰ্চাত আছে অতুল বৰা৷ দিছপুৰ সমষ্টিত টিকটৰ প্ৰত্যাশা কৰা অতুল বৰাই টিকট নোপোৱাৰ পাছতেই বিষাদেৰে কৰিছিল কেইবাটাও মন্তব্য৷ আনকি বিজেপি দলক প্ৰকৃতিৰ শাওপাত লাগিব বুলিও কৈছিল অতুল বৰাই৷ তাৰপিছতেই তেওঁ স্পষ্টকৈ জনাইছিল যে তেওঁ হয়তো নিৰ্দলীয়ভাৱে দিছপুৰ সমষ্টিত নিৰ্বাচন খেলিব পাৰে৷ নতুবা তেওঁ মীৰা বৰঠাকুৰক সহায় সহযোগিতা আগবঢ়াব পাৰে৷ আৰু শুকুৰবাৰৰ পুৱাৰ ভাগতেই মীৰা বৰঠাকুৰে তেওঁৰ বাসগৃহত উপস্থিত হোৱা পৰিলক্ষিত হৈছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
